
Til pơgê, Quốc hội drơ̆ng nơ̆r ăn 8 kơ luơ̆t, đei: Luơ̆t Dăr hơlen (đei chih hơmet); Luơ̆t hơmet ming, chih tơmât dơ̆ng 1,2 tơdrong lơ̆m Khôi luơ̆t tơkêng sek duh, Luơ̆t Tơkêng phak jên, Luơ̆t Tư phap hăm đe druh dăm păh iung, Luơ̆t Tang ‘măng anih jang xa lôh păng Luơ̆t sek, pơma nuh tơ̆ anih sek tơlang; Luơ̆t hơmet ming, chih tơmât dơ̆ng 1,2 tơdrong lơ̆m Luơ̆t sek phak; Luơ̆t hơmet ming, chih tơmât dơ̆ng 1,2 tơdrong lơ̆m Luơ̆t chih tơlĕch hla ar hơgăt luơ̆t.
Găh bơngai jang, Anih chĕp kơ̆l pơgơ̆r Quốc hội roi tơbăt ăn Quốc hội hla ar chih tơblang, chih akŏm nơ̆r dôm bơngai tang măt Quốc hội lơ̆m jơ pơma nuh tơ̆ grŭp, adrol kơ Quốc hội tơchơ̆t găh bơngai jang kiơ̆ hơnăp jang hăm trong tăh kơphĭu srĕp. Đơ̆ng rŏng kơ pơma nuh tơ̆ grŭp, Quốc hội pơdrơ̆ng nơ̆r ăn hơnăn đei chih păng pơgơ̆r pôk rơih Kơdră chĕp kơ̆l Khul vei lăng pôk rơih teh đak păng tơdrong rơih hơmet khul bơngai jang nai kiơ̆ đơ̆ng tăh kơphĭu srĕp. Đơ̆ng rŏng kơ đei pôk rơih, Kơdră chĕp kơ̆l Khul vei lăng pôk rơih kơ teh đak vă tơroi ăn Quốc hội kĭ ăn hơnăn Phŏ Kơdră păng dôm bơngai jang lơ̆m Khul vei lăng pôk rơih kơ teh đak.
Viết bình luận