‘Năr 07/08, Anih tơm vei lăng pơtho pơhrăm pơgơ̆r hop akŏm trư̆k tuyê̆n tơlĕch tơdrong pơjei băl “Jơ̆p lơ̆m teh đak pơjei băl tơplih ‘nao rơgei păng tơplih hăm kơmăy sô̆” păng tơdrong jang “Đĭ đăng kon pơlei hŏk pơhrăm găh kơmăy sô̆”. Hop akŏm pơih pơdăh truh 600 anih găh dôm Anih vei lăng pơtho pơhrăm tơ̆ tơring; dôm anih vei lăng pơtho hŏk đăi hŏk păng anih pơtho tơdrong jang lơ̆m teh đak.

Pơma tơ̆ jơ tơlĕch tơdrong pơjei băl, Phŏ Kơdră tơm vei lăng pơtho pơhrăm Nguyễn Văn Phúc pơma hơdăh, tơplih hăm kơmăy sô̆ găh pơtho pơhrăm pơih đei lơ tơdrong ‘lơ̆ng đơ̆ng sơ̆ tam mă biơh đei vă hơtŏk tơdrong pơtho păng hŏk pơhrăm, tơplih ‘nao trong pơtho, pơih xă tơdrong ‘lơ̆ng vă rim bơngai hŏk iŏk tơdrong rơgei. Vă tơdrong ‘nâu gơ̆h đei yoa ‘lơ̆ng, đĭ đăng anih pơtho pơhrăm athei bơ̆ jang ‘lơ̆ng 8 tơdrong jang tơm, lơ̆m noh hơtŏk tơdrong pơtho găh kơmăy sô̆ păng dôm tơdrong tơchĕng hơlen khoa hŏk ăn hŏk tro, sinh viên. Tơ̆ hop akŏm, bơngai tang măt ăn dôm hnam trưng, Anih vei lăng pơtho pơhrăm kŭm roi tơƀôh lơ tơdrong kăl ƀơm truh kơmăy sô̆ păng “Đĭ đăng kon pơlei vang hŏk pơhrăm găh kơmăy sô̆”, atŭm hăm ‘nŏh tơlĕch trong jang vă bơ̆ jang kiơ̆ 2 tơdrong pơjei băl roi đunh roi đei yoa mưh pơtho pơhrăm tơ̆ tơring./.