Tơ̆ jơ pơma đam, Kơdră teh đak Lương Cường pơma hơdăh tơdrong pơvei ‘nhŏng oh, bôl boăl ‘lơ̆ng hơiă Việt Nam - Angola jĭ tơmam kăp gĭt, kơjăp ‘lơ̆ng vă 2 teh đak pơih đei chăl jang tŏk ‘nao, hơnơ̆ng tưk tơiung păng pơm pơ ‘lơ̆ng hlŏh dơ̆ng tơdrong pơvei, lui băl găh chinh trĭ, tơgŭm băl đơ̆ng 2 Đảng, 2 teh đak, mât 1 ƀơ̆r đon păng hlôh vao băl đơ̆ng kon pơlei 2 teh đak.

Kơdră  teh đak Lương Cường athei 2 păh hơtŏk tơdrong jang hơdoi lơ̆m dôm tơdrong kăl nhen khul linh, vei sơđơ̆ng teh đak păng lơ tơdrong jang hơdoi găh dôm tơdrong nhen jang pơgang, pơtho pơhrăm, choh jang xa. 2 ‘nu kơdră chĕp kơ̆l drơ̆ng nơ̆r hơnơ̆ng hơmet kơjăp tơdrong pơvei, lui băl đơ̆ng 2 Đảng, 2 teh đak kiơ̆ đơ̆ng hơnơ̆ng pơgơ̆r ăn khul grŭp năm ngôi păng tơƀâp ăn kuan tih, kiơ̆ lơ trong jang, bơ̆ jang đei yoa ‘lơ̆ng  tơdrong jang hơdoi đơ̆ng Anih jang kơ 2 khul kơdră teh đak păng hơtŏk tơdrong jang hơdoi găh dôm tơdrong nhen pơtho ăn khul bơngai jang, kăn ƀô̆ vei lăng, ăn sinh viên năm hŏk tơ̆ băl.