Jĭ anih tơm hanh chinh – mŭk drăm – tơmang pơhiơ̆ kơ tôm tơring gah Hlĕch dêh char Đăk Lăk, Tuy Hòa ưh hơdrô̆ akŏm đei tơdrong hơtŏk kơ minh tơring kơdrơ̆m gơh hơgei 'lơ̆ng, mă oei jing tơring pơgơ̆r tơroh  pơm jang kơ jơnŭm pơgơ̆r 2 tăl 'măng mă blŭng pơm jang drơ̆ng minh. Hop akŏm Đảng ƀô̆ phương jăl jang 2025- 2030 sơkơ̆t hơdah gô pơjing tơring ou jing anih kơdrơ̆m tơmang pơhiơ̆ gơh hơgei 'lơ̆ng, anih tơm asong jang mŭk drăm – tĕch pơdro – tơplih kơmăi kơsô̆ tơring Hlĕch Đăk Lăk; rim bơngai jang đei iŏk yua truh 145 triu hlj ah sơnăm 2030.

Hop akŏm adoi tơlĕch 12 grŭp sơnong jang păng trong jang dơnơm. Pơma pơgơ̆r ah Hop akŏm, yă Cao Thị Hòa An, Phŏ Ƀĭ thư anih jang Tĭnh uy pơgơ̆r hăm phương Tuy Hòa dah yuk hơlou lơ̆m tơdrong jang kiơ̆ pơkăp jơnŭm pơgơ̆r 2 tăl gah đon tơchĕng păng hơtŏk tơring kơdrơ̆m gơh hơgei 'lơ̆ng.