Hăm hơgăt teh 70m² đei 2 hơnih tep atŭm hăm hnam gŏ, hnam chă pơyơ̆ng, pơbŭng hnam ‘nao ‘lơ̆ng liĕm hlôi tơgŭm ăn ŭnh hnam yă Nay Hdoănh, tơ̆ pơlei Mơ Nai Trang, tơring Ia Piar, apŭng Phú Thiện iŏk đei tơdrong hơpơi ‘meh vă hơrih sa sơđơ̆ng. Năr mơ̆t oei lơ̆m pơbung hnmng man kơjăp ‘lơ̆ng, să, yă chhưu lơ̆m jơhngơ̆m tơbăt: Sơ̆, ŭnh hnam yă hơrih sa lơ̆m hnam hyăh hyok, pơyan ‘mi ‘noh hnăt hnot, pơyan phang ‘noh tŏ hlơ hlĕng. Dang ei đei pơbŭng hnam kơjăp ‘lơ̆ng, ŭnh hnam yă pă đei tơtăm găh hnam oei, sơđơ̆ng jơhngơ̆m chă jang sa, vei lăng năng tông kon hơ ‘lơ̆p hŏk pơhrăm truh tơ̆p truh troch. Jơhngơ̆m đon chơt hơ iă kơ unh hnam yă Nay Hdoănh jei jing tơdrong chơt hơ iă lei lăi kơ 355 ŭnh hnam kon pơlei anai đei tơgŭm ăn hnam oei pơgia, hnam hnăt hnot tơ̆ apŭng Phú Thiện.“Đei Đảng, Teh đak lăng ba ming man ăn hnam lơ lou, ba chhôk ‘nă dêh. Ưh hơnhŏ đei năr ba đei hnam man ‘lơ̆ng liĕm lơ lou. Bơnê kơ khul kang ƀô̆, bơngai kơ tơdrong jang hlôi tơgŭm ăn ŭnh hnam nhôn đei tơdrong hơrih sa sơđơ̆ng lơ lou.”

Atŭm hăm apŭng Phú Thiện, apŭng Chư Prông - apŭng đei hloh 1.000 pơbŭng hnam pơgia, hnam hnăt hnot kăl xut xa-jei tŏk bŏk iung jang kơtang vă jang keh đang tơdrong jang ƀlep trong tơchơ̆t. Xơkơ̆t hơdăh ‘nou jĭ tơdrong jang kăl hloh, Khul kơdră chĕp pơgơ̆r Tơdrong jang xut xa hnam pơgia, hnam hnăt hnot kơ apŭng hlôi pơjao ăn rim kơdră jang lơ̆m khul iung jang tơnăp chă pơrô̆ pơrôp, dăr lăng jang ming man. Ƀok Đinh Văn Dũng - Ƀĭ thư Đảng apŭng, Kơdră chĕp pơgơ̆r Jơnŭm vei lăng kon pơlei apŭng Chư Prông, kơdră chĕp pơgơ̆r tơbăt, apŭng hlôi hơvơn kơtang khul jang vă hơmet pơ ‘lơ̆ng tơdrong tơnap tap, tơlĕch jang jơnei tơdrong jang. Atŭm hăm ‘noh, apŭng hlôi akŏm tơlĕch jang rim kon jên jang, hơmet ăn 54 ti hlak jên vă iung jang tơdrong jang ou. Rim tơring iung jang kơtang chă pơrô̆ pơrôp, pơtho tơbăt ăn kon pơlei, krao hơvơn kơtum kơtŏng ‘nhŏng oh, koeng ƀôt, iung jang hơdoi hăm khul ƀô̆ đô̆i kŏng ang lơ̆m tơring vang iung jang ming man hnam. Truh dang ei, akŏp pơbŭng hnam tơlĕch jang păng ming man keh đang kơ apŭng hlôi hloh 70%. Đang ƀô̆ apŭng tŏk bŏk kơrŭn đĭ ai, hơdrin jang keh đang đĭ đăng 997 pơbŭng hnam hơdrol năr 30/6/2025, sơđơ̆ng 100% ŭnh hnam dơnuh, vă jê̆ dơnuh đei hnam oei kơjăp ‘lơ̆ng.“Jô̆ hơtŏ lơ̆m mĭnh năr nhôn chă hơvơn iung jang ming man đơ̆ng 8 truh 10 pơbŭng hnam. Rim khei, rim jăl, Khul chĕp pơgơ̆r tơdrong jang kơ apŭng dăr lăng hơlen tơdrong jang ming man vă hơnơ̆ng chă pơrô̆; adoi krao hơvơn vang iung jang đơ̆ng rim hơnih. Dang ei lơ̆m apŭng đei 75% năr jang kơ rim ŭnh hnam jang kơdih, pă dôm yơ ‘noh nhôn chă pơrô̆ hơvơn măt trân, rim khul păng khul ƀô̆ đô̆i kŏng ang lơ̆m tơring vang jang. Atŭm hăm ‘noh, atŏk kơtang bơ̆ jang dăr lăng, lăng hơlen tơdrong ming man vă hnam đei ming man kơjăp ‘lơ̆ng”.

Dang ei, dêh char Gia Lai hlôi jang keh đang 93% trong pơprŏ jang Tơdrong jang xut xa hnam pơgia, hnam hnăt hnot. Lơ̆m akŏp 17 apŭng, thĭ xah, pơlei tơm ‘noh hlôi đei 10 tơring hlôi jang keh đang trong tơlĕch jang, rim tơring uơ oei hlôi jang keh đang 70% truh 90% trong tơlĕch jang. Iŏk jơnei ou tơƀôh hơdăh tơdrong chĕp pơgơ̆r, pơrô̆ jang tơtom, trŏ lăp đơ̆ng khul kơdră chĕp pơgơ̆r Đảng, tơdrong vang iung jang mĭnh jơhngơ̆m kơ khul chinh trĭ păng tơdrong vang kơrŭn đĭ ai đơ̆ng pơ đĭ lơ̆m kon pơlei.

Iung jang Tơdrong jang xut xa hnam pơgia, hnam hnăt hnot tơ̆ Gia Lai ‘noh tơƀôh hơdăh trong chĕp pơgơ̆r gơh hơgei păng kơrŭn đĭ ai chinh trĭ đơ̆ng khul kơdră chĕp pơgơ̆r Đảng. Đơ̆ng dêh char truh tơ̆ tơring, tơdrong pơjao jang, pơjao khei ‘năr jang kiơ̆, vei kơjăp jơ ‘năr hop akŏm lơ̆m khei păng hơlen tơdrong iung jang ming man keh đang lơ liơ lơ̆m giĕng hlôi pơjing đei jơhngơ̆m đon pơting dih băl kơtang jơ̆p tơring tơrang. Rim Khul Đảng jing hơnih kăl, pơm jŭk yŭk trong hơlou lơ̆m bơ̆ jang pơrô̆ pơrô̆, krao hơvơn tơpôl vang iung jang. Jơhngơ̆m đon “ ‘Mêm kơ eng dih băl, hla ‘lơ̆ng glơng ba hla hyăh” hăm trong jang “ Bơngai ayơ đei jơhngơ̆m tơgŭm jơhngơ̆m, bơngai ayơ đei mŭk drăm tơgŭm mŭk drăm” hlôi đei lang să jơ̆p jang. Đĭ đăng khul Kŏng ang dêh char, Binh đoàn 15, khul ƀô̆ đô̆i vei lăng sơlam teh đak păng rim khul kŏng ang, ƀô̆ đô̆i lơ̆m tơring vang tơgop jơhngơ̆m iung jang hơdoi hăm khul kơdră păng kon pơlei iŏk đei jơnei hơ iă. Tơdrong mă ou tơgŭm ăn pơjing đei jơhngơ̆m pran kơtang vă tơring pơjing đei rơbou pơbŭng hnam hăm lơ trong ‘lơ̆ng nhen re hloh, tĕnh koăng hloh, kơjăp ‘lơ̆ng hlŏh, ... ăn rim ŭnh hnam dơnuh, vă jê̆ dơnuh, ŭnh hnam đei iŏk yua ăn teh đak. Ƀok Rah Lan Chung-Kơ iĕng Ƀĭ thư Đảng dêh char, Kơdră chĕp pơgơ̆r Hơnih vei lăng kon pơlei dêh char Gia Lai tơbăt:“Bơ̆ jang xut xa hnam pơgia, hnam hnăt hnot kăl tơlĕch jang mă tơpăt, mă hơdăh, sơđơ̆ng ăn kơjăp ‘lơ̆ng păng jơnei. Kăl hơvơn iung jang kơtang đơ̆ng rim hơnih bơ̆ jang, hơnih mơdro sa, khul jang, rim bơngai păng kon pơlei, pơđĭ lơ̆m dêh char păng đơ̆ng dêh char anai. Atŭm hăm ‘noh, kăl chă pơrô̆ hơvơn kon pơlei vang iung jang vă hnam ming man đei kơjăp ‘lơ̆ng hloh dơ̆ng. Adoi, tơlĕch jang kơtang năm dăr lăng hơlen, tơtom hôn bơnê, pôk hơpăh ăn khul jang, rim bơngai tơgop lơ hloh tơdrong jang ou.”

Tơdrong jang xut xa hnam pơgia, hnam hnăt hnot tơ̆ Gia Lai tok bŏk jing hơyak pran vă kon pơlei kơrŭn jơhngơ̆m yak hloh dơnuh hin, sơđơ̆ng hơrih sa, tơgop lơ̆m tơ iung pơjing pơlei pơla Gia Lai roi năr roi atok tơ iung, pơdrŏng, gơh hơgei. Lơ̆m ou, rim khul Đảng hlôi iung jang ‘lơ̆ng hơnăp jang ‘noh “Khul chĕp kơ̆l” chông ba, krao akŏm păng pơjing đei trong jang vang iung jang lang să, atŏk kơtang tơgoăt tơgoăl pôm nơ̆r ƀơ̆r đon lơ̆m kon pơlei pơla kơjăp iăp kơtang, lăng truh trong tơlĕch jang atŏk tơ iung kơjăp ‘lơ̆ng tơ̆ tơring.