Lơ̆m jơ năr vang truh Hop akŏm rim sơnăm dôm bơngai iung jang hơdrol ‘măng mă 16 kơ Hop akŏm Mŭk drăm apŭng plĕnh teh (WEF) pơgơ̆r tơ̆ Thiên Tân păng bơ̆jang tơ̆ Trung Quốc, kơsơ̆ brei 24/6 tơ̆ Thiên Tân, Trung Quốc, Thủ tướng Phạm Minh Chính hlôi pơma đam hăm Thủ tướng Trung Quốc Lý Cường. Tơ̆ jơ pơma đam, Thủ tướng teh đak pơma hơdăh, Việt Nam ling lang lăng kăl hơtŏk tơiung tơdrong pơvei hăm Trung Quốc ‘noh jĭ ‘meh vă ‘lơ̆ng, jĭ rơih iŏk hiôk, gĭt kăl păng jĭ tơgŭm hơdrol lơ̆m tơdrong jang tơgŭm jang tơbôl; lui ngeh Trung Quốc gô hơnơ̆ng hơtŏk tơiung hơnăp jang gĭt kăl dôm tơdrong hơtŏk tơiung, sơđơ̆ng păng hơgei jơ̆p plei teh.

2 Thủ tướng tơroi băl nơ̆r tơgop tơpăt, rơhau găh tơdrong tơ̆ đak dơsĭ, drơ̆ng 1 nơ̆r vang hơdai băl vei lăng păng hơmet ‘lơ̆ng hloh tơdrong ưh kơ lăp băl, pơvei tơdrong rơngei, sơđơ̆ng. Thủ tướng Phạm Minh Chính athei 2 păh bơ̆jang kiơ̆ tơpăt đon hlôh vao hơdai gĭt kăl, “Drơ̆ng nơ̆r găh dôm tơdrong kăl athei hơmet pơ ‘lơ̆ng tơdrong tơ̆ đak dơsĭ Việt - Trung”; hơdai hăm ASEAN hơdrin jăh iŏk đei COC đei yua, tơpă, lăp hăm khôi luơ̆t apŭng plĕnh teh păng UNCLOS 1982 kiơ̆ drơ̆ng nơ̆r đơ̆ng dôm pang.