Rim năr, oh Lang Thị Yến Vy, hŏk tro lăm 7, Hnam trưng hŏk jăl 2 Nguyễn Thị Định, xăh sơlam Ia Rvê, dêh char Đắk Lắk athei yak jăl trong hloh 10km vă truh tơ̆ hnam trưng. Ƀơ̆t băt tơ̆ hnam trưng kơdih tŏk bŏk hŏk gô đei man ‘lơ̆ng păng gĭt kăl hloh ‘noh jĭ đei oei hŏk kơtă, Yến Vy tôch kơ chhôk hơiă:

“Hơtăih đơ̆ng hnam oh truh tơ̆ hnam trưng dang 10 kilomet. Lơ̆m pơyan ‘mi trong đak lơ̆p tôch kơ lơ păng oh athei năm trong ver hơtăih hloh 14 – 15 kilomet. Pơyan tŏ trong tôch kơ tŏ păng ‘mui năm vih vơ̆t tôch kơ lap, brŏk truh tơ̆ hnam ưh kơ ‘meh sŏng sa kiơ hloi. Ƀơ̆t băt hnam trưng nhôn đei man ‘nao oh chơt hơiă dêh. Tôch kơ chang gô đei hnam trưng ‘nao vă lu oh gơh hŏk pơhrăm ‘lơ̆ng hloh”.

Tơdrong tơroi kơ Yến Vy kŭm jing tơdrong tơchĕng atŭm đơ̆ng kơhrĕng hŏk tro păng mĕ ƀă tơring sơlam Đắk Lắk prăt dôm sơnăm âu ki; mŭk drăm mơmat tat, tơdrong hŏk tơƀơ̆p lơ tơdrong pơgăn. Kơlih đơ̆ng dôm tơdrong pơgăn ‘noh, trong jang tơmơ̆t jên jang man dôm hnam trưng hŏk teh đak rong jăl 1 - jăl 2 tơ̆ dôm xăh sơlam đei tơlĕch jang, pơih ăn hơmĕng ‘nao ăn tơdrong jang “pơtho hŏk” tơring sơlam Đắk Lắk.

Kiơ̆ trong tơlĕch jang jăl jang 2025 – 2030, dêh char gô man 5 tŏ hnam trưng teh đak rong jăl 1 păng jăl 2 tơ̆ 4 xăh sơlam păng 1 xăh tơ til tơring sơlam. Dôm hnam trưng đei tơmơ̆t jên jang tôm lăm hŏk, ƀĭch tep, hnam sŏñg sa, thư viện, hơnih pơtâp hơkâu jăn, lăm tin học, đak rơgoh păng dôm hơnih nai, vei sơđơ̆ng ăn hŏk tro hŏk pơhrăm, oei sa akŏm lơ̆m hơnih ‘lơ̆ng hloh.

Ƀok Nguyễn Văn Hoa, Kơdră Anih vei lăng kon pơlei xăh Ia Rvê, dêh char Đắk Lắk tơbăt, ‘nâu tơpă jing tơdrong hiôk chơt tih hăm pơđĭ khŭl kơdră chĕp kơ̆l păng kon pơlei tơring sơlam. Kon pơlei dôm hơdrĕch hơdrŭng lơ̆m xăh tôch kơ lăp đon tơgŭm, pơm tơdrong hiôk vă tơdrong jang jăh pơm đang.

“’Nâu jĭ 1 tơdrong ‘lơ̆ng tôch kơ gĭt kăl vă đe mon akŏm oei sa tơ̆ hnam trưng teh đak rong, kon pơlei dôm hơdrĕch kon kông lơ̆m xăh tôch kơ bơngơ̆t truh păng tơgŭm vă kon pơlei đei hŏk pơhrăm”.

Ƀok Trương Công Thái, Phŏ Kơdră Anih vei lăng kon pơlei dêh char Đắk Lắk tơbăt, lơ̆m kơsô̆ 5 hnam trưng teh đak rong 2 jăl tơring sơlam đei man tơ̆ dêh char, đei 4 hnam trưng đei tơmơ̆t jên jang hăm jên jang  Trung ương, 1 hnam trưng iŏk yua jên đơ̆ng Anih tơm vei lăng Khŭl lĭnh hăm akŏm jên tơmơ̆t jang dang 630 ti hlak jên. Mĭnh hnam trưng pơm lăp hăm ‘meh vă hŏk pơhrăm ăn dang 1.000 – 1.200 ‘nu hŏk tro. ‘Nâu jĭ dôm hnam trưng ‘lơ̆ng lơ̆m tơpôl păng chĭnh trĭ gĭt kăl, ưh khan lăp pơyua ăn hơnăp jang pơtho pơhrăm mă oei tơklep hăm tơdrong jang vei lăng sơđơ̆ng tơdrong hơrih sa tơpôl, sơđơ̆ng kon pơlei oei sa, vei sơđơ̆ng tơpôl tơring sơlam. Yua thoi noh rim anih jang, tơring akŏm jang hơdai kơjăp lơ̆m kơplăh tơlĕch jang vei sơđơ̆ng ƀlep tơdrong hơgăt, ‘lơ̆ng păng hrĕnh.

“Akŏm jang hơdai lơ̆m kơplăh pơgơ̆r đơ̆ng tơdrong vei sơđơ̆ng teh klĕp truh bơngai iŏk jang pơtơm tơmơ̆t jên jang man dôm hơnih hŏk pơhrăm jô̆ hloi tơdrong iŏk jang dăr hơlen lơ̆m kơplăh bơ̆jang kiơ̆ athei pơm kiơ̆ ƀlep tơdrong hơgăt”.

Kiơ̆ kơ yă Lê Thị Thanh Xuân, Kơdră Anih vei lăng găh pơtho pơhrăm dêh char Đắk Lắk, tơdrong jang hnam trưng teh đak rong 2 jăl jing tơdrong đei yua hơdrô̆ kơ tơring sơlam pơmat tat. Anih vei lăng pơtho pơhrăm păng rim tơring lơ̆m dêh char gô tơchĕng hơlen tơdrong jang âu vă pơih să tơ̆ hơnăp kơnh. Anih jang gô jang tơgŭm ăn Anih vei lăng kon pơlei dêh char pơjing trong jang hơtŏk tơiung jơ̆p jang hnam trưng hŏk 2 jăl, pơm tơdrong hiôk ăn hŏk tro đei hŏk pơhrăm hiôk đơ̆ng jăl mâm non truh jăl 3:

“Kiơ̆ lơ̆m tơdrong jang âu rim tơring gô đei trong tơlĕch jang vă pơih să dôm tơdrong jang vă hơtŏk tơiung rim jăl hŏk kơjung hloh vă đe oh đei tơdrong hiôk đơ̆ng jăl mâm non, jăl 1, jăl 2 păng Jăl 3 tơdrong hiôk đe oh hŏk pơhrăm gô đei vei sơđơ̆ng ‘lơ̆ng hloh”.

Dôm hnam trưng tŏk bŏk ƀrư̆ ƀrư̆ pơjing tơ̆ tơring sơlam Đắk Lắk ưh khan lăp đei kơjă kăp gĭt găh anih jang, tơmam drăm, dôm hnam trưng âu oei hơnhăk ba hơmĕng tih tên đơ̆ng kơdră đảng, kơdră tơring păng kon pơlei lơ̆m tơdrong pơtho hŏk tơ̆ dôm tơring oei lơ pơmat tat. Đơ̆ng dôm lăm hŏk ‘nao, dôm hơnih ƀĭch tep, oei sa ‘lơ̆ng, tơnang ‘măng ‘nao tŏk bŏk pơih ăn kơ kon oh tơring sơlam, hơnhăk ba tơdrong hơmĕng găh mĭnh Đắk Lắk hơtŏk tơiung kơjăp, hơnih gơh hơgei gô tơ̆k hơdăh tơ̆ hơnăp kơnh đơ̆ng dôm tơring teh sơlam kơ Teh đak.