Dêh char Lâm Đồng dang ei đei 7 grŭp hơgăt mŭk drăm - tơpôl jang đei păng yak hloh trong tơlĕch jang, lơ̆m noh thu mong jên jang teh đak hloh 32.000 ti hlak jên, yak hloh trong tơlĕch ăn. Phŏ Thủ tướng chih iŏk, lăng ‘lơ̆ng tơdrong hơdrin đơ̆ng tơring lơ̆m tơdrong jang dŏng tơgŭm, dŏng sar bar, tơgŭm kon pơlei tơring đei ƀơm ưh kơ ‘lơ̆ng yua đơ̆ng ‘mi tih đak lơ̆p pơrăm, hơdai hăm athei dêh char hơnơ̆ng hơtŏk tơdrong pran, vei sơđơ̆ng jang đang dôm tơdrong hơgăt jang tŏk.

Tơm ‘noh jĭ vei kơjăp tơdrong yak tŏk lơ̆m pơm tơlĕch tơmam đơ̆ng choh jang sa đei, tŭn hrĕnh dôm tơdrong jang tơm, mă loi ‘noh jĭ dôm jăl trong gre kơdâu hrĕnh, vă pơtrŭt tơlĕch jên tơmơ̆t jên jang teh đak. ‘Măng âu, Phŏ Thủ tướng hlôi vang truh pơm lêh tơlĕch jang ming man hnam oei ‘nao ăn 4 ŭnh hnam kon pơlei đei păk hơlih pơđĭ tơ̆ xăh D’Ran păng pơjao tơmam ăn dôm ŭnh hnam kon pơlei đei hiong răm kơtang yua đơ̆ng ‘mi tih đak lơ̆p.