Giĕng adrol ki, Anih vei lăng jang Khoa hŏk păng kơmăy kơmŏk dêh char Đắk Lắk jang hơdoi hăm Anih vei lăng jang Khoa hŏk păng kơmăy kơmŏk dêh char Phú Yên păng Anih jang Viễn thông 2 dêh char pơgơ̆r Pơtâp pơhrăm iŏk yoa Kơmăy yoa atŭm ăn kăn ƀô̆, bơngai jang kơ teh đak tơ̆ xăh lơ̆m dêh char Đắk Lắk păng Phú Yên. Tơdrong pơtâp pơhrăm vă pơtho tơƀôh trong iŏk yoa 2 kơmăy, đei: Kơmăy pơm hla ar vei lăng kơ dêh char Đắk Lắk păng Kơmăy vei lăng hla ar hơgăt păng trong pơgơ̆r jang.

Ƀok Nguyễn Văn Thản, Phŏ Kơdră Anih jang Viễn thông Đắk Lắk, anih jang đei Anih vei lăng kon pơlei d/c Đắk Lắk pơjao tơlĕch chô̆ hơmet rim kơmăy pơvih ăn tơdrong tơmât hơdai 2 dêh char Đắk Lắk păng Phú Yên, ăn tơbăt, hlŏh 1.000 anih pơih pơdăh tơ̆ 102 xăh, phường hăm rơbâu ‘nu kăn ƀô̆, bơngai jang kơ teh đak tơ̆ 2 dêh char vang truh pơtâp pơhrăm. ‘Nâu jĭ khul kăn ƀô̆ tơm dơnơm vang hŏk pơhrăm trong pơm hla ar vei lăng kơ dêh char Đắk Lắk ‘nao.

“Dôm grŭp kăn ƀô̆, bơngai jang kơ teh đak đơ̆ng 5-7 ‘nu bơngai ngôi tơ̆ lăm bơ̆ jang gơ̆h truh akŏm hai. Atŭm hăm ‘nŏh pơgơ̆r kơtă tơ̆ dôm hnam hôp tơ̆ dôm xăh ‘nao pơjing, pơm hiôk hian ăn kăn ƀô̆, bơngai jang kơ teh đak truh hŏk pơhrăm. Nhôn năng kăl tơdrong pơtho tơƀôh tơ̆ yăn âu, roi tơƀôh mă hơdăh ăn rim kăn ƀô̆, bơngai jang tơ̆ 34 xăh phường ‘nao kơ Phú Yên vă đe sư hŏk hiôk ƀiơ̆, ƀônh hlôh ƀiơ̆ mưh tơƀâp dôm tơdrong đei tơ̆ yăn âu vă huei kơ tơhlăk kiơ mưh iŏk pơm hla ar ăn kon pơlei.”

Adrol kơ ‘nŏh, Anih chĕp kơ̆l Đảng dêh char Đắk Lắk roi tơbăt dôm kơchư̆k chĕp kơ̆l tơm dơnơm tơ̆ dôm xăh, phường ‘nao. Dêh char kŭm pơjing 6 grŭp chă pơtho tơƀôh, hơlen năng tơdrong bơ̆jang păng pơgơ̆r Hop akŏm Đảng đơ̆ng 2025–2030 tơ̆ dôm anih jang ‘nao.

Tơ̆ hop akŏm pơtho pơhlôh ăn Khul chĕp kơ̆l đảng, khul kơdră tơring păng dôm khul grŭp tơpôl tơ̆ xăh ‘nao, ƀok Nguyễn Tuấn Hà – Phŏ Kơdră chĕp kơ̆l Anih vei lăng kon pơlei dêh char Đắk Lắk, tơtă: “Iĕm hlôi pơm Kơdră chĕp kơ̆l Anih vei lăng kon pơlei dôm apŭng bơih ‘nŏh kŭm jang gơh bơih, mă lei tơdrong gơ̆h jang ‘nŏh bơ̆n ưh gơh tơmât yoa đĭ hloi mưh pơm Kơdră vei lăng xăh ‘nao ôh, yoa sư tôch pha, adrol sơ̆ pơjao hơnăp jang ưh đei dôm yơ, dang ei hlŏh 1 rơbâu tơdrong jang ‘nŏh athei tơplih ming đon tơchĕng. Dôm bơngai jang tơ̆ dôm anih jang pha ra dăh mă đơ̆ng dêh char păng đei pôk pơm Kơdră vei lăng xăh ‘nŏh athei kơchăng hăm tơdrong ‘nâu, bơ̆n ưh gơ̆h lăng pơhơi ôh, ưh kơchăng, lăng pơhơi 1 vât ‘nŏh gô đei pơmat tat lơ̆m khei ‘năr bơ̆n bơ̆ jang tơlĕch tơdrong chơ̆t păng chĭu pŭ hơnăp jang.”

Kiơ̆ trong vă jang lơ̆m 2 năr, ‘năr 25 păng 26/6, dôm anih jang vei lăng tơ̆ xăh, phường ‘nao tơ̆ Đắk Lắk hrơ̆ch pơgơ̆r bơ̆jang pơlong năng. Adrol kơ ‘nŏh, dôm tơring hlôi hơmet ‘lơ̆ng anih jang, tơmam drăm, kơmăy kơmŏk, anih jang điên tư păng trong sơng kon pơlei, sek tơlang kơ thơ tơkêng âu to.

Ƀok Nguyễn Đình Trung, Bí thư Đảng dêh char Đắk Lắk, pơma hơdăh: ‘măng bơ̆jang pơlong năng âu vă hơlen năng rim tơdrong găh pơgơ̆r jang, păng sek tơlang dôm tơdrong đei tơ̆ yăn âu đơ̆ng khul kăn ƀô̆ lơ̆m khul kơdră ‘nao. Kiơ̆ đơ̆ng noh, tơtom chă ƀôh dôm tơdrong pơmat tat, tơhlăk tăk vă đei trong hơmet pơ ‘lơ̆ng adrol kơ mât bơ̆ jang tơpă:

“Bơ̆n pơma bơ̆ jang pơlong năng mă lei dôm tơdrong bơ̆ jang ‘nŏh đei tơpă. ‘Nâu jĭ hơyak hơmet vă mưh truh ‘năr 1/7 âu kơnh gơ̆h bơ̆ jang tơpă hloi păng ưh đei tơdrong kiơ tơhlăk, ưh gan băt. Oei tơdrong jang ‘nŏh ưh đei gô bu, tơdăh dôm bơngai chĕp kơ̆l tơm dơnpơm ưh đei tơlĕch jang ‘nŏh khul jang tơ̆ hơla athei gô tơdrong jang, thoi noh khul bơ̆ jang jing hiơ̆ hyĭn jang ưh kơ gơ̆h. Yoa thoi noh iĕm jang tơdrong jang athei kơchăng hăm tơdrong jang pơlong năng đơ̆ng kơdih păng Bí thư xăh, phường ‘nao athei chĭu pŭ găh tơdrong pơgơ̆r bơ̆ jang tơ̆ rim anih jang chinh trĭ tơ̆ hơla.”