Kiơ̆ tơdrong vă jang, tơ̆ Hop akŏm âu, găh tơdrong chih pơjing luơ̆t, Anih chĕp kơ̆l pơgơ̆r Quốc hội gô hơlen năng, tơgop nơ̆r găh tơdrong tơl tơblang, chih hơmet: Luơ̆t tơdrong kăl; Luơ̆t chông hơnhăk bơngai yoch, Luơ̆t pơjao bơngai oei rôp phak, Luơ̆t tơgŭm tư phap hăm kon pơlei, Luơ̆t Tơgŭm tư phap găh sek phak; Luơ̆t hơmet ming, chih tơmât dơ̆ng 1,2 tơdrong lơ̆m Luơ̆t bơ̆ jang Dăr hơlen đơ̆ng Quốc hội păng Jơnŭm pơgơ̆r kon pơlei.

Atŭm hăm ‘nŏh, Anih chĕp kơ̆l pơgơ̆r Quốc hội vă tơgop nơ̆r ăn Luơ̆t Rôp kron pơgia păng kâm ưh ăn lĕch đơ̆ng tơring oei xa; Luơ̆t pơm kiơ̆ tơdrong sek phak (đei hơmet ming); Luơ̆t pơm kiơ̆ sek duh (đei hơmet ming); Luơ̆t hơmet ming, chih tơmât dơ̆ng 1,2 tơdrong lơ̆m Luơ̆t pơtho pơhrăm; Luơ̆t Pơtho Đăi hŏk (đei chih hơmet ming); Luơ̆t pơtho tơdrong jang (đei hơmet ming); Luơ̆t tang găn ma túy (đei hơmet ming); trong pơgơ̆r, tơgŭm hơdrô̆ mưh tơmât jên jang Man cham gre păr Gia Bình.