Kŭm hăm buăl phĭn rup lăng jơ̆ng ti păng chă lăng tơdrong ‘lơ̆ng hơiă tơ̆ Gành Đá Đĩa, xăh Tuy An, dêh char Đắk Lắk, mŏ Đào Thị Hiền, tơmoi tơmang lăng đơ̆ng pơlei tơm Hà Nội ưh kơ đei pơdơh tơhôih tơ̆ hơnăp tơdrong ‘lơ̆ng hơiă đơ̆ng tơmo ‘lơ̆ng mă cham char hlôi pơsư̆ ăn. Mŏ Hiền tơroi, đe mŏ hlôi rơih iŏk Đắk Lắk ‘noh jĭ hơnih năm truh lơ̆m tơdrong năm tơmang lăng pơyan he vă chă lăng cham char păng vă kơbăt tơdrong ‘nao đơ̆ng 1 dêh char ‘nao tơmơ̆t hơdai ƀơ̆t đei đak dơsĭ hai đei bri hai.

“‘Măng mă blŭng nhôn truh hăm dêh char Đắk Lắk ‘nao, đei lăng đak dơsĭ kơ Đắk Lắk, lăng Gành Đá Đĩa, phĭn rup tơ̆ âu tôch kơ ‘lơ̆ng. Nhôn kŭm tơchĕng vă năm tơmang lăng Phú Yên đang kơ ‘noh gô hơnơ̆ng năm chă lăng tơ̆ Buôn Đôn vă lăng tôm đak dơsĭ hai kông hai. Athei tơroi ‘noh jĭ dang ei năm tơ̆ Đắk Lắk ‘noh gô đei tơmang lăng kông hai gơh lăng đak dơsĭ hai. Mĭnh tơdrong tôch kơgĭt kăl ‘noh ka hơdang tơ̆ âu tôch kơ ‘lơ̆ng păng kơjă ‘noh trŏ lăp”.

Iŏk đơ̆ng ƀơ̆t Teh đak đei trong jang tơmơ̆t hơdai 2 dêh char, tơmang lăng Đắk Lắk - Phú Yên hlôi đei lơ tơdrong hơiă. Tơmoi tơmang lăng tŏk hloh lơ ‘măng pơting hăm hơdrol. Mă loi ‘noh jĭ, ưh khan lăp tơmoi tơmang lăng truh đơ̆ng dôm dêh char nai mă tơmoi lơ̆m dêh char năm vih vơ̆t đơ̆ng 2 tơring Hơlĕch - Pơmơ̆t Đắk Lắk kŭm tŏk lơ hăm lơ tơmoi tour dăh mă grŭp ŭnh hnam. Mŏ Nguyễn Thị Điểm, bơngai jang sơng tơmoi tơ̆ Rosa Alba Resort Tuy Hòa, Đắk Lắk roi tơbăt:

Ĭnh ƀôh tơ jê̆ âu ƀơ̆t mă tơmơ̆t hơđai dôm dêh char hăm băl ‘noh tơmang lăng kŭm tôch kơ hơiă, tơmoi kŭm tôch kơ lơ. Tơ̆ Rosa kơ nhôn ‘noh rim tơring tă kơ đei ngăl, mă lei dôm khei tơ jê̆ âu ‘noh ƀôh Pơmơ̆t Đắk Lắk jur tơ̆ âu tôch kơ lơ. Ĭnh tôch kơ hơmĕng tŏk bŏk tơdrong tơmang lăng hơiă thoi âu ‘noh oei hơmĕng ‘noh jĭ tơmoi truh tơ̆ âu lơ hloh dơ̆ng”.

Kiơ̆ hơdai kiơ̆ hăm tơdrong jang tơmơ̆t hơdai, dôm anih jang tơmang lăng kŭm hlôi sơng blŭng chă iŏk dôm tơmam ‘lơ̆ng đak dơsĭ - bri. Nhen tơ̆ hnam mơdro et sa Đắk Phú, phường Tuy Hòa, hơnăn krao đei tơgep đơ̆ng hơnăn 2 dêh char Đắk Lắk păng Phú Yên, ‘nhŏng Trương Tấn Tài, vei lăng hnam mơdro et sa roi tơbăt, anih jang ưh khan lăp tơplih 1 hơnăn tơgoăt đak dơsĭ - bri mă tơmam sa kŭm đei pơm hơdai.

“Nhôn et hơtŏk đơ̆ng ‘năr 1/6 ‘noh đơ̆ng khei 5 khŭl pai gŏ hlôi tŏk tơ̆ Đắk Lắk năm hơlen lăng rim hnam mơdro et sa, pai sa, joh ayŏ tơ̆ tơring Đắk Lắk vă nhăk ba tơ̆ âu dôm tơmam sa ‘lơ̆ng hơdrô̆ đơ̆ng kơpal ‘noh nhen iĕr phang, pơlăh đing, goi pro har, .... Tĕch ‘lơ̆ng, tơmoi tôch kơ ‘meh sa ƀơ̆t mă truh âu kơnh  đei sa tơmam sa tơring groi kông kơ Đắk Lắk hơdai hăm dôm tơmam sa ka hơdang tơring đak dơsĭ hai”.

Đơ̆ng rŏng tơmơ̆t hơdai, tơring găh Pơmơ̆t kơ Đắk Lắk ƀôh hơiă hăm tơmang lăng cham char bri brăh, tơmang lăng tơpôl, joh ayŏ chĭng chêng, tơmam sa ‘lơ̆ng hơdrô̆ kơ Tây Nguyên. Oei tơring găh Hơlĕch đei tơdrong pran tơmang lăng đak dơsĭ, pơlei rong ka hơdang, dôm kơ loăi ka hơdang. Dôm tơdrong tơroi găh lu lĭnh lôch tang ăn teh đak năm tơblăh tơ̆ tơring pơbăh tơ̆ Buôn Ma Thuột đei tơroi dơ̆ng hăm tơdrong găh Vũng Rô păng dôm duk ưh kơ đei kơsô̆, dôm hơnih koa kơ đak krong Sê Rê Pốk păng tơblăh jơnei Buôn Ma Thuột. Ƀok Ngô Văn Định, Phŏ kơdră Khŭl jang tơmang lăng dêh char Đắk Lắk akhan, dôm hơnih ‘lơ̆ng kơ 2 dêh char so ƀơ̆t tơmơ̆t hơdai gô jing tơdrong pran tơgŭm ăn 2 tơring Hơlĕch - Pơmơ̆t hơtŏk tơiung ‘lơ̆ng hloh.

“Nhôn gô tơmơ̆t dơ̆ng ăn băl dôm tơdrong mă đunh kơ âu ‘noh ưh kơ ‘lơ̆ng đơ̆ng 2 dêh char vă pơm jing tơmam vă ăn pơđĭ 2 tơring tă kơ ling lang gơh pơvih ăn tơmoi. Mă 2 ‘noh jĭ pơih să, pơm hơmet ming cham gre păr Tuy Hòa jing cham gre păr apŭng plĕnh teh vă sơng tơmoi truh hăm Tuy Hòa đang kơ ‘noh năm tơ̆ Đắk Lắk. Mă 3 dơ̆ng ‘noh jĭ pơtho pơhrăm bơngai jang vă pơyua ăn tơmang lăng Đắk Lắk ‘nao, jơh ayŏ athei đei tơdrong tơmơ̆t hơdai, tơdrong jang athei đei hơtŏk ‘lơ̆ng”.

Tơdrong tơmơ̆t hơdai dêh char hlôi pơm ăn tơmang lăng Đắk Lắk đei tơdrong hiôk hơtŏk tơiung ‘nao. Tơdrong pơm hơdai dôm tơmam tơmang lăng hơdrô̆, kŭm hăm tơdrong pơm hơmet ming anih jang kăl păng pơtho pơhrăm bơngai jang ‘lơ̆ng, đei hơmĕng gô tơgop pơtrŭt tơdrong jang tơmang lăng kơ dêh char hơtŏk tơiung pran kơtang tơ̆ hơnăp kơnh.