Hơdrol kơ năr năm truh pơlei tơm Hồ Chí Minh vă Hop akŏm Hơdruh tơdăm jang hơgei kiơ̆ nơ̆r Ƀok Hô jơ̆p teh đak 'măng mă 8, sơnăm 2025, Kpuih HMin oei tơgenh iung hrôih, năm tơ̆ pơgar kơsu vă pơtho gah kih thuơ̆t kôih kơtăk kơsu ăn grŭp jang 'nao. Đon bơnôh dăp 'lơ̆ng kơ bơngai Ƀĭ thư chi đoan hlôi pơdjoi tơdrong nhan lăp hăm đe hơdruh tơdăm. Kŏng nhơ̆n mơlôh Siu Pôp ăn tơbăt: “Kpuih Hmin 'noh kŏng nhơ̆n jang hơgei, pơtho ăn kơ nhôn kôih kơtăk kơsu tơnăp dêh. Nhôn hŏk ƀoi păng iŏk yua trŏ păng ƀônh hiôk dêh. Pơtih nhen Kpuih Hmin pơtho gah kih thuơ̆t kôih kơđoh tơm kơsu vă đei lơ kơtăk noh athei hơlen lăng trong kôih ưh đei jrŭ, duh ưh kơ đơng dêh hnang; trong kôih iĕ mă lei kơtăk lĕch lơ, păng 'lơ̆ng rơgoh. 'Nguaih kơ noh, Hmin adoi hơmet pơtoi mă kơjung 'long kôih vă ăn bơngai jang yua pruih pơgang păng pik pơgang tang găn pơrang hăm tơm kơsu tơ̆ dôm hơnih tơnap mă đơ̆ng sơ̆ ưh kơ đei hơmet. Hmin jĭ bơngai đoan viên hơdruh tơdăm pơm jang hơgei păng tơnăp pơtho ăn rim bơngai lơ̆m pơm jang”.

Hơbĕch hơbal, gơh hơgei lơ̆m pơm jang adoi nhen tơdrong jang hơdruh tơdăm, dôm tơdrong tơgop đơ̆ng Kpuih HMin lơ̆m dôm sơnăm kơ ou đei dôm anih jang, dôm jăl jang pôk bơnê. Hơdah noh hơnăn “Hơdruh tơdăm gơh hơgei pơm kiơ̆ nơ̆r Ƀok Hô” tơ̆ dêh char jăl sơnăm 2023 – 2025; đei pôk hơnăn Chiên sih thi đua Kâ̆p kơ sơh lơ̆m lơ sơnăm. 'Nhŏng đei Trung ương Đoan pôk Ƀăng hmach bơnê sơnăm 2022, đei iŏk hơnăn “Tơpang ti mah” kơ Tơdrong pơlong kôih kơtak kơsu sơnăm 2024… Mă kăl, sơnăm ou, Kpuih HMin chơt hơ-iă đei rơih tang măt năm Hop akŏm Hơdruh tơdăm gơh hơgei jang kiơ̆ nơ̆r Ƀok Hô jơ̆p teh đak 'măng mă 8. Kpuih HMin tơroi: “Đơ̆ng mơ̆t jang kŏng nhơ̆n, mơ̆t jang Đoan hơdruh tơdăm CS Hồ Chí Minh păng jang Ƀĭ thư đoan kơ Anih Mir đak lar. Inh hlôi akŏm đei đoan viên vang jang lơ tơdrong 'lơ̆ng, hơlêm đon bơnôh vang pơm jang. Hơdrin pơhrăm rok kiơ̆ đon bơnôh Ƀok Hô, inh hlôi hăt hot pơm kiơ̆ tơdrong pơtho đơ̆ng Kŏng ti lơ̆m tơdrong jang kôih kơtăk kơsu, vang akŏm pơlong kŏng nhơ̆n jang hơgei păng hlôi đei Ƀăng pôk bơnê, kơdih inh tôch chơt hơ-iă. Jing đoan viên hơdruh tơdăm inh pơtoi hơdrin pơm jang tơnăp hloh, atŭm hăm đoan viên hơdruh tơdăm lơ̆m khul tơguăt tơguăl, hơdrin hŏk pơhrăm pơm jang gơh hơgei vă đei yua tơnăp hloh”.

Ƀok Trần Quang Huấn – Kan ƀô̆ Khul pơm jang kơsu Hòa Bình, Kŏng ti jang Kơsu Chư Prông ăn tơbăt, Kpuih Hmin ưh hơdrô̆ jing bơngai jang tơnăp lơ̆m tơdrong jang mă oei hăt hot vang pơgơ̆r dôm tơdrong jang. Hăm sơnong jang Ƀĭ thư chi đoan, 'nhŏng hlôi đei lơ tơdrong jang tơnăp tơgŭm đoan viên hơdruh tơdăm hơtŏk pơm jang, hơtŏk iŏk yua đơ̆ng pơgar 'long pơtăm; gơnơm thoi noh đei yua sơđơ̆ng. Atŭm hăm iŏk pơkăp vei jang pơgar kơsu đơ̆ng Kŏng ti, Kpuih Hmin oei hơtŏk jang mŭk drăm unh hnam. 'Nhŏng hlôi mong đei jên vă răt teh păng pơtăm đei jê̆ 1 ha kaphê. Ƀok Trần Quang Huấn ăn tơbăt: “Đŏng chĭ Kpuih Hmin jĭ Ƀĭ thư chi đoan tơnăp. Jĭ bơngai kon kông, tơdrong hơrih tơnap tap, mă lei pơ-'nam pơm jang, đŏng chĭ hơnơ̆ng chă hŏk hơlen vă hơtŏk pơm jang. Lơ̆m tơdrong pơm jang đŏng chĭ hơnơ̆ng yuk hơlou păng hlôi đei iŏk lơ tơmam hơpah đơ̆ng anih mir đak lar, kŏng ti păng anih jang tơm”. 

Hăm tơdrong hơdrin, hŏk hơlen ưh đei pơdơh pơdei, Kpuih HMin jĭ um ai gơh hơgei lơ̆m tơring kon pơlei kon kông tơ̆ Ia Vêr, apŭng Chư Prông (dêh char Gia Lai). Hơpơi 'meh, đơ̆ng tơdrong tơroi kơ Kpuih HMin, gô đei lơ hơdruh tơdăm, mă kăl noh hơdruh tơdăm kon kông, hơtŏk pơhrăm, pơm jang păng tơgop ăn tơdrong hơtŏk tơ-iung pơlei pơla, teh đak.

 'Nhŏng Đỗ Đức Thanh – Phŏ Ƀĭ thư kơpal anih jang đoan dêh char Gia Lai ăn tơbăt, lơ̆m dôm sơnăm kơ ou lơ̆m dêh char hlôi đei hloh 400 hơdruh tơdăm jang hơgei lơ̆m dôm tơdrong pơm jang. Lơ̆m noh, đei lơ hơdruh tơdăm tơ̆ tơring pơsĕl, bơngai kon kông tơgăl kơ pôk bơnê: "Nhôn hlôi rơih đei đe hơdruh tơdăm gơh hơgei, pơ-'nam pơm jang, găn hloh tơnap tap vă chă tơgŭm ăn trong jang xa kơ đe buăl. Atŭm hăm noh nhôn hlôi pơgơ̆r hăm dôm jăl jang Đoan, hơnơ̆ng pơtoi tơdrong akŏm jang vă vei răk tơƀăk mong um ai joh ayŏ kon kông. Noh jĭ akŏm pơlong tôn chĭng chêng, dôm cham pơhiơ̆ ăn đe hơdruh tơdăm kon kông, hơdruh tơdăm kiơ̆ dôm tơdrong khop. Kiơ̆ đơ̆ng dôm tơdrong jang noh, nhôn hlôi akŏm đei dôm tơdrong kăp gĭt gah hŏk pơhrăm păng jang kiơ̆ đon bơnôh, trong jang 'lơ̆ng Hồ Chí Minh”.