Kiơ̆ kơ ‘noh, jăl jang 2023-2025, lơ̆m dêh char hơdrin đei dơ̆ng 186 pơlei jang đang tơring tơrang ‘nao. Tơ̆ apŭng Chư Prông, lơ̆m 6 sơnăm âu ki hlôi hơvơn đei hloh 600 ti hlak jên đơ̆ng dôm tơdrong jang vă tơgep pơyua ăn pơjing Tơring tơrang ‘nao. Plei O Ngol, xăh Ia Vê jĭ 1 lơ̆m dôm pơlei jang ‘lơ̆ng, hlôi jang đang tơring tơrang ‘nao kơ apŭng.

Ƀok Siu Huỳnh-Bí thư Chi bộ pơm hloi Bơngai pơgơ̆r pơlei O Ngol ăn tơbăt, pơlei đei vă jê̆ 120 ŭnh hnam, hăm vă jê̆ 500 ‘nu, vă đĭ đăng bơngai Jarai ngăl. Gơnang đơ̆ng jang kiơ̆ tơdrong jang tơring tơrang ‘nao kơna tơdrong arih sa kon pơlei đĭ đei lơ tơplih păng kăl athei vei kơjăp dôm tơdrong hơgăt.

“Plei nhôn bơ̆jang kiơ̆ tơdrong jang pơjing tơring tơrang ‘nao, jang đei tơdrong hơgăt tơring tơrang ‘nao kơ apŭng bơih. Hăm hơnăp jang Bí thư Chi bộ pơm hloi Bơngai pơgơ̆r pơlei, ĭnh krao hơvơn kon pơlei hơdrin chĕp vei jơnei ‘lơ̆ng hơiă mă pơlei hlôi jang đei. Chơt hơiă apŭng rơih jang pơlong găh “plei tơring tơrang jang ‘lơ̆ng”, đĭ đăng kon pơlei athei hơdrin hơtŏk, mĭnh jơhngơ̆m pơm trong, man dur, pơgar hnam ‘yâu rơgoh, trong glung rơhơi hiôk. Mă kăl, plei nhôn đĭ đei ŭnh điên tơ̆k hơdăh trong pơlei hăm 34 tŏ ŭnh điên măt ‘năr. Nhôn chhôk hơiă dêh, yua kơ kon pơlei, bôl buăl tơring nai truh ngôi, bu bu kŭm pơ ư kơ plei nhôn tơ̆ kơmăng trong pơlei hơdăh ƀrach păng năm vih vơ̆t hiôk sơđơ̆ng”.