Đảng bộ tơring sơlam teh đak Rờ Kơi, apŭng Sa Thầy đei 13 chi ƀô̆ hăm 176 ‘nu đang viên, lơ̆m ou đei 6 chi ƀô̆ pơlei kon kông. Rim sơnăm ‘moi kiơ̆ trong pơtho ăn đơ̆ng Hơnih Đảng dêh char Kon Tum păng Hơnih Đảng apŭng Sa Thây, Hơnih Đảng tơring tơlĕch tơtom rim trong hŏk pơhrăm păng pơm kiơ̆ jơhngơ̆m đon ‘lơ̆ng kơ Ƀok Hô truh hăm rim Chi ƀô̆ pơlei pơla. Ƀok A Êl, kră pơlei kơ pơlei Gia Xiêng, tơbăt, ưh khan lăp hơdrô̆ 14 ‘nu đang viên lơ̆m chi ƀô̆ đei nơ̆r pơkăp hŏk pơhrăm, pơm kiơ̆ Ƀok Hô mă lei đĭ đăng kon pơlei lơ̆m pơlei jei iung jang kiơ̆ nơ̆r pơtho khan đơ̆ng Ƀok Hô lơ̆m rim tơdrong jang hơdah. Kiơ̆ đơ̆ng ƀok A Êl, tơdrong hŏk pơhrăm Ƀok Hô tơgŭm ăn đang viên đei dơ̆ng jơhngơ̆m đon hơdrin pơm jŭk yŭk trong hơlou, tơnăp hloh dơ̆ng hăm tơdrong jang păng kon pơlei pơnam chă jang sa, jang kiơ̆ ƀlep trong bơ̆ jang đơ̆ng Đảng, khôi luơ̆t Teh đak:“Đảng viên lơ̆m chi ƀô̆ hơnơ̆ng pơm jŭk yŭk trong hơlou lơ̆m rim tơdrong jang vă kon pơlei kiơ̆ yok rok jơ̆ng. Rim tơdrong jang sa kơ ŭnh hnam bơngai đang viên lơ̆m pơlei đei iŏk yua kơjăp, đang viên tơgŭm kon pơlei hơdrech ‘long pơtăm, yŏng kon tơrong vă atŏk tơ iung mŭk drăm. Kon pơlei lơ̆m pơlei pơnam jang sa, jang kiơ̆ kơjăp trong bơ̆ jang đơ̆ng Đảng, khôi luơ̆t Teh đak. Hŏk kiơ̆ Ƀok Hô, kon pơlei hŏk kiơ̆ đơ̆ng dôm tơdrong iĕ nhen oei sa rơgoh ‘lơ̆ng truh dôm tơdrong jang tih nhen tơgoăt tơgoăl dih băl kon pơlei pơla”.      

Vă lang să kơtang tơdrong hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô, 10 sơnăm ou ki, Hơnih Đảng dêh char Kon Tum hlôi tơlĕch jang kiơ̆ ‘lơ̆ng, tơ iung pơjing dôm trong jang trŏ lăp hăm tơdrong jang yan ou păng tơdrong jang chinh trĭ dêh char tơlĕch ăn rim sơnăm, rim jăl vă jang kiơ̆ hrơ̆p lei lăi, jơnei kơtang. Đơ̆ng sơnăm 2023 truh dang ei ‘noh “Hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô găh, oei sa ‘lơ̆ng, jơhngơ̆m đon tơnăp, tơgop tơ iung pơjing dêh char Kon Tum atŏk tơ iung tĕnh koăng păng kơjăp ‘lơ̆ng". Đại tá Lê Minh Chính, Kơdră chĕp pơgơ̆r bơ̆ jang Chinh trĭ Hơnih tơm chĕp pơgơ̆r Ƀô̆ đô̆i vei lăng sơlam teh đak dêh char Kon Tum, tơbăt dôm tơdrong jang hơdăh kơ hơnih jang: “Nhôn iung jang hơgrop rim ‘măng pơrô̆ pơrôp, rim tơdrong tơchơ̆t kăl nhen Tơdrong tơchơ̆t kơsô̆ 847 kơ Quân uỷ Trung ương găh iung jang kiơ̆ Jơhngơ̆m đon ‘lơ̆ng Ƀô̆ đô̆i Ƀok Hô, kơrŭn đĭ ai tang găn trong jang ưh kơ trŏ lăp lơ̆m chăl hle. ‘Măng hơvơn kiơ̆ yok rok jơ̆ng dôm tơdrong joăt joe, plang ăn jơhngơ̆m đon hơgei, tơgăl hăm hơnăn Ƀô̆ đô̆i Ƀok Hô lơ̆m chăl hle. Lơ̆m tơlĕch jang kiơ̆ atŏk kơtang bơ̆ jang dăr lăng, lăng hơlen rim hơnih Đảng, đang viên adoi tơmơ̆t jang hơdoi hloi lơ̆m tơdrong jang kiơ̆ tơdrong jang pơjao akŏm lơ̆m rim trong iung jang kơtang jang kiơ̆ tơdrong tơchơ̆t Đang ƀô̆ hlôi tơlĕch ăn”.

Jang kiơ̆ ‘măng hơvơn “Hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô, truh dang ei, dêh char Kon Tum hlôi tơ iung pơjing đei 2.760 tơdrong jang hơ iă, tơdrong jang jơnei. Mă hơdăh nhen rim trong jang: Pơgơ̆r hop akŏm tơklep hăm tơdrong hŏk pơhrăm păng pơm kiơ̆ Ƀok Hô; Hŏk kiơ̆ Ƀok Hô găh jơhngơ̆m đon ‘mêm kơ eng dih băl, tơgŭm djru dih băl atŏk tơ iung mŭk drăm-tơpôl, xut xa pơngot rơvĕt, tơjur dơnuh hin, tơ iung pơjing tơring tơrang ‘nao, vei lăng năng tông cham char rơgoh ‘lơ̆ng păng tơ iung pơjing păng atŏk kơtang tơdrong oei sa ‘lơ̆ng rŏ hơbŏ nhen,... Yă Bùi Thị Vui, Kơ iĕng Kơdră chĕp pơgơ̆r Hơnih bơ̆ jang Pơchoh trong păng Pơrô̆ pơrôp kơ Đảng dêh char Kon Tum, sơkơ̆t hơdăh.“Tơdrong tơlĕch jang kiơ̆ Nơ̆r athei jang kiơ̆ 05 hlôi sơng iŏk đei tơdrong vang iung jang kơtang đơ̆ng kang ƀô̆, đang viên, kon pơlei lơ̆m dêh char. Kiơ̆ đơ̆ng noh pơjing đei tơplih kơtang đơ̆ng jơhngơ̆m đon hlôh vao truh iung jang kiơ̆ kơ rim kơdră đảng, kơdră chĕp pơgơ̆r tơring, hơnih bơ̆ jang, tơring, khul ƀô̆ đô̆i. Trong iung bơ̆ jang kơ khul kang ƀô̆ roi năr roi gơ̆h hơgei, jơnei ‘lơ̆ng, tơjê̆ hăm kon pơlei, tơklep hăm kon pơlei hloh dơ̆ng”.

Đơ̆ng tơdrong hŏk pơhrăm păng pơm kiơ̆ jơhngơ̆m đon ‘lơ̆ng kơ Ƀok Hô, 10 sơnăm ou ki, lơ̆m dêh char Kon Tum hlôi ƀôh lơ khul, bơngai ‘lơ̆ng lơ̆m rim tơdrong jang đei pôk pơ ư, pôk hơpăh. Lơ̆m dêh char đei 17 khul, rim bơngai đei Thủ tướng Teh đak pôk ăn Hla bơar pôk bơnê; 9 khul, rim bơngai đei Hơnih bơ̆ jang Pơchoh trong Trung ương pôk ăn Hla bơar pôk bơnê... Tơdrong tơlĕch jang kiơ̆ Nơ̆r athei jang kiơ̆ kơsô̆ 5 kơ Hơnih tơm Chinh trĭ jăl XII “găh atŏk kơtang hok pơhrăm păng pơm kiơ̆ jơhngơ̆m đon ‘lơ̆ng, trong bơ̆ jang hơgei kơ Ƀok Hô” jei jing tơdrong kăl vă dêh char Kon Tum iung jang kiơ̆ jơhngơ̆m đon ‘lơ̆ng, trong jang hơgei đơ̆ng Ƀok Hô chă rơih đei dôm tơdrong jang kăl lơ̆m rim tơdrong jang kiơ̆ jơnei trong tơlĕch jang, tơdrong jang atŏk tơ iung lơ̆m 10 sơnăm ou ki.