Dôm năr blŭng khei 6 âu, tơmoi truh tơ̆ Đà Lạt, dêh char Lâm Đồng tŏk lơ. Tơ̆ dôm jăl trong lơ̆m plt nhen trong Trần Phú, dăh mă jŭm dăr dơnâu đak Hồ Xuân Hương... truh hloi tơ̆ dôm pơgar pơkao, ‘long tơter plt nhen tơ̆ Lạc Dương, Tà Nung, hơnơ̆ng đei lơ tơmoi truh ngôi. ‘Nhŏng Nguyễn Khắc Hoàng Lâm, bơngai arih xa đunh sơnăm tơ̆ phường 4, tơroi: “Truh pơyan he, plt nhôn ƀôh lơ bơngai truh tơpă. Kon pơlei Đà Lạt nhôn hơnơ̆ng chă sơng tơmoi hăm ƀơ̆r hiĕk, pơma xa chơt rơhău, tĕch bơ̆n plei ‘long rơgŏh ‘lơ̆ng kŭm hăm lơ tơdrong tơroi tôch hơiă. Kơdih kâu inh tôch ‘mĕh chă tơƀâp, pơma nuh hăm tơmoi đơ̆ng tơring hơtăih truh ‘năi, tơroi ăn đe sư dôm anih truh hui bơngai băt păng dôm anih chă tơmang lăng ‘nao ‘lơ̆ng rŏ tơ̆ tơring nhôn”.

Đơ̆ng rŏng kơ thi mât hŏk lăm 10, đei lơ hŏk tro ‘mĕh pơklăih jơhngâm đon pơngơ̆t kơ tơdrong thi, Đà Lạt roi sơng đei lơ unh hnam mă loi ‘nŏh đơ̆ng Hà Nội, Hồ Chí Minh, Vũng Tàu păng dôm dêh char tơ̆ tơring găh Pơmât. Mŏ Thùy Dương, truh đơ̆ng plt Hồ Chí Minh, ăn tơbăt: “’Măng năm mă âu, nhôn rơih năm pơdơ̆h ngôi tơ̆ 1 anih tơter dơnâu Tuyền Lâm, anih đei cham char tôch ‘lơ̆ng rŏ, hiôk sơđơ̆ng, ưh đei hrơ̆ng hreng kiơ. Mă loi, tơmam xa Đà Lạt hơnơ̆ng pơm ăn nhôn tôch lăp đon xa ƀou phu ‘lơ̆ng, hui đei. Găh noh dơ̆ng, tơdrong pơvih pơvăn tôch tơnăp, hăm kơjă lăp ‘lơ̆ng roi pơm ăn ‘măng pơdơ̆h ngôi roi chơt hơiă hlŏh dơ̆ng”.

Tơdrong hơiă đơ̆ng chă tơmang lăng tơ̆ Đà Lạt roi tŏk gơnơm đơ̆ng đon adrin đơ̆ng dôm anih jang tơ̆ tơring mưh pơm ‘nao tơmam pơvih ăn tơdrong chă tơmang lăng. Mŏ Bùi Lê Giáng Tiên, Vei lăng Dalat Edensee Lake Resort & Spa ăn tơbăt: “Nhôn tơlĕch lơ tơdrong pơvih, tơmât hơdai hăm pơdơ̆h ngôi hăm lơ tơdrong đei yoa nhen spa, tơmam xa tơ̆ anih truh mă ưh ‘nŏh dôm tour chă tơmang lăng tŏ sĕt năr tơ̆ Đà Lạt. ‘Ngoăih kơ pơdơ̆h ngôi tơmoi oei truh hăm rim tơdrong pơvih pơvăn đơ̆ng dêh char Lâm Đồng hăm kơjă tôch lăp”.

Oei ƀok Đinh Văn Dôn, Kơdră chĕp kơ̆l Công ty TNHH Chă tơmang lăng Happy Day ‘nŏh tơroi: “Nhôn oei tơlĕch lơ tơmam chă tơmang lăng ăn tơmoi, hue lăng truh tơdrong chă tơmang lăng tơ̆ anih choh jang xa, pơgar ‘long jang hăm kơmăy kơmŏk ‘nao, yoa hrei ‘nâu tơmoi tôch tơrek truh dôm tơmam choh jang xa đei, mă loi ‘nŏh chĕh phe, anih pơdơ̆h ngôi, massage păng lơ tơdrong pơvih ăn tơdrong tơmang lăng tôch hơiă nai”.

Hăm ‘năr rơngơp, cham char bri brăh ‘lơ̆ng rŏ, pơvih pơvăn ăn tơmang lăng tôch ‘lơ̆ng, plt Đà Lạt, dêh char Lâm Đồng ưh lăp sơng đei lơ tơmoi lơ̆m teh đak đĕch mă oei jing anih truh tôch hơiă đơ̆ng tơmoi lơ̆m apŭng plenh teh dơ̆ng. Ƀât blŭng pơyan pơdơh he âu, tơ̆ Đà Lạt pơgơ̆r lơ tơdrong tơƀâp, ngôi pơchơt “Tơguăt tơdrong joh ayŏ kơ dŏ xoang, jang hơdoi găh Tơmang lăng đơ̆ng Lâm Đồng păng Hàn Quốc”.

Ƀok Nguyễn Tiến Hải, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Lâm Đồng ăn tơbăt, tơdrong ‘lơ̆ng vă sơng tơmoi Hàn Quốc truh tơ̆ Lâm Đồng oei tôch lơ vă bơ̆ jang đei dôm tơdrong đei tơlĕch: “Đà Lạt - Lâm Đồng đei ‘năr tôch rơngơp, đei lơ tơdrong ngôi pơchơt, jŏh ayŏ kơ dŏ xoang tôch ‘lơ̆ng hơiă păng lơ tơdrong tơplŏng kơdâu nhen golf, hao gre tang vang tơ̆ thong, kông ăn tơmoi đơ̆ng Hàn Quốc truh lăng, pơdơ̆h ngôi”.

Oei ƀok Trần Hải Linh, Kơdră vei lăng Khul tĕch mơdro păng tơmât jên jang Việt Nam – Hàn Quốc (VKBIA) akhan, tơguăt hơdai tơdrong juăt jŏh ayŏ kơ dŏ xoang păng jang hơdoi găh tơmang lăng đơ̆ng Lâm Đồng păng dôm anih jang păih Hàn Quốc ưh lăp kăp gĭt găh mŭk drăm đĕch, mă oei tơgop hơmet kơjăp tơdrong pơvei, jang tơbôl đơ̆ng sơ̆ đơ̆ng kon pơlei 2 teh đak: "Tơ̆ hơnăp kơnh, Lâm Đồng vă tơmât hơdai hăm 3 dêh char, gơ̆h pơma ‘nâu jĭ 1 lơ̆m dôm hơyak năm tơgŭm ăn Lâm Đồng jang hơdoi păng jang tŏk ‘nao hăm dôm anih jang đơ̆ng Hàn Quốc. Mă loi jĭ lơ̆m 2 tơdrong jang tơm ‘nŏh chă tơmang lăng păng tĕch mơdro. Hrei ‘nâu, đei 35 anih jang oei jang xa găh tơmang lăng păng chông ba tơmoi đei nhôn tơmât lơ̆m tơdrong tơƀâp, vă pơm thoi yơ gơ̆h tơlĕch dôm tơdrong jang chă tơmang lăng tơ̆ Lâm Đồng tŏk pran hlŏh dơ̆ng".

Ƀlep ƀât ‘măng mă âu, bơngai tang măt ăn dôm anih jang kơ Hàn Quốc păng Việt Nam hlôi kĭ pơkăp hla ar chih tơƀlŏk jang hơdoi, pơih đei tơdrong ‘lơ̆ng vă tơmât jên jang lơ̆m dôm tơdrong nhen chă tơmang lăng pơdơ̆h ngôi, choh jang xa hăm mơ̆r, jang kơmăy pơm tơmam rơgŏh păng logistics chă tơmang lăng... Dôm anih jang kơ Hàn Quốc hơmĕng hơnơ̆ng iŏk đei tơdrong tơgŭm tôch ai găh anih jang, khul bơngai jang păng anih tơmât jên jang xa hiôk ‘lơ̆ng. VKBIA pơkăp vă pơm gơng tơƀưh, jang hơdoi tơlĕch trong tĕch mơdro, jang xa, jŏh ayŏ kơ dŏ xoang păng chă tơmang lăng kiơ̆ khei, pơm ăn Lâm Đồng jing anih tơƀưh Việt – Hàn./.