Mưh đei bơngai hlĭch truh tơ̆ hnam, klo kăn mŏ Y Nhua, plei Kon Rôn, xăh Ngọk Réo, dêh char Quãng Ngãi sơng iŏk hăm muh măt tôch kơ tơtăm. ƀơ̆t đĭ hlôh tơdrong tơm đơ̆ng bơngai chih kơtơ̆ng ang ‘meh roi tơbăt lê̆ hơdrol găh tơdrong krê hơmơt đơ̆ng ma túy, mŏ Y Nhua tơroi găh kon drŏ nglo tŏk bŏk oei phak 9 sơnăm tơ̆ hnam pơnă găh tơdrong yoch pơgơ̆r yua glăi kơchơ̆t ma túy. Khei ‘năr kon sư đei rôp, pơđĭ ŭnh hnam bơngơ̆t yua kơ tơpă yan âu jĭ jơhngơ̆m dêh. Dang ei kon drŏ nglo năm phak, mŏ mai pôk sâu brŏk tơ̆ hnam mĕ ƀă sư tơ̆ xăh nai, tơdrong hơrih sa ŭnh hnam mŏ Y Nhua tơsŭl tơsăl đĭ:

“Khải đơ̆ng ‘lơ̆p bu bu kŭm băt năr hơ yơ kŭm năm jang ưh kơ bu ê thoi noh. Ƀơ̆t năm sek tơlang sư nhơ̆m khan Mĕ hli dêh. Nhôn kŭm vă jê̆ hơngơ̆t hloi. Dang ei mir roh ưh kơ đei jơhngơ̆m tơchĕng kiơ jang”.

Plei Kon Rôn đei 236 ŭnh hnam kon pơlei hăm vă đĭ đăng ‘noh jĭ kon pơlei Xơ Đăng hơrih sa. Tơring hlôi đei sơđơ̆ng hăm lơ kơjă kăp gĭt joh ayŏ joăt joe, kon pơlei pơnăm, iơ̆m dim, dang ei tơdrong kơnê̆ đơ̆ng ma túy đei ƀôh, phă hŭt tơdrong sơđơ̆ng hiôk. Yă Y Nhĩ, vă jê̆ 60 sơnăm, ăn ưh ‘noh đĭ vă dă ƀiơ̆ kơ gleh hlat yua kơ 2 ‘nu kon ‘lŏ bơih, mă lei tơpă yan âu sa roi pơmat tat hloh ƀơ̆t kon drŏ nglo 23 sơnăm, đei rôp năm phak kron yua kơ ma tuý:

“Mĕ kŭm ưh kơ băt, ƀă kŭm ưh kơ băt. Ƀơ̆t đe rôp ưh kơ hiôk dêh. Ĭnh oei tơ̆ hnam đei jĭ tôch kơ lơ, đei huêt ap tŏk ‘meh kon brŏk hrôih. Dôm hơ ‘lơ̆p lơ̆m pơlei ‘nâu ‘nĕ kơ năm kiơ̆ trong ‘noh dơ̆ng. Athei oei tơ̆ hnam jang hăm mĕ ƀă, tơgŭm mĕ ƀă”.

Dôm tơring tơrang kơ dêh char Quảng Ngãi (Kon Tum so) đei hloh 100 ‘nu dư, hloh 600 ‘nu yua glăi kơchơ̆t ma túy păng hloh 3.300 ‘nu jâu yua glăi kơchơ̆t ma túy. ‘Nâu kŭm jing 1 lơ̆m dôm tơdrong tơm phă hŭt tơdrong sơđơ̆ng tơ̆ dôm pơlei pơla păng pơm ăn dôm tơdrong glăi tơpôl. Ƀôh hơdăh tơdrong krê hơmơt, khei 4 âu ki Anih vei lăng kon pơlei dêh char Kon Tum hlôi tơlĕch ăn Trong jang kơsô̆ 1118 găh pơjing tơdrong jang “Xăh, phường, thị trấn tơgoh ma túy” păng rim xăh tŏk bŏk tơtĕnh tơlĕch jang tơdrong jang ‘nâu.

Yă Phạm Thị Mây, hơdrol ki pơm Kơdră Anih vei lăng kon pơlei xăh Ngọk Réo, roi tơbăt, tơdrong jang ‘nâu hlôi păng tŏk bŏk đei pơtăl vă tang găn tơdrong krê hơmơt hăm pơlei pơla: “Xăh kŭm hlôi tơlĕch jang tơdrong jang pơlei ưh kơ đei ma tuý. Hơvơn rim khŭl jang, rim anih jang, grŭp tơpôl vang mơ̆t jang vă roi tơbăt krao hơvơn hơdruh tơdăm, rơioh veh hơtăih đơ̆ng ma tuý. Xăh kŭm apĭnh tơlĕch hăm anih jang kơpal hơtŏk loi dơ̆ng tơdrong jang vei lăng, jang hơdai hăm khŭl kơdră tơring băt hơdăh dôm bơngai, mă loi ‘noh jĭ dăr hơlen, pơm rơđăh păng sek phak kơtang vă dôm tơdrong glăi tĕch mơdro, pơgơ̆r, yua glăi kơchơ̆t ma tuý”.

Ma túy tŏk bŏk đei ƀôh vih tơ̆ plei, pơm ăn ơh sơ ‘ngon păng phă hŭt tơdrong sơđơ̆ng tơ̆ lơ tơring kơ dêh char Kon Tum. Dôm kơtoh đak măt đơ̆ng mĕ ƀă, dôm tơdrong phak ‘măn ăn bơngai mơlôh đei pơm glăi đơ̆ng ma túy, ‘noh jĭ nơ̆r roi tơbăt lê̆ hơdrol ăn kơ pơđĭ tơpôl. Tơdrong jang tang găn ma túy tơ̆ dôm tơring pơlei pơla Quảng Ngãi (Kon Tum so), tŏk bŏk đei tơdrong mơ̆t jang hrơ̆ch đơ̆ng rim kơdră, rim anih jang, mă lei kăl hloh dơ̆ng ‘noh jĭ đon băt kơchăng đơ̆ng rim pơlei.