Lơ̆m năr 14 păng 15/6, Hop akŏm trư̆k tuyê̆n gah tơdrong juăt jang đei tơrĕk truh tơdrong pơ-'lơ̆ng Đảng, vei lăng đơ̆ng teh đak, anih jang păng tơdrong pơm jang kơ Măt trâ̆n tôh kuôk, jơnŭm jang chinh trĭ tơ̆ xah ('nao) hlôi đei pơgơ̆r hăm jê̆ 11.000 anih chô̆ pơdah păng 1,5 triu 'nu tang măt vang akŏm. Pơma sơkơ̆t hơtuch hop akŏm, Thủ tướng Phạm Minh Chính ră hơdah, tơchơ̆t tơm hloh noh vei sơđơ̆ng rơngei hiôk hian, pơgơ̆r kơdih kơ teh đak, hơtŏk tơdrong hơrih kon pơlei.

Thủ tướng athei jơnŭm pơgơ̆r tơring tơplih đơ̆ng oei minh hơnih jing jang kơchăng hloh vă pơyua ăn kon pơlei tơnăp hloh. Atŭm hăm noh, dôm jăl pơgơ̆r tơ̆ tơring athei tơguăt kơjăp hăm tơdrong đei ƀôh, tơmơ̆ng nơ̆r tơgop đơ̆ng kon pơlei, hơtŏk năm hơlen tơ̆ tơring, sek tơlang dôm tơdrong tơhlăk tăk gah hanh chinh, tơkêng tơhlou tơtom, pơm jang tơnăp đei jơnei.