Hnam kră pơlei Kra Jăn Ha Xuyên ƀât tŏk bŏk plei Đa Tế, xăh Đạ M'Rông, apŭng Đam Rông pơyan ‘nâu hơnơ̆ng kơtơ̆ng krât krăt sơdrông pơm brai xa hla ‘long mur. 75 sơnăm, mă lei ƀok oei hơnơ̆ng năm tơ̆ mir vei lăng ‘long pơtăm, phĕ hla mur vă hiĕm sơdrông.

Hui bơngai băt kră pơlei tôch đei bưng ai tơ̆ plei Đa Tế âu, adrol sơ̆ jĭ bơngai kiơ̆ Fulro. 50 sơnăm adrol sơ̆, ƀât ‘nao 25 sơnăm, ƀok đei khul iung tơjră âu pôk pơm "Trung tá", đơ̆ng rŏng kơ ‘nŏh "Pơm yŏng khul linh Quân khu 4 trung ương", “pơm Kơdră chĕp kơ̆l dêh char Langbiang”.

Mă lei, đơ̆ng rŏng vă jê̆ 12 sơnăm arih xa ôn lơ̆m bri, ƀok chă trong vih dơ̆ng hăm tơpôl. Tơdrong băt mơnat đơ̆ng khul kơdră tơring păng tơpang ti pơyar xă vă sơng iŏk đơ̆ng kon pơlei hlôi tơgŭm ăn Kra Jăn Ha Xuyên dar dĕh vih dơ̆ng hăm pơlei, hơmet ming tơdrong arih xa, jing bơngai đei kon pơlei lui yom: “12 sơnăm hơtăih kơ kon kăn, năr ‘nâu ƀât dâu, tơning ƀât to, pơm ăn tơdrong arih pă đei drong drơ̆l. Đơ̆ng noh inh kơchăng chă trong vih. Ƀât dŏh sơ̆ inh hli đe rôp phak dêh. Mă lei vih tơ̆ pơlei, ‘măng mă blŭng tơ̆ Công an dêh char Lâm Đồng, ƀât dŏh sơ̆ ƀok Vũ Linh pơm yŏng. Tơ̆ noh đei sŏng xa ‘nhĕm bot, ‘nhot ‘lơ̆ng, ưh đei rôp phak kiơ. Bơ̆ jang roi tơbăt tôm tơdrong, đang bơih ‘nŏh Lâm Đồng pơjao inh ăn tơring Lạc Dương. Kơplăh dŏh sơ̆ kŭm đei hla ar chih đơ̆ng công an athei chă ăn Ha Xuyên tơdrong jang. Đơ̆ng rŏng kơ ‘nŏh 1 khei ‘năr, đei pơm Kơdră mặt trận xăh Đạ M’Rông, đang kơ ‘nŏh năm jang tơ̆ Anih vei lăng dơnâu đak, vei lăng đak pơyoa ăn tơdrong choh jang xa tơ̆ tơring”.

Ưh lăp hơdrô̆ ƀok Ha Xuyên đĕch, lơ bơngai adrol sơ̆ kiơ̆ Fulro đơ̆ng rŏng kơ vih dơ̆ng tă đei khul kơdră tơring tơ̆ Lâm Đồng pơjing tơdrong ‘lơ̆ng vă choh jang xa, pơm ‘lơ̆ng ăn tơdrong arih ngăl. Kiơ̆ ƀok Liêng Hót Ha Hai – Phŏ Kơdră vei lăng kon pơlei apŭng Đam Rông, đe sư đei tơgŭm lơ tơdrong nhen thoi unh hnam tơnuh, đei tŏk iŏk jên, tơgŭm ăn tơđăh ‘long, kon yŏng, man hnam kiơ̆ dôm tơdrong jang tơm kơ teh đak. Đơ̆ng bơngai dơ̆ng tơ̆ ‘ngoăih kơ tơpôl, dang ei đe sư jing bơngai đei bưng ai tih, tơguăt đĭ đăng kon pơlei, vang tơgop sut pơđĭ tơdrong juăt ưh kơ ‘lơ̆ng, akŏm jơhngâm choh jang xa:

“Adrol sơ̆, kơplăh đe sư yak trong glăi, mưh đei vih dơ̆ng tơ̆ pơlei, vih dơ̆ng hăm tơpôl ‘nŏh đe sư arih nhen thoi kon pơlei hmă đĕch. Tơdăh đe sư pơmat tat ‘nŏh đei xa yoa dôm tơdrong tơgŭm nhen thoi unh hnam tơnuh hai. Đe sư oei hơnơ̆ng đei tơrek truh, pơngơ̆t ăn tôm tơdrong, vang tơgŭm bơ̆n jên, tơđăh ‘long, kon yŏng vă choh jang xa. Đang kơ ‘nŏh pơjing tơdrong hiôk hian ăn đe sư man hnam kiơ̆ tơdrong jang tơm kơ teh đak, Tơdrong jang sut pơđĭ hnam hiăh hiok đơ̆ng Khul kơdră teh đak. Lơ̆m kơsô̆ ‘nŏh, đei 1,2 ‘nu bơngai đei bưng ai tih, đei tơpôl kon pơlei lui yom, jĭ bơngai tôch tơnăp, đei đon adrin ‘lơ̆ng lơ̆m tơdrong sut pơđĭ dôm tơdrong juăt kơtul jơdư, ưh kơ ‘lơ̆ng đơ̆ng sơ̆, pơlung băl, roi tơƀôh ăn ăn kon pơlei adrin jang xa, khŏm tŏk klăih đơ̆ng pơmat tat”.

Kŭm hăm Đam Rông, tơ̆ dôm tơring nai nhen Lạc Dương, Lâm Hà, Đức Trọng, Di Linh…, tơdrong pơih trong ăn brŏk oei hơdai hăm tơpôl hăm dôm bơngai bơ̆h ƀơm pơm glăi, vang kiơ̆ Fulro sơ̆ đei tơlĕch jang hrơ̆ch ‘lơ̆ng. Bơngai yak hơvơl trong mưh vih ưh đei jăm joă kiơ mă oei iŏk đei tơdrong tơgŭm găh pơgang, tơdrong jang xa, hnam oei, pơm ‘lơ̆ng vă gơ̆h jang tŏk nhen thoi kon pơlei nai.

Kiơ̆ Thượng tá Lê Công Duy – Công an dêh char Lâm Đồng, mă tơpă tơdrong jang tŏk tơ̆ pơlei pơla păng tơdrong pơlung, pơtho tơƀôh trong đơ̆ng tơpôl ‘nŏh jĭ tơdrong tôch gĭt kăl vang tơgop tơgŭm ăn bơngai bơ̆h ƀơm yak trong glăi vih dơ̆ng hăm tơdrong arih xa hmă, ‘lơ̆ng hơiă: “Dôm tơdrong tơgŭm vei lăng ‘lơ̆ng tơdrong arih xa tơpôl nhen tơgŭm bơ̆n pơgang, tơgŭm tơđăh ‘long, kon yŏng ưh đei rơih bơngai ‘nâu gơ̆h, bơngai to ưh, đĭ đăng lei lăi băl. Anih công an hơnơ̆ng tơƀâp đe sư păng mưh ƀôh tơdrong arih xa pơmat tat ‘nŏh kơchăng roi tơbăt ăn khul kơdră tơring vă tơlĕch trong tơgŭm ăn. Kơlih thoi noh mă đe sư gơ̆h mât oei xa hơdai ‘lơ̆ng hăm tơpôl, hăm pơlei pơla, hơđơ̆ng jơhngâm choh jang xa. Gơ̆h pơma đe sư jĭ 1 lơ̆m dôm bơngai tôch tơnăp, đei đon adrin vă vei kơjăp tơdrong sơđơ̆ng tơ̆ tơring kon kông, ưh ăn Fulro iung bơ̆ jang dơ̆ng tơ̆ Lâm Đồng”.

Mă tơpă ăn ƀôh, Lâm Đồng jĭ 1 lơ̆m dôm anih ang hơdăh tơ̆ Tây Nguyên găh tơdrong tơgŭm, pơtho hơmet jơhngâm đon, tơgŭm ăn bơngai bơ̆h ƀơm yak trong glăi vih dơ̆ng hăm tơdrong arih xa hmă. Đơ̆ng jơhngâm đon ‘lơ̆ng, băt ‘mêm mơnat đơ̆ng khul kơdră tơring păng rim tơpôl pơlei pơla hlôi pơjing đei groi teh hiôk sơđơ̆ng, ‘lơ̆ng hơiă tơ̆ bri kông – tơring mă dôm bơngai bơ̆h ƀơm yak trong glăi sơ̆ dang ei hlôi đei anih dơ̆ng kơjăp, vang tơgop ‘lơ̆ng ăn tơdrong jang tŏk kơ pơlei pơla, hơmet kơjăp tơdrong guăt 1 ƀơ̆r đon kơ đĭ đăng hơdrĕch hơdrung./.