Ah jơ pơma đam, kon pơlei tah hla hơpơi 'meh jơnŭm pơgơ̆r tơring 2 tăl dah hrôih sơđơ̆ng, pơm jang tơnăp, pơm trŏ tơdrong tơchơ̆t hơtŏk mŭk drăm – tơpôl tơ̆ tơring. Tơrĕk hloh noh, kon pơlei tah hla tơrĕk kăp gĭt truh tơdrong asong hla bar pơkăp yua teh – minh tơdrong oei đei đơ̆ng lơ sơnăm kơ ou tam mă sek tơlang keh kong.

Ƀok Phan Đình Trạc bơnê kơ dôm tơdrong tơgop đơ̆ng kon pơlei tah hla, atŭm hăm noh sơkơ̆t gô chih akŏm, pơtruh ăn dôm anih jang kơpal sek tơlang. Ƀok ră hơdah: Jơnŭm pơgơ̆r xah athei pơtho mă hơdah vă kon pơlei pơm kiơ̆ pơkăp pơm hla bar; dôm tơdrong kiơ oei lơ̆m tơdrong pơgơ̆r jang kơ po noh athei pơm keh đang hloi tơ̆ tơring, ưh đei lê̆ kon pơlei năm tơ̆ dêh char. Rim tơdrong tơhlăk tơhlĭn athei đei kang ƀô̆ xah tơroi, hơdoi pơm keh đang.