Jăl jang ou ki, Đảng ƀô̆ hlôi pơgơ̆r anih linh keh đang tơnăp dôm sơnong jang chĭnh trĭ, hơdah noh vei sơđơ̆ng hơgăt teh, vei sơđơ̆ng tơpôl tơ̆ tơring teh păng tơring đak dơsĭ. Đảng ƀô̆ pơih 10 pơhrăm gah lĭ luâ̆n chinh trĭ ăn 311 đoan viên jang hơgei, tơmơ̆t 139 đảng viên 'nao. Dôm tơdrong jang pơyua ăn tơpôl nhen “Pôk jơ̆ng oh năm hŏk tơ̆ hnam trưng”, “Kon rong Kơđông linh vei sơlam teh”, “ATM đak rơgoh tơring sơlam”… đei pơm jang tơnăp, pơyua kăp gĭt ăn kon pơlei tơ̆ tơring sơlam.

Hơnih linh adoi hơtŏk kơtang tơdrong tơroi tơbăt gah tơdrong pơgơ̆r tơring sơlam teh, hơvơn đei hloh 13.000 'nu kon pơlei vang jang. Jăl jăng 2025–2030, lơ̆m khei năr tơmơ̆t hơdai khul linh, anih linh sơkơ̆t hơdah pơtoi vei sơđơ̆ng tơring sơlam teh, pơjing anih jang đảng pran kơjăp, tơguăt hăm kon pơlei păng tơlĕch jang đei jơnei lăm “pơtho hŏk kơmăi kơsô̆” ăn kon pơlei.