Kiơ̆ tơlĕch jang, dêh char gô pơtơm Tơdrong ming man Hnam pơgang tơm apŭng plenh teh Nha Trang, ming man Hnam oei tơpôl HACOM Ocean City 1, et hơtŏk jăl trong kơdou hrenh pơtoi tơring Tu – Pơbah hăm Jăl trong kơsô̆ 1, Dơnŏk duk đak dơsĭ Cà Ná păng dơnou mong đak Sông Than. 'Nou jĭ tơdrong jang kăp gĭt hăm tơdrong hơtŏk tơ-iung pơm jang, hơvơn asong jang, pơih să tơdrong jang logistics păng sek tơlang tơdrong ưh kơ mah đak sŏ nhă ah pơyan phang.

Anih jang vei lăng kon pơlei dêh char pơjao ăn Anih jang Ming man pơgơ̆r, jang hadoi hăm rim anih jang, rim tơring păng tơ-'ngla asong jang vă keh đang hla bar pơkăp, vă vei sơđơ̆ng ăn tơdrong pơgơ̆r gơh sơđơ̆ng kăp gĭt đei yua tơnăp. Dôm tơdrong jang ou ưh hơdrô̆ pơjing tơdrong hơ-iă vă sơng kơ kuh ăn tơdrong chinh trĭ kăp gĭt, mă oei akŏm jơhngơ̆m ăn Khánh Hòa hơtŏk tơ-iung tenh păng kơjăp sơđơ̆ng lơ̆m jăl jang truh ou kơnh.