Vă pơm ‘lơ̆ng ăn ‘măng pơlong gơ̆h pơgơ̆r sơđơ̆ng ‘lơ̆ng hơiă, Anih vei lăng pơtho pơhrăm dêh char Gia Lai krao akŏm 4.500 ‘nu kăn ƀô̆, thây kô, bơngai jang vang truh hăm tơdrong pơgơ̆r pơlong. Hơdai hăm hơmet tơmam drăm, lăm pơlong, dôm hnam trưng THPT tơ̆ dêh char oei tơlĕch trong ôn hơmet ƀai, pơtâp pơlong đơ̆ng hrôih vă tơgŭm ăn hŏk tro hlôh vao, hơđơ̆ng jơhngâm mưh pơlong.

Tơdrong jang "Vang tơgŭm pơyan pơlong" tơ̆ dôm tơring kŭm đei tơlĕch ‘lơ̆ng. 2.400 ‘nu hŏk tro pơmat tat tơ̆ Gia Lai hlôi iŏk đei tơdrong tơgŭm, hăm kơsô̆ jên hlŏh 940 triu. Hơdrô̆ pơlei tơm Pleiku hlôi chih tơlĕch trong hơmet anih sŏng xa, tep pơdơ̆h ăn dôm bơngai chih măt năm pơlong kơdih kiơ̆ Tơdrong pơtho hŏk pơhrăm phổ thông 2006.