Tơ̆ hop akŏm, dôm bơngai tang măt akŏm pơma dơnuh, tơgop nơ̆r lơ̆m yan âu hơtŏk tơiung tơmang lăng tơ̆ rim tơring păng tơdrong tơroi găh hơtŏk tơiung tơdrong pran rim tơring vă pơm đei tơmam tơmang lăng ‘lơ̆ng hơiă, lơ kơ loăi. Lơ̆m noh, Phú Yên đei đak dơsĭ kơjung 189km, lơ hơnih hum, thŭng, ving, đei Anih gru groa jĭt kăl kơ teh đak hơnih tơmo kiơ̆ kơ yuan khan Đá Đĩa păng lơ hơnih gru groa jơhnơr hơrih đơ̆ng sơ̆. Đắk Lắk đei hơdrô̆ hăm tơmang lăng bri brăh, joh ayŏ, dôm pơgar cheh phe glơch glach, chơ kơi ‘lơ̆ng hơiă păng tơdrong tôn chĭng chêng Tây Nguyên. Mưh tơmơ̆t hơdai Phú Yên păng Đắk Lắk jing mĭnh, tơdrong tơklep hơdai tơdrong pran “đak dơsĭ - bri kông” sa roi jing gĭt kăl hloh.

Ƀok Đặng Hoàng Vũ, Kŏng ti Sao Mai Beach Resort, tơ̆ Phú Yên akhan, tơdrong yak vih vơ̆t đơ̆ng 2 dêh char oei pơmat tat, trong nơnăm tam mă pơm lăp tom pơting hăm ‘meh vă năm vih vơ̆t, gre chơ tơmam păng tơmoi, jing tơdrong pơgăn kăl kơ hơmet pơ ‘lơ̆ng vă dôm tơdrong pran đei tơtĕnh tơgoăt hơdai:

“Kăl athei pơm hơtŏk păng pơih să hloh vă trong năm đơ̆ng Đắk Lắk truh hăm Phú Yên păng Phú Yên truh hăm Đắk Lắk gô hiôk ‘lơ̆ng hloh, vei sơđơ̆ng đei pơvih pơvăn chơ chuĕn jơ năr hrĕnh hloh. Păng kăl athei đei tơdrong tơgoăt hơdai păng pơm đei dôm tơmam ‘lơ̆ng hơdrô̆ găh tơmang lăng, ƀôh lơ̆ng hơiă đơ̆ng 2 anih jang tơgoăt hơdai hăm băl vă pơm đei 1 um rup akŏm găh tơmang lăng, hơnhăk truh tơdrong lăng băt đei yua ‘lơ̆ng hơiă”.

Bơngai tang măt kŭm tơlĕch ăn lơ nơ̆r tơgop ƀơm truh pơjing dôm trong chă tơmang lăng, tơklep hơdai đơ̆ng 2 tơring; tơdrong jang tơgŭm dih băl vă vang pơtrŭt tơmang măng lăng hơtŏk tơiung. Ƀok Hồ Văn Tiến, Kơdră Jơnŭm vei lăng găh tơmang lăng Phú Yên roi tơbăt, lơ̆m khei ‘năr Phú Yên păng Đắk Lắk hơmet ăn tơmơ̆t hơdai, anih jang tơmang lăng 2 dêh char sa roi hơdrin lơ hloh dơ̆ng vă hơnhăk tơmang lăng jing tơdrong jang mŭk drăm tơm.

“Nhôn gô pơgơ̆r dôm tơdrong jang hơdai gĭt kăl hloh, hơtŏk loi dơ̆ng pơma dơnuh rim khŭl đơ̆ng Phú Yên păng Đắk Lắk athei lơ hloh kơ hơdrol, hơdrin đei hloh 2 ‘măng. Đei tơdrong jang tơgŭm ăn băl găh dôm tơdrong jang tơ jur kơjă trŏ lăp, tơgŭm roi tơƀôh tơmam ăn băl, jang hơdai tơroi tơbăt, roi tơƀôh păng pơtrŭt tơmang lăng, ưh khan lăp tơ̆ lơ̆m teh đak mă oei gô pơgơ̆r jang hơdai hăm teh đak đe, mă hơdrol ‘noh 2 tơring  Trung Quốc păng Hàn Quốc, jĭ 2 tơring đei tơmoi truh hăm dêh char lơ hloh.”

Mĭnh tơdrong gĭt kăl kŭm đei 2 khŭl jang pơma dơnuh, drơ̆ng nơ̆r lơ̆m ‘măng âu, ‘noh jĭ trong jang hơdai pơgơ̆r păng bơ̆jang đơ̆ng rŏng tơmơ̆t hơdai dêh char. Kiơ̆ kơ ‘noh, tơchĕng hơdrol khul jang gô tơmơ̆t hơdai đêl so găh trong pơgơ̆r, khŭl chĕp kơ̆l, bơngai jang lơ̆m khŭl păng dôm chi hội, vei sơđơ̆ng tơdrong tơmơ̆t hơdai ƀlep trong pơgơ̆r đơ̆ng kơdră chĕp kơ̆l 2 dêh char.

Yă Nguyễn Thụy Phương Hiếu, Phŏ kơdră Anih vei lăng găh Joh ayŏ, Tơplŏng kơdâu păng Tơmang lăng Đắk Lắk tơroi tơdrong jang: “Kŭm ‘meh akhan 2 khŭl jang pơjing đei trong jang hơdai hăm băl, yua kơ mưh 2 dêh char jang hơdai hăm băl, 2 anih jang hơdai hăm băl ‘noh khŭl jang kŭm gô jang hơdai păng tơlĕch bơ̆jang hloi. Khŭl jang kơ 2 tơring gô vang hơdai băl pơjing đei dôm tơmam hơdai păng lăng kăl tơmam tơmang lăng tơ̆ gơmăng. Đei dôm tơdrong tơlĕch găh trong jang tơgŭm vă anih mơdro sa hơtŏk tơiung”.

Găh trong jang pơtrŭt tơmang lăng, Khŭl jang Tơmang lăng dêh char Đắk Lắk păng Phú Yên drơ̆ng nơ̆r pơjing tơmam ‘lơ̆ng, tơmang lăng tơ̆ gơmăng, tơlĕch tơgŭm anih mơdro sa; tơdrong jang tơgŭm kơjă ăn anih mơdro sa 2 tơring vă tơklep hơdai roi tơƀôh truh 2 anih mơdro sa Hà Nội, Hồ Chí Minh păng teh đak đe....

Hơdrol ‘noh, Khŭl jang Tơmang lăng Phú Yên hlôi đei 2 năr hơlen lăng tơmam tơmang lăng, hơnih truh đơ̆ng Đắk Lắk vă kơ vă jê̆ truh pơjing tơmam tơmam lăng hơdai hăm “đak dơsĭ jơk hăm bri kông”. Khŭl jang tơmam lăng dêh char Đắk Lắk kŭm drơ̆ng nơ̆r tơlĕch jang năm hơlen lăng tơmam tơmang lăng tơ̆ Phú Yên lơ̆m tŏk bŏk giĕng 7 truh vă hơmet ăn dôm tơdrong tơm pơjing tơmam tơmang lăng lơ̆m dêh char đơ̆ng rŏng tơmơ̆t hơdai.

Hăm dôm nơ̆r pơkăp păng tơlĕch jang hơdai ƀĕnh tơdrong ‘lơ̆ng, tơdrong jang ‘nâu tơƀôh 1 hơyak gĭt kăl lơ̆m tơdrong pơtrŭt tơmang lăng Phú Yên păng Đắk Lắk hơtŏk tơiung pran kơtang păng kơjăp, pơm đei 1 tơring tơmang lăng ‘lơ̆ng hơiă hloh tơring Tŏk bŏk - Tây Nguyên păng lơ̆m la kak tơmang lăng Việt Nam tơ̆ hơnăp kơnh.