Tơ̆ pơlei tơm Gia Nghĩa, Hơnih tơm Kŏng ang iung jang hơdoi hăm Hơnih vei lăng kon pơlei dêh char Dak Nông atŭm hăm rim hơnih tơgŭm djru pơgơ̆r Pơm lêh iung jang kơtang tơ iung pơjing ming man, xut xa hnam pơgia, hnam hnăt hnot; adoi sơng iŏk kon jên păng pơjao hnam ăn kon pơlei. Yă H’Yơi (hơdrung M’nông) oei lơ̆m pơlei Ting Wel Đơm, tơring Dak Nia, pơlei tơm Gia Nghiã chơt hơ iă mưh sơng iŏk đei hnam kơjăp ‘lơ̆ng, tơbăt:“Pơđĭ lơ̆m ŭnh hnam tôch kơ čhôk ‘nă mưh đei mơ̆t oei lơ̆m hnam ‘nao. Ŭnh hnam 6 ‘nu bơngai tôch kơ čhôk, pă đei tơtăm mưh ‘mi chă hnăt hnot, kial tơhlu lơ̆m pơyan ‘mi, tŏ pơchrang, ƀruih ƀrăm lơ̆m pơyan phang bơih. Sơ̆ tim mă đei hnam ‘noh oei hnam ƀă, dang ei đei hnam bơih pă đei oei pơ gia tơ̆ noh bơih. Bơnê kơ Đảng, Teh đak, hơnih Kŏng ang hlôi tơgŭm djru nhôn.”

Pơbŭng hnam đei pơjao ăn ŭnh hnam mŏ H’Yơi să dang 50m2, tơnăr man, pơbŭng kem, drơ̆h hơkar pơnhan. Akŏp kon jên ming man ‘noh 120 triu hlak jên, lơ̆m ou 60 triu hlak jên đơ̆ng kon jên mă Hơnih tơm Kŏng ang chă hơvơn tơgŭm ăn, 20 triu hlak jên đơ̆ng kon jên jang kơ tơring, pă dôm yơ ‘noh đơ̆ng rim bơngai đei jơhngơ̆m đon ‘lơ̆ng tơgŭm păng kon jên kơ dih ŭnh hnam hai.

Trung tướng Phạm Thế Tùng - Kơ iĕng Kơdră chĕp pơgơ̆r Hơnih tơm Kŏng ang tơbăt, Hơnih tơm Kŏng ang gô hơnơ̆ng chă krao hơvơn dôm bơngai đei jơhngơ̆m đon ‘lơ̆ng vang tơgŭm djru xut xa hloh 4.400 pơbŭng hnam pơgia, hnam hnăt hnot lơ̆m teh đak, hăm kon jên dang 280 ti hlak jên. Hơdrô̆ hăm dêh char Dak Nông, Hơnih tơm Kŏng ang hlôi chă hơvơn păng pôk ăn 30 ti hlak jên vă tơgŭm djru ming man 500 pơbŭng hnam ăn ŭnh hnam dơnuh, vă jê̆ dơnuh păng ŭnh hnam đei iŏk yua ăn teh đak mơmat tat găh hnam oei. Trung tướng Phạm Thế Tùng pơma tơbăt jơhngơ̆m đon lui akhan, dôm pơbŭng hnam kơjăp ‘lơ̆ng ou gô tơgŭm ăn kon pơlei sơđơ̆ng hơrih sa.“Tôch bơnê kơ tơdrong vang iung jang hơdoi kơjăp đơ̆ng rim hơnih jang păng rim bơngai tơgŭm djru hlôi yak hơdoi hăm Hơnih tơm Kŏng ang iung jang tơdrong jang ƀĕnh ƀang tơdrong ‘lơ̆ng rŏ păng ‘mêm kơ eng dih băl ou. Ĭnh lui akhan, hăm hơnih oei ‘nao kơjăp ‘lơ̆ng, sơđơ̆ng hơrih sa, rim ŭnh hnam gô sơđơ̆ng jơhngơ̆m chă jang sa, hơnơ̆ng kơrŭn jơhngơ̆m lơ̆m tơdrong hơrin jang sa; hơdrin kơtang vang iung jang vei lăng sơđơ̆ng tơring, tơ iung pơjing tơdrong jang atŏk tơ iung mŭk drăm-tơpôl tơ̆ tơring.”

Kiơ̆ trong pơprŏ vă jang, dêh char Dak Nông gô xut xa dang 1.755 pơbŭng hnam pơgia, hnam hnăt hnot, tơgŭm djru ŭnh hnam dơnuh, vă jê̆ dơnuh, ŭnh hnam đei iŏk yua ăn teh đak păng kon pơlei kon kông lơ̆m dêh char. Jô̆ truh dang ei, dêh char hlôi jang keh đang 75% trong tơlĕch jang păng tơchĕng lăng gô jang keh đang tơdrong xut xa hnam pơgia, hnam hnăt hnot hơdrol năr 30/8 sơnăm ou.

Jang kiơ̆ tơdrong jang xut xa hnam pơgia, hnam hnăt hnot kơ yuơ Khul kơdră chĕp pơgơ̆r teh đak tơlĕch jang, Hơnih tơm Kŏng ang hlôi chă hơvơn tơ iung pơjing hloh 28.600 pơbŭng hnam păng lơ hnam hŏk, hăm akŏp kon jên hloh 1.400 ti hlak jên. Hơdrô̆ đơ̆ng blŭng sơnăm 2025 truh dang ei, khul Kŏng ang hlôi tơgop đei 362 ti hlak jên đơ̆ng jên khei vă tơ iung pơjing rơbou pơbŭng hnam ‘mêm mơnat ăn rim ŭnh hnam tơ̆ Cao Bằng păng Gia Lai.

Jô̆ truh tŏk bŏk khei 5, lơ̆m dêh char Gia Lai hlôi iung jang ming man păng hơmet dang 7.500 pơbŭng hnam pơgia, hnam hnăt hnot, jang keh đang 90% trong pơprŏ jang. Kiơ̆ chih jô̆, truh dang ei, lơ̆m dêh char Gia Lai đei 7 apŭng hlôi jang keh đang trong tơlĕch jang ‘noh: Pleiku, thĭ xah An Khê, thĭ xah Ayun Pa, rim apŭng Đak Pơ, Đức Cơ, Krông Pa păng Phú Thiện. Lơ tơring mă đơ̆ng jang tim mă keh đang trong tơlĕch jang mă lei hlôi ming man đei lơ hnam nhen apŭng Mang Yang ming man keh đang 707 pơbŭng hnam (jơnei 85%), Krông Pa 404 pơbŭng hnam (73,3%), Chư Pưh 437 pơbŭng hnam (46,5%),…

Ƀok Nguyễn Quyết Thắng, Kơdră chĕp pơgơ̆r Hơnih vei lăng kon pơlei tơring Ia Peng, apŭng Phú Thiện, dêh char Gia Lai tơbăt, hăm tơring kon kông, kon pơlei ‘meh vă đei hnam pơtăm joăt joe sơ̆ ki, kơdră tơring jei pơjing rơvơn vă kon pơlei đei hnam trŏ lăp hăm tơdrong oei sa joăt joe.“Lơ̆m khei ‘năr tơlĕch jang kiơ̆ ‘noh nhôn jei krao hơvơn rim ŭnh hnam năm vă drơ̆ng mĭnh nơ̆r găh tơdrong ming man, hơmet ming ‘noh đei mĭnh ƀar ŭnh hnam kon kông ‘noh kiơ̆ tơdrong hơpơi ‘meh vă kơ kon pơlei ‘noh hơmet ming păng pơm ‘nao hnam pơtăm kiơ̆ joăt joe. ‘Moi kiơ̆ đơ̆ng noh nhôn jei pơchoh trong ăn kon pơlei pơm hnam pơtăm ƀlep găh să, sơđơ̆ng “3 kơjăp” păng să ‘lơ̆ng”.

Lơ ŭnh hnam kon pơlei hlôi tơlĕch dơ̆ng kon jên kơ dih vă pơm hnam să ƀiơ̆ păng ming man dơ̆ng cham, dur pơgar, dôm tơdrong pơ yoa ou to. Lơ loh, truh dang ei, tơdrong jang xut xa hnam pơgia, hnam hnăt hnot tơ̆ Gia Lai hlôi tơgŭm ăn hloh 4.500 ŭnh hnam dơnuh, vă jê̆ dơnŭh sơđơ̆ng hơrih sa, adoi pơm tơplih kơtang găh pơlei pơla, hơtŏk kơtang jơhngơ̆m đon lui yom đơ̆ng kon pơlei hăm rim trong bơ̆ jang, trong jang tơgŭm djru tơpôl đơ̆ng Đảng păng Teh đak. 

Tơdrong jang xut xa hnam pơgia, hnam hnăt hnot ưh khan lăp pơjing đei pơbŭng hnam ‘lơ̆ng liĕm, kơjăp ‘lơ̆ng ăn rơbou ŭnh hnam kon pơlei dơnuh, mă oei tơƀôh hơdăh trong bơ̆ jang “kơ yuơ kon pơlei mă iung jang” đơ̆ng khul Kŏng ang kon pơlei, tơdrong vang iung jang đĭ ai đơ̆ng rim khul kơdră tơring, hơnih jang păng pơ đĭ lơ̆m tơpôl. Dôm pơbŭng hnam ‘nao ưh khan lăp tơgŭm ăn kon pơlei sơđơ̆ng hơrih sa, sơđơ̆ng atŏk tơ iung mŭk drăm, mă oei tơgop pơm tơplih ăn pơlei pơla, pơm hơtŏk jơhngơ̆m đon lui yom đơ̆ng kon pơlei hăm rim trong bơ̆ jang, trong jang tơgŭm djru tơpôl đơ̆ng Đảng, Teh đak.