Pơm kiơ̆ Khei pơm jang kơyuơ đe hơ-ioh sơnăm 2025 hăm hơnăn “Vei sơđơ̆ng bơngai jang keh đang dôm tơchơ̆t kơyuơ đe hơ-ioh”, rim anih jang kơpal lơ̆m tơring kơ dêh char Gia Lai hăt hot tơlĕch lơ tơdrong jang kăp gĭt, hăm tơchơ̆t hơ-'nhăk ăn đe hơ-ioh, mă kăl noh đe hơ-ioh tơring hơtaih yaih, hơ-ioh tơring kon kông păng đe hơ-ioh đei tơdrong hơrih tơnap tap gơh đei minh cham char hơrih xa sơđơ̆ng 'lơ̆ng păng hơtŏ hơnơ̆ng.

Dêh char Gia Lai dang ei đei jê̆ 5.000 hơ-ioh đei tơdrong hơrih tơnap tap păng hloh 95.000 hơ-ioh tŏk bŏk oei ƀơm tơdrong hơrih tơnap tap. Hăm tơdrong atŭm jơhngơ̆m đơ̆ng jơnŭm pơgơ̆r tơring, rim anih jang tơ̆ tơring, anih jang mŭk drăm păng tôm kon pơlei pơla, rim “sơnăm mơlôh” kơ dêh char tŏk bŏk hiôk hian hloh lơ̆m tơdrong hơtŏk tơ-iung tôm tơdrong.