Lơ̆m sơnăm vă jê̆ 80, mă lei ƀô̆ đô̆i so Lê Trương Thận, oei tơ̆ tơring Cư Êwi, apŭng Cư Kuin oei hơbĕch hơbal, pran jăng, gơh hơgei iŏk yua điên thoăi vă chă kơtĭt ăn kmăi tơruih đak kơdih ăn ‘long pơtăm ŭnh hnam. Tơ̆ gơmăng ƀok oei chĕp ŭnh ƀin vă chă hơpuih pơkao sâu riêng. Til pơgê hơngŭr vei lăng pơgar ‘long nhãn vă jê̆ phĕ tĕch. Ƀok Thận tơbăt, ƀok năm oei jang sa tơ̆ Dak Lăk đơ̆ng lăp 3 sao teh rang rar.Mă lei dang ei, ŭnh hnam hlôi đei 2ha, jang sa lơ̆m sơnăm vă jê̆ truh 1 ti hlak jên.“Ba jĭ bơngai ƀô̆ đô̆i kơna jang kiơ̆ jơhngơ̆m đon Ƀô̆ đô̆i Ƀok Hô, hơdrin yak hloh tơnap tap, rim ‘măng Khul ƀô̆ đô̆i so dăh mă  khul pơtrŭt choh jang sa pơgơ̆r pơih lăm ayơ ‘noh ba năm hŏk hloi, truh hloi tơdrong choh jang sa păng rong kon tơrong. Hơdrin truh dang ei hlôi đei 2ha, chă pơtăm rim ‘long pơtăm, să hloh ‘noh pơtăm ‘long sâu riêng, sơnăm ou đei plei dang 100 dơnơm, dăh mă nhen ‘long nhãn jei đei dang 5-6 tân, ‘long vải sơnăm ou hloh 50 dơnơm oei iĕ tŏk bŏk vă jê̆ plei bơih”.

Tơ̆ apŭng Cư Kuin, dêh char Dak Lăk, dôm bơngai ƀô̆ đô̆i so jang sa iŏk đei truh kơ ti hlak jên nhen ƀok Thận jei tôch kơ lơ. Ƀô̆ đô̆i so Nguyễn Trung Thành, oei tơ̆ thôn 7, tơring Ea Ning, jei mĭnh ‘nu bơngai jang sa iŏk đei hloh 1 ti hlak jên lơ̆m sơnăm đơ̆ng choh jang sa păng rong kon tơrong.“Pơbe ba rong đơ̆ng 180-220 tŏ, pă dôm yơ ‘noh pơtăm hloh 2ha chehphe, vải, tiu, sầu riêng, rong pơbe iŏk mơ̆r tuh ăn ‘long pơtăm, ‘long sa plei. Jĭ jei đơ̆ng bơngai Ƀô̆ đô̆i Ƀok Hô kơna ba ƀôh dă ƀiơ̆ ƀiơ̆ đe nai, hla ‘lơ̆ng glơng ba hla hiăh. Đunh kơ ou 2 sơnăm ba jei chă tơgŭm ăn 2 ŭnh hnam ƀô̆ đô̆i so lơ̆m thôn 7 ou 60 triu hlak jên ưh kơ iŏk jên cheh, vă đe sư rong kon tơrong, tơmơ̆t jang sa”.

‘Ngoăih rim bơngai chă tơgŭm ăn dôm bơngai mơmat tat, vă vang yak hơdoi tơgŭm djru ƀô̆ đô̆i so ŭnh hnam dơnuh păng vă jê̆ dơnuh, đơ̆ng sơnăm 2013 truh dang ei, rim khul ƀô̆ đô̆i so apŭng Cư Kuin hlôi tơgop hloh 800 triu hlak jên vă răt hloh 40 tŏ rơmo păng pơjing 8 kơsơ̆p hla bơar mong jên pôk ăn rim ŭnh hnam lơ̆m khul hơrih sa oei tơnap tap; tơ iung pơjing hơnih mong jên lơ̆m khul đei hloh 6 ti hlak jên ăn 300 ‘nu bơngai lơ̆m khul tŏk iŏk ưh kơ ăn jên cheh. Gơnơm đơ̆ng noh, truh dang ei lơ̆m apŭng lăp pă 20 ŭnh hnam ƀô̆ đô̆i so găh lơ̆m ŭnh hnam dơnuh păng vă jê̆ dơnuh.

Kiơ̆ đơ̆ng ƀok Võ Công Tường, Kơ iĕng Kơdră chĕp pơgơ̆r Khul Ƀô̆ đô̆i so apŭng Cư Kuin, lơ̆m vă jê̆ 2.900 ‘nu ƀô̆ đô̆i so tơ̆ Cư Kuin, đei hloh mĭnh poăt ‘noh ŭnh hnam pơdrŏng păng đei ƀôh. ‘Nou jing dôm bơngai kăl hloh, ‘lơ̆ng hloh lơ̆m atŏk tơ iung mŭk drăm ŭnh hnam păng vang jang rim tơdrong jang tơ̆ tơring, tơgop jơhngơ̆m, mŭk drăm ăn tơ iung pơjing tơring tơrang ‘nao.

Lơ̆m dôm sơnăm ou ki, kang ƀô̆, bơngai jang lơ̆m khul ƀô̆ đô̆i so kơ apŭng hlôi vang plang ăn hloh 10ha teh păng kơ ti hlak jên vă pơm trong nơnăm, tơgop atŭm hăm tơring pơjing rơvơn ăn kon pơlei chă yơ yak hiôk hian. Đei khul ƀô̆ đô̆i so hlôi tơgop kơ hrĕng triu hlak jên.“Rim đe ‘nhŏng oh tôch tơnăp, yŭk trong hơlou, mă kăl lơ̆m bơ̆ jang tơ iung pơjing trong choh jang sa, atŏk tơ iung jang sa. Mă đơ̆ng lơ̆m khei ‘năr ayơ, rim bôl boăl jei jang kiơ̆ ‘lơ̆ng jơhngơ̆m đon joăt joe “Ƀô̆ đô̆i Ƀok Hô”, tơ iung pơjing rim trong jang mŭk drăm hơ iă, jang sa iŏk yua kơjăp vă pơtrŭt ăn rim bơngai lơ̆m khul hơdrin jang sa păng atŏk tơ iung mŭk drăm. Mă đơ̆ng hăm tơdrong jang yă kiơ jei bơ̆ jang keh đang hơnăp jang đơ̆ng kơ dih”.

Lech đơ̆ng pơm ƀô̆ đô̆i, rim ƀô̆ đô̆i so tơ̆ Cư Kuin, dêh char Dak Lăk oei ling lang vei kơjăp jơhngơ̆m đon “Ƀô̆ đô̆i Ƀok Hô” - nuih mơng pran kơtang, hơnăp jang tơnăp, băt ‘mêm kơ eng dih băl. Lơ̆m tơdrong jang mŭk drăm, đe sư oei hơnơ̆ng jing dôm bơngai pơm jŭk yŭk trong hơlou, pơm pơdrŏ trŏ lăp, adoi pơm ăn lang să jơhngơ̆m đon tơgoăt tơgoăl pôm nơ̆r ƀơ̆r đon, ‘mêm kơ eng dih băl, tơgŭm djru dih băl lơ̆m pơlei pơla, hơrih sa gơ̆h găt băt lăng ba hăm bôl boăl.