Xah Đạ Chais, apŭng Lạc Dương, dêh char Lâm Đồng, hơtaih đơ̆ng pơlei tơm Đà Lạt pơhlom 60km kiơ̆ jăl trong 27C tơƀưh gah đak dơsĭ. Linh so Kơ Să Ha Tam, 83 sơnăm, bơngai K’ho tơ̆ thôn Tu Poh, xah Đạ Chais ăn tơbăt, lơ bơngai kon kơ pơlei pơla hlôi lôch plang dơh po tơ̆ tơring teh ou păng đei chih hơnăn tơ̆ Anih soi ƀlŏk kơ apŭng.

Ƀok ƀrơ̆k kơ jơhngơ̆m tơroi kơ dôm tơdrong đei lơ̆m khei năr oei mơlôh tơnap tap lơ̆m tơdrong rong ôn kang ƀô̆, jang tơroi tơbăt păng pŭ 'mrơ̆m truh kơdrăn tơblah: “Inh pai por 'nhot noh athei pai mă tơnăp, athei lăng unh vă hoai kơ đei 'nhui, mưh đei 'nhui noh gre păr ayăt ƀôh băt păng pơnah hloi, pai por rong linh hăp pha. Inh jang tơroi tơbăt ah sơnăm 18, 19 sơnăm, oei đe hơdruh tơdăm pơhnŏng năm jang sŭng phŏng, hli hlơt hloh noh ƀơm ƀôm B52 tơjruh jơ̆p jang. Tơbŏ dah adoi lôch ah khei năr noh bơih, ƀơ̆t doh ƀơm gre păr tơjruh ƀôm pơm 7 'nu bơngai lôch lơ̆m grŭp hloi”.

Pơ-ư pơ-ang kơ khei năr sơnăm mơlôh vang akŏm tơblah pơrơngei pơlei pơla, linh so K’Dĩnh, 82 sơnăm, bơngai K’ho, tơ̆ xah Lộc Nam, apŭng Bảo Lâm, dêh char Lâm Đồng, tơroi, tơdrong plang đơ̆ng lơ jơhnơr bơngai yuk hơlou tŏk bŏk oei tơgŭm pơlei pơla teh đak roi năr roi 'lơ̆ng rŏ hloh: “Kon pơlei vang pơm kăch mang, tơgop phe rong linh. Rim hnam đei chă tơgop phe lơ̆m kơbô̆i, krao noh kơbô̆i phe rong linh. Đon bơnôh kon pơlei noh thoi ăi truh ah năr tơblah đei jơnei hloi. Đơ̆ng năr đei iŏk rơngei noh tơdrong hơrih kon pơlei đei ƀôh tŏk ƀiơ̆, sơđơ̆ng, hơdrin pơm jang. Dang ei trong nơnăm hiôk hian hloh, kon pơlei păng teh đak atŭm pơm jang, teh đak asong pơm trong kơjăp ‘lơ̆ng, roi năr roi ‘lơ̆ng hloh. Jah vă akhan, kon pơlei dang ei hơdrô̆ akŏm lơ̆m tơdrong pơm pơdrŏng đĕch”.

50 sơnăm đơ̆ng rŏng tơblah jơnei, dôm tơring kon kông kơ dêh char Lâm Đồng adoi tơplih ƀôh hơdah. Ƀok Bon Yô Soan, Phŏ Kơdră Anih jang Măt trâ̆n tôh kuôk Việt Nam dêh char Lâm Đồng ăn tơbăt, dang ei kơsô̆ unh hnam hin dơnuh kiơ̆ pơkăp lơ̆m dêh char oei pă hơla 2%, lơ̆m noh unh hnam bơngai kon kông oei hơla 5,5%.

Iŏk yua tơdrong tơguăt tơguăl, kon pơlei kon kông tŏk bŏk oei pơtoi atŭm pơjing pơlei pơla pơdrŏng pran kơtang: “Dang ei kon pơlei hlôi băt tơplih hơdrĕch ‘long pơtăm kon tơrong, băt iŏk yua khua hŏk kih thuơ̆t lơ̆m pơm jang. Inh kơchĕng lơ̆m khei năr truh gô đei tơdrong tơplih kăp gĭt hăm kon pơlei dêh char Lâm Đồng pơma atŭm, lơ̆m noh đei kon pơlei kon kông pơma hơdrô̆”.

Tong hơnê̆ anglŏ sơnăm kơ ou, dôm tơring teh ƀôm ‘mrơ̆m sơ̆ dang ei hlôi jing tơring tơrang ‘nao hơtŏk tơ-iung. Kon pơlei kon kông tơ̆ Lâm Đồng tŏk bŏk oei lui ngeh atŭm hăm teh đak ah jăl hơtŏk tơ-iung ‘nao.