Kơdră Quốc hội Trần Thanh Mẫn tơchĕng ‘lơ̆ng jơhngâm đon tơplih ‘nao, hơnăp jang păng tơdrong đei yoa đơ̆ng bơ̆ jang, pôk pơ ư Anih pơvih ăn Quốc hội hlôi hơmet hla ar chih tơroi tôch ‘lơ̆ng, tơƀôh hơdăh hơnăp jang gĭt kăl. 6 khei âu ki jĭ khei ‘năr tôch gĭt kăl hăm lơ tơdrong tih, lơ̆m noh Quốc hội vang tơgop tôch gĭt kăl.

Đơ̆ng dang ei truh đĭ sơnăm jĭ khei ‘năr bơ̆ jang mă hơtuch kơ Quốc hội jăl XV, mă lei đei lơ tơdrong jang chinh trĭ tih, gĭt kăl ‘nŏh jĭ 2 Hop akŏm Trung ương 12 păng 13; lơ̆m noh, Hop akŏm Trung ương 12 vă pơma nuh găh trong Hơmet ming Luơ̆t teh, Luơ̆t proh hơmet hơdrol. Kơdră Quốc hội athei dôm anih jang hơnơ̆ng hơtŏk đon kơchăng, hơmet mă ‘lơ̆ng rim tơdrong vă pơvih ăn dôm hop akŏm păng ‘măng Hop akŏm Quốc hội ƀât hơtuch sơnăm.