
Hao gre choh kiơ̆ trong yâu hăk tơhnă ‘lơ̆ng, chơ ba hlŏh 2.000 tơđăh ‘long cheh phe păng 300 tơđăh ‘long mắc ca đơ̆ng pơgar ơng vă pơtăm lơ̆m teh adrol sơ̆ pơtăm ‘long điêu ưh đei xa lơ, ƀok Điểu Đi, tơ̆ plei Bu Păng 2, xăh sơlam Quảng Trực, dêh char Lâm Đồng tôch kơ hơiă. Gơnơm tơdrong tơmât jên đơ̆ng teh đak mă trong gre âu đei pơm ‘lơ̆ng, xă gơ glơng, yak tôch hiôk. Lơ anih jang, trong nơnăm đei pơm hơmet roi ‘lơ̆ng, lơ tơdrong jang tơgŭm ăn tơdrong arih xa đei tơlĕch, unh hnam ƀok Điểu Đi păng kon pơlei lơ̆m xăh kiơ̆ đơ̆ng noh jang xa kŭm roi tŏk ƀiơ̆.
“Bơnê kơ Đảng, bơnê kơ teh đak hlôi tơgŭm ăn kon pơlei đei phe xa ƀa sŏng, hơbăn ao hrŭk păng man hnam oei. Tơdrong arih xa đĭ sơđơ̆ng ‘lơ̆ng bơih, dang ei oei adrin jang tŏk mŭk drăm, kon pơlei hơnơ̆ng jang kiơ̆ trong jang đơ̆ng Đảng păng khôi luơ̆t teh đak.”

Ƀok Nguyễn Văn Anh, Kơdră vei lăng kon pơlei xăh Quảng Trực, tơroi, tơlĕch jang hơdoi lơ tơdrong, tơring akŏm jơhngâm pơtho ăn kon pơlei tơplih ming ‘long pơtăm, kon tơrong mă lăp hăm tơring tĕh, tŏ ‘mi kial. Đơ̆ng kơsô̆ jên tơmât jang kơ teh đak, hăm lơ trong jang lăp ‘lơ̆ng kŭm hăm tơdrong adrin jang tŏk đơ̆ng kon pơlei tơ̆ tơring sơlam hlôi tơjur đei unh hnam tơnuh hin tôch hrĕnh.
“Tơring hơnơ̆ng hlôh vao kơjăp, bơ̆jang ‘lơ̆ng tơdrong Tơchơ̆t đơ̆ng Hop akŏm Đảng jơ̆p tơring, kiơ̆ đơ̆ng noh tơlĕch jang hrơ̆ch ‘lơ̆ng dôm tơdrong jang, trong vă jang, tơlĕch jên jang păng hơnơ̆ng roi tơbăt, krao hơvơn kon pơlei adrin jang xa, sut pơđĭ pơngot, tơjur tơnuh hin. Khŏm bơ̆ jang vă gơ̆h jing tơring đei ƀôh, klăih đơ̆ng tơnuh hin, pơmat tat lơ̆m sơnăm 2025.”

Găh tơdrong jơnei lơ̆m hlŏh 20 sơnăm pơjing dêh char Đắk Nông (so), ƀok K’Khét Atô, sơ̆ pơm Kơdră Anih vei lăng hơdrĕch kon kông păng tơdrong lui khop ăn tơbăt, đơ̆ng sơnăm 2004 truh khei 6/2025, Đắk Nông đei Trung ương tơmât dang 2.800 ti hla jên ăn 3 tơdrong jang tơm kơ teh đak. Kŭm hăm kơsô̆ jên tŏk iŏk hlŏh 820 ti, dôm kơsô̆ jên đei tơmât jang trŏ bơngai, trŏ tơdrong jang hlôi tơgŭm ăn tơdrong jang tơjur tơnuh hin iŏk đei jơnei ‘lơ̆ng.
“Đei tơdrong pơngơ̆t đơ̆ng Đảng, Teh đak păng Quốc hội tơlĕch lơ trong tơgŭm mưh bơ̆jang 3 tơdrong jang tơm kơ teh đak tơ̆ tơring kon kông păng groi kông. Kon pơlei dôm hơdrĕch kon kông tơlĕch jơhngâm pơjei băl jang xa, hơmet pơ ‘lơ̆ng tơdrong pơmat tat, sut pơđĭ pơngot, tơjur tơnuh hin vă tơring gơ̆h klăih đơ̆ng dêh char tơnuh hin pơmat tat.”

Đơ̆ng sơnăm 2021 truh dang ei, 1 sơnăm tơring sơlam kơ dêh char Lâm Đồng (Đắk Nông adrol ki) tơjur hlŏh 3% unh hnam tơnuh păng truh ƀât blŭng sơnăm 2025, kơsô̆ unh hnam tơnuh lăp pă hlŏh 3%. Tơdrong hơnơ̆ng dơ̆ng hơdrol tơ̆ tơring Tây Nguyên păng đei măt lơ̆m grŭp dơ̆ng hơdrol kơ teh đak găh tơjur tơnuh hin, ăn ƀôh đon pơhnŏng kŭm hăm lơ trong jang đei yoa ‘lơ̆ng đơ̆ng tơring mưh tơlĕch jang dôm tơdrong jang tơm kơ teh đak, atŏk tơiung pran kơjăp tơ̆ tơring kon kông păng groi kông.
Viết bình luận