Lơ̆m dôm sơnăm âu ki, tơdrong tưk tơiung bơngai vang răt Ƀao hiêm pơgang tơ̆ dêh char Đắk Lắk đei rim anih jang kơpal tơrek truh, bơ̆ jang păng iŏk đei lơ tơdrong gĭt kăl. Sơnăm 2024, kơsô̆ bơngai vang răt ƀao hiêm pơgang đei 93,5%. Jô̆ truh đĭ khei 3/2025, đei 1.690.238 ‘nu bơngai vang răt ƀao hiêm pơgang, tŏk 19.163 ‘nu bơngai pơting hăm khei âu sơnăm 2024. Dang ei tơ̆ dêh char đei 44 hnam pơgang kĭ hla ar khăm hơmet jĭ hăm ƀao hiêm pơgang hăm Anih Ƀao hiêm tơpôl dêh char Đắk Lắk, lơ̆m noh đei 25 hnam pơgang teh đak pơjing, 19 hnam pơgang đơ̆ng kon pơlei pơjing kơdih. Kơsô̆ hnam pơgang khăm hơmet jĭ hăm ƀao hiêm pơgang tŏk hơnơ̆ng kiơ̆ sơnăm.

Khei ‘năr âu ki, dôm tơdrong đei yoa mă Ƀao hiêm pơgang hơnhăk ăn bơngai jĭ roi hơdăh ‘lơ̆ng. Mă lei mưh pơm kiơ̆ oei đei 1,2 tơdrong tam mă lăp, pơm pơmat tat ăn bơngai răt. Kiơ̆ Luơ̆t ƀao hiêm pơgang, bơngai jĭ đơ̆ng tơring ‘mĕh năm hơmet tơ̆ hnam pơgang kơpal (ưh kơ jô̆ kâp kư̆u) athei đei hnam pơgang khăm hơmet blŭng a pơm hla ar tơplih hnam pơgang ‘mơ̆i mă gơ̆h xa yoa rim tơdrong tơgŭm đơ̆ng the Ƀao hiêm pơgang. Tơdrong ‘nâu pơm pơmat tat ăn lơ bơngai jĭ păng unh hnam đe sư yoa athei hiong lơ jơ vă pơm tôm hla ar.

Mŏ Lê Thị Hạnh, tơ̆ phường Ea Tam, plt Buôn Ma Thuột, đei mĕ jĭ ung thư, hơmet tơ̆ hnam pơgang Ung bướu (plt Hồ Chí Minh) lơ sơnăm ‘nâu. Mă lei yoa anih khăm hơmet jĭ blŭng a tơ̆ Hnam pơgang đa khoa tơring Tây Nguyên, kơna rim ‘măng yă năm khăm ‘nŏh athei năm pơm hla ar apinh tơplih hnam pơgang ngăl. Mŏ Lê Thị Hạnh ăn tơbăt: “Mĕ inh jĭ ung thư đơ̆ng lơ sơnăm ‘nâu. Hơnơ̆ng 2-3 khei athei năm khăm tơ̆ Hnam pơgang tơ̆ plt Hồ Chí Minh vă hơlen năng, hơmet jĭ păng hơnơ̆ng pơm hla ar apinh tơplih hnam pơgang. Hnam hơtăih kơna yak vih vât tôch pơmat, hiong lơ jơnăr, jên hu. Mưh băt kiơ̆ tơdrong hơgăt đơ̆ng Luơ̆t Ƀao hiêm pơgang oei hơmet ming, tơdrong jĭ mĕ inh gơ̆h chơ hơmet tơpăt tơ̆ Hnam pơgang kơpal mă ưh kăl pơm hla ar tơplih hnam pơgang inh ƀôh tôch hơiă. Tôch hơiă mưh Luơ̆t Ƀao hiêm pơgang đei lơ tơdrong tơplih đei yoa ăn bơngai jĭ”.

Luơ̆t hơmet ming, chih tơmât dơ̆ng 1,2 tơdrong lơ̆m luơ̆t Ƀao hiêm pơgang chih: bơngai jĭ krê hơmơt, jĭ ưh gơ̆h hơmet gơ̆h chơ tơpăt tơ̆ hnam pơgang kơpal, anih đei kơmăy kơmŏk ‘nao khăm hơmet ‘lơ̆ng ƀiơ̆. Tơdrong ‘nâu tơgŭm ăn bơngai jĭ păng unh hnam ‘mơ ‘met đei jơnăr pơm hla ar, kăl hlŏh dơ̆ng ‘nŏh gơ̆h đei jơnăr măih vă hơmet jĭ.

Găh hơmet ming jên kla mưh khăm hơmet jĭ, Ƀao hiêm pơgang hơmĕng gô pơm lăp ƀiơ̆ lơ tơdrong đei yoa đơ̆ng bơngai răt, mă loi jĭ hăm dôm bơngai tơnuh, jang xa đei iŏk yoa tŏ sĕt, tơgŭm pơm tơjur ƀiơ̆ pơmat tat găh mŭk drăm mưh đei jĭ jăn. Jên kla ưh lăp kla tơ̆ anih kĭ khăm hơmet blŭng a đĕch mă đei kla tơ̆ rim hnam pơgang lơ̆m teh đak hloi, kla đĭ đăng 100%, oei adrol ki ‘nŏh lăp kla 80% đĕch.

Mĭnh tơdrong đei đĭ đăng bơngai jĭ tôch tơrek dơ̆ng ‘nŏh jĭ tơdrong ưh kơmăh pơgang, tơmam khăm hơmet tơ̆ dôm hnam pơgang. Tơdrong tơm ‘nŏh yoa bơ̆ jang chă bơngai răt tơƀâp lơ pơmat tat. Mă tơpă, khei ‘năr âu ki, lơ bơngai jĭ vang răt ƀao hiêm pơgang mă lei athei tơlĕch jên răt pơgang kơdih. Tơdrong ‘nâu pơm ăn bơngai răt tôch tơtŏ đon. Luơ̆t hơmet ming, chih tơmât dơ̆ng 1,2 tơdrong chih hơdăh: tơdăh ƀak si chih hla ar pơgang đei lơ̆m hơnăn ƀao hiêm mă lei kơ plăh dŏh hnam pơgang ưh pă đei pơgang, bơngai jĭ athei răt pơgang tơ̆ ‘ngoiăh ‘nŏh ƀao hiêm athei pơdreu dơ̆ng jên răt ăn bơngai jĭ mưh đei tôm hla ar pơgang đơ̆ng ƀak si chih păng hla ar răt pơgang đei lơ̆m hơnăn pơgang ƀao hiêm.

‘Ngoăih kơ ‘nŏh, Luơ̆t Ƀao hiêm pơgang đei chih hơmet ming chih hơdăh bơngai athei răt Ƀao hiêm pơgang ‘nŏh jĭ bơngai jang pơgang tơ̆ pơlei, bơngai hiŏng nge rơneh, khul vang vei lăng sơđơ̆ng tơ̆ tơring, bơngai đơ̆ng 75 sơnăm tŏk tơ̆ kơpal oei xa jên tơgŭm rim khei, bơngai tôm đơ̆ng 70 sơnăm truh hơla kơ 75 sơnăm găh dôm unh hnam vă jê̆ tơnuh oei xa jên tơgŭm rim khei… Dôm tơdrong tơplih ming âu lăp hăm yăn âu, atŭm hăm ‘nŏh pơm ‘lơ̆ng tơdrong đei yoa tôch ai ăn bơngai răt ƀao hiêm pơgang, pơjing đon lui ăn bơngai jĭ hăm dôm tơdrong tơgŭm đơ̆ng Đảng, Teh đak.

Ƀok Trịnh Văn Hùng (69 sơnăm, tơ̆ phường Ea Tam, plt BMT) tôch hơiă mưh băt Luơ̆t Ƀao hiêm pơgang đei tơrek truh lơ ƀiơ̆ hăm tơdrong vei lăng jơhngâm pran ăn bơ ngai kră: “Adrol sơ̆, tơdrong khăm hơmet jĭ hăm kơmăy kơmŏk, pơgang ‘lơ̆ng đa tơƀâp lơ pơmat tat yoa tơdrong ưh gan lăp đei chih lơ̆m tơdrong đei yoa đơ̆ng Ƀao hiêm pơgang. Dang ei luơ̆t ‘nao, nhôn đei dơ̆ng tơdrong ‘lơ̆ng vă vei lăng jơhngâm pran ‘lơ̆ng ƀiơ̆, mă loi truh âu kơnh Ƀao hiêm pơgang vă kla hloi jên khăm hơmet tơ̆ hnam. Dôm bơngai kră nhen inh ưh kăl năm tơ̆ hnam pơgang mă lei oei đei khăm hơlen jơhngâm pran ‘lơ̆ng đĕch”.

Lơ nơ̆r pơma ‘lơ̆ng đơ̆ng bơngai jĭ tơ̆ hơnăp tơdrong tơroi chih hơmet ming 1,2 tơdrong lơ̆m Luơ̆t Ƀao hiêm pơgang đei yoa đơ̆ng ‘năr 1/7/2025 ăn ƀôh, trong jang ‘nâu tôch lăp đon kon pơlei, hơmĕng gô tơgop pơm hơtŏk tơdrong arih xa, hơtŏk tơdrong hơtŏ băl mưh khăm hơmet jĭ păng vei lăng ‘lơ̆ng tơdrong arih xa tơpôl./.

Pơm tơdrong hiôk vă kon pơlei khăm hơmet jĭ hăm Ƀao hiêm pơgang

Tơdrong hơmet ming Luơ̆t ƀao hiêm pơgang 2024 gô hơmet pơ ‘lơ̆ng dôm tơdrong ưh kơ ‘lơ̆ng hlôi đei lăng ƀôh, yak truh tơdrong hơgăt pơm tơdrong hiôk ‘lơ̆ng hloh, vei sơđơ̆ng tơdrong đei yua ‘lơ̆ng hloh ăn bơngai răt ƀao hiêm pơgang... Vă kơ kon pơlei băt hơdăh dôm tơdrong hơgăt ‘nao, tơdrong đei yua mưh khăm hơmet jĭ hăm ƀao hiêm pơgang đơ̆ng ‘năr 1/7/2025, yă Đàm Thị Thanh Quế, Phŏ Kơdră vei lăng Ƀao hiêm tơpôl dêh char Đắk Lắk gô roi tơbăt rơđăh hloh.

- Luơ̆t hơmet ming, tơmơ̆t dơ̆ng 1,2 hơpăng đơ̆ng Luơ̆t Ƀao hiêm pơgang yak truh hơtŏk tơdrong đei yua ăn kon pơlei thoi yơ, hă yă?

Yă Đàm Thị Thanh Quế: Luơ̆t Ƀao hiêm pơgang hơmet ming, tơmơ̆t dơ̆ng sơnăm 2024 đei Quốc hội pơdrơ̆ng kiơ̆ ‘năr 27/11/2024 păng đei tơmơ̆t bơ̆jang kiơ̆ đơ̆ng ‘năr 01/7/2025 đei tơplih lơ vă pơih să tơdrong đei yua kŭm nhen tơdrong đei vei lăng đơ̆ng anih mong jên Ƀao hiêm tơpôl jơ̆p lơ̆m teh đak. Lơ̆m noh, dôm tơdrong tơm đei bơngai yua ƀao hiêm tôch kơ bơngơ̆t truh ‘noh jĭ tơdrong đei gơh yua kŭm nhen kơsô̆ sa yua mưh năm khăm hơmet jĭ hăm Ƀao hiêm pơgang.

Luơ̆t ƀao hiêm pơgang ‘nao pơih să hơnăn pơvih pơvăn pơgang đei anih mong jên Ƀao hiêm pơgang kla ăn, tơgŭm ăn bơngai jĭ gơh yua tơdrong pơvih pơvăn ‘lơ̆ng mă hơdrol sơ̆ tam đei. Kăl kơ lăng truh ‘noh jĭ hăm dôm bơngai đei jĭ hui tơƀơ̆p dăh mă đei jĭ hơmet ưh kơklăih gơh hơmet hăm kơmăy kơ mŏk ‘nao tơ̆ dôm hnam pơgang kơpal mă ưh kơ kăl athei pơm kiơ̆ tơdrong hơgăt găh chơ tơplih tơ̆ hnam pơgang kơpal nhen hơdrol sơ̆. Tơdrong ‘nâu hlôi tơgŭm pơm kơđeh jơ năr gơh băt vă hơmet păng hơtŏk ‘lơ̆ng vei lăng pơgang. ‘Ngoăih kơ ‘noh, Luơ̆t ‘nao kŭm tơmơ̆t dơ̆ng 1,2 ‘nu bơ ngai gơh sa yua 100% jên mưh khăm hơmet jĭ tơ̆ dôm hơnih pơm hla ar khăm hơmet jĭ blŭng a tơ̆ jơ̆p lơ̆m teh đak. Mă 2 ‘noh jĭ kla pơđĭ jên hơmet ƀĭch tơ̆ hnam pơgang kĭ hla ar pơkăp khăm hơmet jĭ hmă lơ̆m teh đak. Đei sa yua pơđĭ jên kiơ̆ kơsô̆ sa yua mưh khăm hơmet jĭ đei ƀao hiêm pơgang tơ̆ dôm hnam pơgang tơdăh băt hơdăh hơdrol ‘năr 01/01/2025 hnam pơgang ‘nâu hnam pơgang apŭng.

Hăm bơngai kon kông, ŭnh hnam dơnuh hin tŏk bŏk hơrih sa tơ̆ tơring đei mŭk drăm tơpôl mơmat tat dăh mă tôch kơ mơmat tat, kon pơlei oei tơ̆ tơring achon gô đei kla pơđĭ jên khăm hơmet jĭ tơ̆ hnam pơgang tih.

Hơdrô̆ hăm dôm bơngai jĭ hui kơ tơƀơ̆p, jĭ hơmet ưh kơ kĕ klăih kăl kơ hơmet, răih ‘noh jên mong Ƀao hiêm pơgang gô kla pơđĭ jên hăm kơsô̆ sa yua kiơ̆ tơdrong hơgăt mưh hơmet tơ̆ hnam pơgang kơpal. Pơm tơdrong hiôk ăn bơngai jĭ gơh hơmet tơ̆ rim hnam pơgang tih păng ưh kơ tơƀơ̆p tơdrong pơgăn găh jên hu.

Hăm Luơ̆t ‘nao, 1 tơdrong kăl kơ lăng truh dơ̆ng ‘noh jĭ tơdrong đei yua hơmet găh măt piơng kŭm đei hơmet ming. Hơdrol sơ̆, jên mong ƀao hiêm pơgang lăp tơgŭm ăn hơioh hơla kơ 6 sơnăm, truh dang ei hlôi hơmet ming pơih să bơngai gơh sa yua tơdrong đei yua âu tơgŭm ăn lơ bơngai gơh yua pơvih pơvăn pơgang kăl hloh.

-  Luơ̆t hơmet ming, tơmơ̆t dơ̆ng 1,2 hơpăng đơ̆ng Luơ̆t Ƀao hiêm pơgang đei lơ tơdrong tơplih, lơ̆m noh đei tơdrong pơm hla ar khăm hơmet jĭ hăm Ƀao hiêm pơgang đei pơm ƀônh, kon pơlei ưh kơ kăl tơƀôh theh Ƀao hiêm pơgang hla ar. Apĭnh ih roi tơbăt rơđăh hloh găh tơdrong kơtơ̆ng ang âu lăng?

Yă Đàm Thị Thanh Quế:  Vă tơgop bơ̆jang kiơ̆ ‘lơ̆ng tơdrong jang iŏk yua hla ar chih răk măt kon pơlei, hơnăn păng hơlen lăng băt hăm điện tử vă pơyua ăn tơplih kơsô̆ teh đak. Vă hơtŏk loi dơ̆ng hơmet ming hla ar, pơm ƀônh rim hla ar, tơ jur hla ar hô sơ, tơ jur jơ năr păng jên mưh năm khăm hơmet jĭ. Bơ̆jang kiơ̆ trong jang tơgŭm đơ̆ng anih jang Ƀao hiêm tơpôl Việt Nam, ƀao hiêm tơpôl dêh char Đắk Lắk gô pơdơh in theh Ƀao hiêm pơgang hla ar jô̆ đơ̆ng ‘năr 1/6/2025. Dôm bơngai yua ƀao hiêm pơgang mưh năm khăm hơmet jĭ gô hơnơ̆ng yua theh Ƀao hiêm pơgang hla ar hlôi tơplih hơdrol ‘noh dăh mă yua kăn kươk kon pơlei đei pơklep chip dăh mă yua rup theh ƀao hiêm lơ̆m iŏk yua VssID (Ƀao hiêm tơpôl kơsô̆) dăh mă iŏk yua VneID tơƀôh mưh khăm hơmet jĭ. Lăp pơm kiơ̆ in theh Ƀao hiêm pơgang hla ar hăm dôm bơngai ưh kơ gơh tăh tơmơ̆t iŏk yua VssID dăh mă iŏk yua VneID dăh mă ưh kơ đei kăn kươk kon pơlei pơklep chip.

Hăm dôm bơngai tơƀơ̆p mơmat tat, tơhlăk tăk lơ̆m kơplăh pơm tơmơ̆t VssID (ƀao hiêm tơpôl kơsô̆) athei pơma dơnuh hăm anih jang ƀao hiêm tơpôl jê̆ hloh vă gơh tơgŭm pơm kiơ̆.

-  Tơ̆ hơnăp kơnh, vă pơm hiôk kŭm nhen vei sơđơ̆ng tơdrong gơh đei yua ăn bơngai đei ƀao hiêm pơgang, anih jang ƀao hiêm tơpôl đei dôm trong jang kiơ hă yă?

Yă Đàm Thị Thanh Quế: Khei ‘năr âu ki, tơdrong jang hơtŏk tơiung Ƀao hiêm pơgang lơ̆m dêh char Đắk Lắk ling lang iŏk đei tơdrong bơngơ̆t truh, chĕp kơ̆l, pơgơ̆r đơ̆ng Ƀao hiêm tơpôl Việt Nam, đơ̆ng Anih jang Đảng dêh char, Jơnŭm pơgơ̆r kon pơlei, Anih vei lăng kon pơlei dêh char Đắk Lắk păng đei tơdrong jang hơdai kơjăp đơ̆ng dôm anih jang kơpal păng dôm anih chih kơtơ̆ng ang. Tơ̆ hơnăp kơnh, vă pơm tơdrong hiôk ăn bơngai răt ƀao hiêm, anih jang Ƀao hiêm tơpôl dêh char Đắk Lắk kŭm tơlĕch ăn 1, 2 trong jang: ‘noh jĭ athei đei tơdrong mơ̆t jang đơ̆ng rim kơdră Đảng păng kơdră tơring, ‘nâu jĭ tơdrong tơm tơchơ̆t truh đei yua tơlĕch jang kiơ̆ trong jang tơgŭm Ƀao hiêm tơpôl, Ƀao hiêm pơgang lơ̆m tơring. Kiơ̆ kơ ‘noh, anih jang Ƀao hiêm tơpôl dêh char Đắk Lắk gô pơgơ̆r lơ khŭl bơ̆jang kơtă hăm rim tơring vă hơlen lăng tơdrong jang iŏk, tơ jur hre păng tơdrong jang hơtŏk tơiung bơngai kŭm nhen hơlen lăng dơ̆ng tơdrong mơmat tat, tơhlăk tăk lơ̆m kơplăh bơ̆jang kiơ̆ vă đơ̆ng noh tơlĕch ăn dôm trong jang tơtom, kơtang vă jang đang ‘lơ̆ng dôm hơnăp jang sơnăm 2025. Đang kơ ‘noh jĭ tŭn pran tơdrong jang tơroi tơbăt dôm trong jang tơgŭm Ƀao hiêm tơpôl, Ƀao hiêm pơgang. Lăng kăl trong jang tơroi tơbăt nhen pơgơ̆r hop akŏm tơroi tơbăt, pơma dơnuh, lăng kăl tơroi tơbăt kiơ̆ dôm kơmăy tơroi tơbăt nhen hơnih tơroi tơbăt điện tử ƀao hiêm dêh char, mạng tơpôl nhen bơ̆n fanpage focebook, zalo dăh mă kiơ̆ kơsô̆ điên thoăi pơtho tơƀôh tơgŭm đơ̆ng Ƀao hiêm tơpôl dêh char.

- Lei ah bơnê kơ ih găh dôm tơdrong roi tơbăt âu hơ!