Jơnŭm kơchơ OCOP tơring Đông Bắc tôch hơiă hăm hlŏh 250 kơdeng tơmam, pơdă tĕch lơ tơmam OCOP păng tơmam đơ̆ng choh jang, ka hơdang kơ dêh char Quảng Ninh păng lơ dêh char, plt lơ̆m teh đak. Oei chă lăng ngôi lơ kơdeng tơmam, mŏ Mai Chi, ăn tơbăt: "Rim ‘măng pơgơ̆r kơchơ, inh ƀôh lơ tơmam, kơƀi tăh roi ‘lơ̆ng ƀiơ̆, dôm tơmam roi đunh roi lơ, lơ kơdeng tơmam ‘lơ̆ng ƀiơ̆ ngăl." 

Đei đon tơchĕng lei lăi hăm mŏ Mai Chi, ‘nhŏng Lê Thế Trung, ăn tơbăt: hrei ‘nâu rim anih siêu thị hơnơ̆ng đei kơdeng pơdă tĕch tơmam OCOP, đơ̆ng ‘nhot, ƀum, plei ‘long rơgŏh, tơmam xa rơgŏh truh dôm tơmam yoa kăl đei chih hơdăh anih jang, đei pơklĕp mã QR..., kơna bơngai răt tôch hơđơ̆ng jơhngâm mưh răt: "Adrol sơ̆, đơ̆ng tơmam yoa kăl truh tơmam xa pơm hăm kơmăy, hnam nhôn chă răt đơ̆ng teh đak đe ngăl. Hrei ‘nâu tơ̆ anih tĕch mơdro tơmam OCOP tơmam jang đei lơ̆m teh đak yoa yă tĕch lăp, ‘lơ̆ng, đei chih hơdăh anih jang đei kơna inh đa rơih răt. Mă loi jĭ dôm tơmam yoa kăl tôch hơđơ̆ng jơhngâm mưh răt vă pơyoa ăn tơdrong arih xa lơ̆m unh hnam."

Đơ̆ng tơlĕch tơdrong krao hơvơn bơngai Việt Nam răt yoa tơmam Việt Nam, truh dang ei, tơmam OCOP hlôi pơm ăn lơ bơngai chă răt yoa tơmam roi ‘lơ̆ng, kơƀi tăh kŭm ‘lơ̆ng ‘năi. Tơmam OCOP hlôi đei măt tơ̆ rim anih siêu thị tih iĕ păng tơ̆ rim anih tĕch mơdro. Atŏk tơiung tơmam OCOP ưh lăp hơtŏk tơdrong ‘lơ̆ng ăn tơmam đĕch mă oei tơgŭm ăn rim bơngai, unh hnam tĕch mơdro đei dơ̆ng đon hlôh vao, đon jang tơnăp hăm dôm tơmam mưh hơnhăk tĕch mơdro. Đơ̆ng noh tơplih đon tơchĕng đơ̆ng choh jang xa jing pơm tơlĕch tơmam, mât hơdai hăm apŭng plenh teh.

HTX Măng Đen Forest, apŭng Kon Plông, dêh char Kon Tum jĭ 1 pơtih gia găh tơdrong pơm hơtŏk tơmam OCOP ‘lơ̆ng, pơjing hơnăn tơmam đei hơdrô̆ tơ̆ tơring. Rim sơnăm, HTX jang đei hlŏh 100 tấn cheh phe arabica. 5 kơloăi tơmam chĕh phe đei ot, pơm hơmet iŏk đei hơnăn tơmam OCOP 3 truh 4 sơ nglŏng kŭm đei tĕch mơdro tôch ‘lơ̆ng tơ̆ anih tĕch mơdro lơ̆m teh đak.

‘Nhŏng Lê Nhật Tiến, Phŏ Kơdră vei lăng HTX, ăn tơbăt: "Trong jang OCOP tôch hơiă yoa sư tơgŭm ăn HTX đei trong jang pơm tơlĕch tơmam đơ̆ng blŭng truh tơ̆ hơnhăk tĕch tơ̆ ‘ngoăih vă pơm thoi yơ gơ̆h jang đei tơmam ‘lơ̆ng hlŏh. ‘Ngoăih kơ 25 ha HTX oei pơtăm ‘nao păng vei rong, nhôn oei pơih xă tơring pơtăm dơ̆ng, ƀât măt dang ei ‘nŏh kĭ hla ar răt tơmam hăm dôm unh hnam kon pơlei."

Yă Lê Thùy Kim Loan, Kơdră chĕp kơ̆l Công ty jang hơdoi Pyloherb, anih jang đei 15 hơnăn tơmam OCOP kơ dêh char Kon Tum găh pơgang, ăn tơbăt: "OCOP jĭ tơmam tơƀôh hơdăh tơdrong ‘lơ̆ng đơ̆ng tơring groi kông kơjung. Ba kư̆ jang kiơ̆ tơdrong hơgăt OCOP ‘noh gơ̆h ƀôh tơmam bơ̆n đei tơdrong ‘lơ̆ng pha kơ đe bơih. Hơdrô̆ tem OCOP đei ƀơk tơ̆ dêh char sư tơƀôh hơdăh tơdrong ‘lơ̆ng đơ̆ng tơmam bơih."

Kiơ̆ Tiến sĩ Nguyễn Ngọc Tuyên, Kơdră vei lăng Anih tơchĕng trong jang mŭk drăm păng vei lăng Tây Nguyên, mưh đei hla ar OCOP vă akhan hlôi pơjing đei hơnăn tơmam păng đei bơngai răt tơmam băt truh. Yoa thoi noh, dôm anih tĕch mơdro athei hơnơ̆ng tơplih ming trong jang păng tĕch tơmam lơ̆m chăl jang hăm kơmăy kơmŏk ‘nao âu: "Tơdrong chih tơbăt sơnglŏng ăn dôm tơmam OCOP ‘nŏh jĭ hla ar vă tĕch tơmam đĕch ưh kơsĭ hơnăn tơmam ‘lơ̆ng ôh, hơnăn tơmam ‘lơ̆ng jĭ đon lui đơ̆ng bơngai răt. Mưh đei hla ar tĕch bơih athei hơnơ̆ng roi tơbăt tơmam ‘lơ̆ng vă tơƀôh hơnăn tơmam ‘lơ̆ng đơ̆ng kơdih, thoi noh kơplăh âu kơnh tơmam gơ̆h roi ‘lơ̆ng. ‘Ngoăih kơ ‘nŏh, tơgĕch iŏk yoa kơmăy kơmok vă jang xa ‘lơ̆ng hlŏh dơ̆ng kơpăh chăl dang ei."

Đei yoa đơ̆ng tơdrong jang OCOP tơgŭm tưk tơiung đei tơdrong pran ‘lơ̆ng ăn dôm tơmam tơ̆ tơring, vang tơgop hơmet ming anih choh jang xa tơklep hăm atŏk tơiung tơdrong jang kơmăy păng chă tơmang lăng tơ̆ tơring tơrang. Đon lui đơ̆ng bơngai răt hăm tơmam OCOP Việt ăn ƀôh dôm tơmam Việt roi đunh roi đei anih dơ̆ng kơjăp tơ̆ anih tĕch mơdro lơ̆m teh đak, vang tơgop tưk tơiung mŭk drăm tŏk pran ‘lơ̆ng.