Lơ̆m Khei ‘Mêm mơnat sơnăm 2025 đei pơgơ̆r đơ̆ng ‘năr 1/3 păng pơtôch lơ̆m ‘năr 31/5, Jơnŭm ‘long pơglang ƀrê dêh char Kon Tum tơlĕch ăn tơdrong hơgăt krao hơvơn tŏ sĕt hloh 4 ti hlak jên ‘noh đei jên măt, tơmam păng ‘moi kiơ̆ dôm nơ̆r pơkăp, drơ̆ng nơ̆r tơgŭm vă tơgŭm dôm bơngai đei tơdrong hơrih sa mơmat tat.

Hơdai hăm chă tơra tơgŭm dôm bơngai mơmat tat, Khei ‘Mêm mơnat sơnăm 2025, dôm kơdră Jơnŭm ‘long pơglang ƀrê dêh char Kon Tum kŭm gô pơgơ̆r lơ tơdrong jang ‘mêm mơnat hue lăng găh tơring kon pơlei kon kông, tơring kăn kư̆ kach mang, tơring sơlam, năm ngôi asong tơmam ăn dôm ŭnh hnam đei kŏng hăm kach mang, khăm jĭ, asong đĕch pơgang ăn bơngai dơnuh, man hnam ‘Long pơglang ƀrê.