Dôm năr pơdơ̆h lêh, ƀok Phạm Xuân Hương atŭm hăm rim ŭnh hnam kon pơle lơ̆m pơlei O Sơr, tơring Ia Kênh, pơlei tơm Pleiku dêh char Gia Lai jei hơnơ̆ng năm dăr joang lăng bri iŏk vei lăng đơ̆ng Hơnih vei lăng năng tông bri Bắc Biển Hồ. Ƀok tơbăt:“Jang kiơ̆ tơdrong jang ‘noh dôm ŭnh hnam iŏk vei lăng bri hlôi atŏk hơnăp jang. Mă blŭng hŏk pơhrăm găh khôi luơ̆t atok tơ iung vei lăng bri, jang kiơ̆ tơdrong vei lăng bri rim năr. Mă kăl lăng kơjăp chă pơtho khan ăn kon pơlei, rim ŭnh hnam jang mir tăp dăr bri vei lăng vă hoei chă soh, chă koh, bơbĭt iŏk teh bri”.

Hơnih vei lăng bri Bắc Biển Hồ tŏk bŏk vei lăng hloh 9.000 ha bri, đơ̆ng rim apŭng Chư Păh, Ia Grai, Đăk Đoa păng pơlei tơm Pleiku. Lơ̆m pơyan tŏ phang, đĭ đăng khul bơ̆ jang hlôi iung jang dăr joang hơnơ̆ng tơ̆ dôm bro bri hơmơt ŭnh sa kơtang. Ƀok Nguyễn Tất Thành-Kơdră chĕp pơgơ̆r Hơnih vei lăng bri Bắc Biển Hồ tơbăt.“Đơ̆ng blŭng pơyan phang hơnih hlôi chong choh tơnglăng vă tang găn ŭnh sa bri, soh hơdrol mưh đei rơvơn, hơnih hlôi hop akŏm păng tơlĕch ăn đĭ đăng khul jang vang vei lăng bri. Lơ̆m pơyan phang anih hlôi ăn dơ̆ng 5 khul vei lăng tơ̆ rim bro bri ‘long pơtăm ‘noh pơ đĭ khul vei lăng bri kơ hơnih păng rim ŭnh hnam iŏk vei lăng vă tơplih dih băl vei lăng vă ƀôh tơtom hơmet pơ ‘lơ̆ng kiơ̆ trong 4 kơtă”

Lơ̆m dêh char Gia Lai đei 286 tơring hơmơt ŭnh sa kơtang, kơtang mă V, hăm hơgăt teh bri să hloh 124.000 ha, găh să bri ‘long pơtăm, bri ‘long kơdrơ̆ng. Ƀok Trương Văn Nam, Kơdră chĕp pơgơ̆r Hơnih tơm vei lăng bri dêh char Gia Lai tơbăt.“Hơnih tơm vei lăng bri dêh char jang hơdoi hăm Kŏng ang dêh char pơjing trong jang năm pơtrui dăr joang chă pơrô̆ athei 17 apŭng, thĭ xah, pơlei tơm găh bơ̆ jang tang găn pĭt ŭnh sa. Rim tơ-‘ngla bri hlôi iung jang tang găn hơlou nhen soh hơdrol lơ̆m jơ ‘năr rơvơn vă dă ƀiơ̆ hơmơt ŭnh sa bri”.