Dôm kơting lĭnh đei Khŭl K52 (Anih tơm pơgơ̆r Khŭl lĭnh dêh char Gia Lai) tơchă, akŏm lơ̆m pơyan tŏ sơnăm 2024 - 2025 tơ̆ 3 dêh char Hơlĕch Tu teh đak Campuchia. Jô̆ truh dang ei, Khŭl K52 hlôi akŏm păng chơ vih tơ̆ teh đak đei akŏm 1.512 kơting lĭnh lôch dŏng teh, tơƀôh tơdrong hơdrin ưh kơ pơdơh lơ̆m tơdrong jang ƀlŏk hơdơ̆r kơ dôm bơngai hlôi hŭt hơkâu yua kơ tơdrong jang apŭng plĕnh teh gĭt kăl.

Jơ pơm lêh pơgơ̆r tih păng ƀrơ̆k kơ jơhngơ̆m, đei tơdrong vang akŏm đơ̆ng kơdră chĕp kơ̆l dêh char Gia Lai, dêh char Preah Vihear, tang măt khŭl lĭnh teh đak Campuchia, dôm anih jang, khŭl grŭp, khŭl lĭnh tơring, kŭm hăm lơ lap kon pơlei. Dôm bơngai tang măt hlôi soh nhang, dan pơkao, tơƀôh jơhngơ̆m đon băt bơnê gĭt kăl tơ̆ hơnăp tơdrong hŭt hơkâu nuih mơng đơ̆ng bơngai kon gơh hơgei kơ Teh đak yua kơ tơdrong rơngei păng tơdrong ‘mêm tơbôl đơ̆ng hơdrĕch hơdrŭng Việt Nam - Campuchia.