
Đơ̆ng rŏng lêh sơng, kơdră 2 teh đak pơtơm pơma đam lơ̆m tơdrong hơ-iă lui ngeh hăm dih băl. Ƀar pah pơma đam gah tơdrong đei ƀôh kơ rim teh đak, pơma đam sơkơ̆t trong jang tih păng dôm trong pơm jang hơdah vă hơtŏk jang hơdoi kơ 2 teh đak lơ̆m khei năr truh.

Gah chinh trĭ - tơpôl, 2 teh đak drơ̆ng nơ̆r hơtŏk pơma đam khul kơpdră kơpal, vă hơtŏk đon lui gah chinh trĭ păng hlôh vao 'lơ̆ng hăm dih băl. Gah mŭk drăm, tĕch pơdro, asong jang, 2 ƀok kơdră sơkơ̆t hơdah, ou jĭ tơdrong tơm kăp gĭt lơ̆m tơdrong jang tơbôl 2 pah; drơ̆ng nơ̆r 2 teh đak oei đei lơ tơdrong vă hơtŏk tĕch răt tơmam drăm kơ 2 pah; pơih să dôm trong jang hơdoi nhen hơtŏk pơjing Anih jang hơdoi Jơnŭm pơgơ̆r teh đak gah jang hơdoi mŭk drăm păng khua hŏk – kih thuơ̆t; tơlĕch jang đei jơnei Tơchơ̆t Tĕch pơdro hiôk hian Việt Nam - EU (EVFTA), pơm trong hiôk vă tơmam drăm kơ rim teh đak gơh tĕch tơlĕch lơ̆m teh đak kơdih băl, kiơ̆ đơ̆ng noh tơlĕch tĕch lơ̆m tơring EU păng ASEAN.
Viết bình luận