Anih vei lăng kon pơlei dêh char Gia Lai ‘nao tơlĕch ăn tơdrong Tơchơ̆t kĭ ăn Tơdrong jang hơtŏk tơiung păng pơm pơ ‘lơ̆ng pơtho pơhrăm tơ̆ dôm hnam trưng teh đak rong hŏk tro kon kông hŏk oei sa kơtă, mă ưh ‘nŏh sŏng sa tơ̆ hnam trưng tơ̆ kơ ‘năr đơ̆ng 2025-2030, hăm jên jang hloh 728 ti hlak jên. Tơdrong jang vă pơm ‘lơ̆ng ăn tơdrong gơh hŏk pơhrăm đơ̆ng hŏk tro kon kông, pơjing khul bơngai jang hơgei pơyua ăn tơdrong jang atŏk tơiung mŭk drăm - tơpôl tơ̆ tơring hơtaih yaih.

Dêh char tơlĕch tơdrong hơgăt hơtŏk lơ hŏk tro THPT bơngai kon kông hŏk oei sa kơtă tơ̆ hnam trưng tŏk hloh 1.500 ‘nu hŏk tro lơ̆m sơnăm 2028–2029. Dêh char kŭm akŏm jơhngâm hơmet pơ ‘lơ̆ng pơtho pơhrăm ‘moi kiơ̆ pơtho ming ăn thây kô, mă loi ‘noh jĭ thây kô pơtho nơ̆r Jrai, Bahnar; hơtŏk loi dơ̆ng tơdrong pơtho tơƀôh tơdrong jang, pơtho trong hơrih xa păng chĕp vei tơdrong juăt, joh ayŏ kơdŏ xoang kơ hơdrĕch kon kông.