Tơ̆ Anih vei lăng tơdrong tơmât jên jang ming man kơ apŭng Cư M’gar, tơdrong bơ̆ jang lơ̆m dôm năr ‘nâu tôch hơiă. Ƀok Bùi Châu Lĩnh, Kơdră Anih vei lăng ăn tơbăt, đe kăn ƀô̆ athei bơ̆ jang ‘ngoăih jơ jang, jô̆ hloi năr 6, năr 7 vă druh kiơ̆ tom tơdrong pơm, pơjao hla ar, hô sơ: “Kiơ̆ đơ̆ng dôm sơnăm bơ̆ jang ‘nŏh đei lơ hla ar hô sơ, pơlung ‘nhŏng oh bơ̆jang đĭ jơhngâm vă jang kĕh tơdrong jang atŭm.”

Tơ̆ 1 anih bơ̆ jang chă pơm hla ar kơ Anih vei lăng kon pơlei apŭng Cư M’gar – anih iŏk pơm păng pơdreu rim hla ar vei lăng, hla ar vă pơm tŏk lơ ƀât mă kon pơlei tơgĕch pơm pơkĕh dôm hla ar kăl adrol kơ tơklăh khul kơdră pơgơ̆r apŭng. Kŭm hăm pơm pơđang dôm hla ar truh năr pơkă, anih pơm hla ar kơ apŭng oei pơtho tơƀôh tôch hơdăh găh trong pơm hla ar tơ̆ hơnăp kơnh, mưh dôm xăh mât bơ̆ jang. Anih vei lăng kon pơlei apŭng Cư M’gar oei kơchăng pơm hơmet anih jang păng pơjao hơdăh hơnăp jang ăn dôm lăm vă huei ƀơm kơnê̆ truh tơdrong pơvih ăn kon pơlei.

Ƀok Nguyễn Công Văn, Phŏ Kơdră vei lăng kon pơlei apŭng pơma hơdăh: “Hăm 1,2 tơdrong jang chă pơm bơ̆n hla ar nhôn pơtho ăn dôm lăm bơ̆ jang, dôm anih juăt jang chih hơdăh dôm tơdrong pơmat tat kăl đei hơmet pơ ‘lơ̆ng păng tơlĕch nơ̆r apinh, nơ̆r athei. Dôm tơdrong kiơ gơ̆h sek tơlang dang ei hloi ‘nŏh jăh sek tơlang hloi, dôm tơdrong kiơ tam mă gơ̆h sek tơlang ‘nŏh athei chih hơmet vă pơtruh ăn anih vei lăng ‘nao bơ̆ jang dơ̆ng. Hăm dôm tơdrong jang, hô sơ ƀơm truh tơ̆ teh, tơmam cham char mă tam mă đei hla ar pơtho tơƀôh ‘nao păng dang ei tam mă gơ̆h jang ‘nŏh athei đei hla ar tơl tơblang ăn kon pơlei, dôm khul grŭp vă đe băt, mơnat ăn apŭng kơplăh dang ei.”

Oei tơ̆ thĭ xăh Buôn Hồ, tơdrong hơmet ming khul kơdră tơring athei tơring sek tơlang hơdai hăm lơ tơdrong kăl, tơdrong tih dang ei. Ƀok Đặng Gia Duẩn, Kơdră vei lăng kon pơlei thĭ xăh Buôn Hồ – ăn tơbăt, kơdră chĕp kơ̆l thĭ xăh pơngơ̆t ăn tơdrong jang tơ̆ xăh ‘nao mă kơdih vă jur bơ̆ jang hai, pơgơ̆r ăn dôm xăh, phường tơ̆ tơring bơ̆ jang hai, iŏk jang dôm tơdrong jang mă hơtuch tơ̆ apŭng hai:

“Adrol găn tôch tơdrong jang đơ̆ng Khul kơdră tơ̆ apŭng, mă loi jĭ găh jên hu, hơmet bơngai jang ăn teh đak. Mă 2 nhôn oei pơjing tơdrong ‘lơ̆ng tôch ai vă dôm xăh, phường ‘nao kơ thĭ xăh Buôn Hồ adrol kơ tơmât hơdai gơ̆h đei dôm tơdrong ‘lơ̆ng hlŏh găh tơmam drăm, bơngai jang mă loi jĭ găh tơdrong jang vă gơ̆h jang pơlong năng păng jang tơpă iŏk đơ̆ng ‘năr 1/7.”

Kiơ̆ trong vă jang, ‘năr 25-26/6, dôm anih vei lăng ‘nao tơ̆ Đắk Lắk hrơ̆ch bơ̆ jang pơlong năng. ‘Năr 30/6, dêh char pơm lêh roi tơbăt pơjing dêh char Đắk Lắk ‘nao hăm 102 anih vei lăng tơ̆ xăh, phường. Kiơ̆ ƀok Nguyễn Đình Trung, Kơdră jang lơ̆m TW Đảng, Bí thư Đảng dêh char Đắk Lắk, tơplih ‘nao đon tơchĕng păng hơtŏk hơnăp jang ‘nŏh jĭ tơdrong tôch gĭt kăl đei tơlĕch hăm đe kăn ƀô̆, bơngai jang ăn teh đak lơ̆m chăl ‘nao:

“Bơ̆n kiơ̆ đơ̆ng rim tơdrong jang tôch hơdăh athei tơplih ming đon răng vă gơ̆h pơm lăp hăm tơdrong ‘mĕh vă đei tơlĕch găh tơdrong bơ̆jang. Kăn ƀô̆, bơngai jang kơ teh đak tơ̆ xăh ‘nao jang hơdoi hăm dêh char, jang hơdoi hăm Trung ương yoa thoi đon jang tơnăp athei pha ƀiơ̆. Tơdrong athei bơ̆ jang chinh trĭ hăm đe kăn ƀô̆, bơngai jang kơ teh đak, mă loi jĭ hăm kăn ƀô̆ chĕp kơ̆l tơm dơnơm tơ̆ xăh athei jê̆ kon pơlei, kiơ̆ kon pơlei păng athei pơvih mă ‘lơ̆ng hlŏh ăn tơdrong ‘mĕh vă đơ̆ng kon pơlei.”