Hăm 30 tơdrong jang hơnơ̆ng lơ̆m 3 năr lơ̆m ‘măng năm bơ̆ jang, khul Việt Nam hlôi ‘măn đei lơ tơdrong ‘lơ̆ng păng vang tơgop gĭt kăl ăn tơdrong jơnei atŭm đơ̆ng Hop akŏm rim sơnăm dôm bơngai năm hơdrol ‘măng mă 16 kơ hop akŏm Khul jang mŭk drăm apŭng plenh teh. 

Lơ̆m dôm năr vang truh hop akŏm, Thủ tướng teh đak đei lơ ‘măng tơƀâp, pơma nuh hăm lơ Kơdră chĕp kơ̆l teh đak, bơngai chĕp kơ̆l dôm anih jang hơdoi, anih tĕch mơdro... Kăl loi jĭ, Thủ tướng đei ‘măng pơma đam tôch hơlen hăm Thủ tướng Trung Quốc Lý Cường vă pơm hơtŏk đon lui chinh trĭ, pơih xă tơdrong jang hơdoi đei yoa păng vei lăng ‘lơ̆ng rim tơdrong ưh lăp băl, hơnhăk tơdrong pơvei jang hơdoi gĭt kăl tôm tơdrong, Tơpôl vang tơgŭm băl ning mônh kơnh Việt Nam - Trung Quốc tŏk pran ‘lơ̆ng, đei yoa păng đunh đai.