Ƀok Bùi Viết Tiệm, oei tơ̆ apŭng Chư Sê, dêh char Gia Lai, akhan, tơdrong hơmet ming anih vei lăng dêh char ưh lăp tơdrong ‘lơ̆ng vă hơmet ming khul kơdră pơgơ̆r đĕch, mă oei jing jơnăr vă tưk tơiung tơdrong jang tŏk mŭk drăm, anih jang, trong nơnăm dơ̆ng:“Inh hơpơi ‘mĕh đơ̆ng rŏng kơ tơmât hơdai, dêh char Gia Lai ‘nao đei pơm hơmet trong gre vă tơƀưh hăm dôm tơring groi kông Gia Lai hăm tơring tơmăn tơ̆ Bình Định. Hơpơi ‘mĕh teh đak hơnơ̆ng chih pơjing dôm tơdrong jang tơjur tơnuh hin, mă loi ‘nŏh hăm tơpôl kon pơlei kon kông păng kon pơlei tơ̆ tơring hơtăih yăih”.

Kuôk hô̆i pơtơm hơlen tơchơ̆t tơmơ̆t hơdai, tơjur kơsô̆ dêh char, pơlei tơm lơ̆m jơ̆p teh đak đơ̆ng 63 oei pă 34 anih jang hanh chinh tơ̆ dêh char. Kiơ̆ kơ noh, Đăk Nông gô đei tơmơ̆t hơdai ham Lâm Đồng păng Bình Thuận, jing dêh char Lâm Đồng 'nao.

Kan ƀô̆ păng kon pơlei dêh char Đăk Nông adoi drơ̆ng nơ̆r păng lăp hăm tơchơ̆t ou. Ƀok Phan Cự Tâm, Phŏ Kơdră Anih jang vei lăng kon pơlei xah sơlam teh Đăk Búk So, apŭng Tuy Đức pơtruh nơ̆r: “Đăk Nông păng Lâm Đồng jĭ 2 dêh char pran gah tơmang pơhiơ̆ choh jang xa, lơ̆m kơplah noh Bình Thuận jĭ dêh char pran gah đak dơsĭ. Đơ̆ng rŏng kơ tơmơ̆t hơdai 3 tơring gô jing dêh char 'nao pơdrŏng pran kơtang đơ̆ng mŭk drăm đak dơsĭ truh tơring bri kông kơjung. Tôm gô tơgŭm dih băl vă atŭm hơtŏk tơ-iung”.