Tơ̆ Anih tơgŭm tơpôl kơ dêh char Gia Lai, pơyan he sơnăm ‘nâu tôch hơiă păng đei yoa mưh 37 ‘nu oh đei hŏk nơ̆r Anh ưh đei nôp jên yoa đe ‘nhŏng oh jĭ bơngai jang tơgŭm truh pơtho ăn rim năr. Hơnơ̆ng ƀât hơtuch giĕng, tơ̆ hnam hôp kơ anih jang ơ ơ̆r ƀơ̆r hiĕk, hơnul păng lơ nơ̆r apinh hăm nơ̆r Anh tôch hơiă. Oh Nguyễn Trọng Phú, 1 lơ̆m dôm ‘nu hơioh đei iŏk rong tơ̆ anih âu, tơroi tơdrong chơt hơiă đơ̆ng kơdih mưh đei hŏk nơ̆r Anh kŭm hăm đe ‘nhŏng, đe mŏ bơ̆ jang tơgŭm lơ̆m pơyan he âu: “Oh đei đe ‘nhŏng pơtho nơ̆r Anh dôm nơ̆r ‘nao kiơ̆ rim tơdrong, oh ƀôh tôch hơiă mưh hŏk nơ̆r Anh păng vă adrin hŏk mă gơ̆h”.

Pơyan he 2025 tơ̆ Gia Lai, dôm anih jang kơpal athei tơrek truh dôm tơdrong pơlung jơhngâm đon, hơpăh tơmam hăm đe oh hŏk tro tơnuh, hŏk tro bơngai kon kông hai. Oh Rơ Châm Uyên, hŏk tro lăm 7, Tơ̆ Hnam trưng THCS xăh Ia Phí, apŭng Chư Păh ăn tơbăt: “Hnam nhôn tôch pơmat tat, jĭ unh hnam vă jê̆ tơnuh. Oh đei đe duch, đe ma chĕp kơ̆l hơpăh ăn hŏk ƀŏng oh tôch hơiă. Sơnăm hŏk âu ki oh jĭ hŏk tro hŏk rơgei, oh vă adrin hŏk pơhrăm hlŏh dơ̆ng”.

Dêh char Gia Lai dang ei đei vă jê̆ 5.000 ‘nu hơioh đei tơdrong arih xa pơmat tat tôch dêh păng hlŏh 95.000 ‘nu hơioh tôch hơmơt huŏng lơ̆m tơdrong pơmat tat âu. Hăm tơdrong vang tơgŭm đơ̆ng khul kơdră tơring păng tơpôl, hơioh lơ̆m dêh char oei đei pơjing tơdrong ‘lơ̆ng vă jang tŏk rim tơdrong. Yă Ksor Hiền – Phŏ Kơdră Anih vei lăng jang pơgang dêh char, Kơdră Anih mong jên vei lăng đe hơioh dêh char Gia Lai ăn tơbăt: “Lơ̆m khei bơ̆ jang yoa đe hơioh, Anih vei lăng jang pơgang hơnơ̆ng mong akŏm jên, tơmam vă tơlĕch dôm tơdrong jang tơgŭm ăn đe hơioh đei tơdrong arih xa pơmat tat tơ̆ dêh char nhen hơpăh tơmam, jên hŏk ƀŏng, gre tang vang, tơmam hŏk pơhrăm, vei lăng năng tông đe hơioh đei tơdrong arih xa pơmat tat tơ̆ tơring hơtăih yăih. Bơ̆ jang ‘lơ̆ng, tơtom dôm tơdrong tơgŭm lơ̆m tơpôl ăn đe hơioh đei tơdrong arih xa pơmat tat. Vang jang hơdoi hăm dôm anih jang kơpal, khul grŭp, tơring tơrang hơtŏk tơdrong tang găn sar bar, pơ̆k rơka păng ƀơ ƀrơ̆h đe hơioh vă pơm ‘lơ̆ng ăn đe oh gơ̆h đei 1 pơyan pơdơ̆h he chơt hơiă ‘nă hal, sơđơ̆ng ‘lơ̆ng păng đei yoa”.

Tơ̆ Hnam hŏk pơhrăm, hơri hơxoang kơ đe hơioh dêh char Đắk Lắk, dôm tơdrong jang lơ̆m pơyan he sơnăm 2025 đei pơgơ̆r tôch hơiă. Vang akŏm đe oh đei pơm ngôi dôm tơdrong kră sơ̆, chih pơchĕh, tĕch ngôi tơmam păng iŏk đei 1,2 tơmam hơpăh. Kŭm hăm ‘nŏh, tơdrong pơgơ̆r “Ƀok Hô hăm hơioh, hơioh hăm Ƀok Hô”, pơtâp pơhrăm trong tang găn glơ̆k ăn đe hơioh… kŭm đei Anih jŏh hơri hơxoang pơgơ̆r, sơng đei kơhrĕng ‘nu oh vang akŏm.

Mŏ Nguyễn Thị Thúy Hiền, Phŏ Kơdră vei lăng Hnam hŏk pơhrăm, jŏh hơri hơxoang kơ đe hơioh Đắk Lắk ăn tơbăt, ‘măng mă âu gô đei dang 30 lăm pơtho hŏk đei pơgơ̆r đơ̆ng pơgê truh 9 jơ kơmăng: “Sơnăm ‘nâu ‘ngoăih kơ pơtho hŏk dôm môn nhen adrol ki găh joh hơri hơxoang, chih pơchĕh, tơplŏng kơdâu, trong arih xa ‘nŏh nhôn oei năng kăl truh dôm tơdrong pơgơ̆r đĕch, pơm lơ anih chih pơcheh, truh pơhrăm găh đon rơgei. Mă loi sơnăm ‘nâu nhôn vă năng kăl truh tơdrong tang găn glơ̆k, pơ̆k rơka ăn đe oh, bơ̆ jang dôm tơdrong jang chă hơlen năng tơdrong juăt, jŏh ayŏ kơ dŏ xoang Tây Nguyên”

Tơ̆ Anih pơm Xinrơma Đắk Lắk, ‘măng pơm phim pơyan he ăn đe hơioh kŭm đei pơgơ̆r. Đơ̆ng dang ei truh ‘năr 24/8, ƀât pơgê năr 6 păng năr 7 rim giĕng, đe oh năm tơ̆ anih pơm phim, mât lăng ưh đei răt vĕ dôm phim pơtho tơƀôh jơhngâm đon, tôch lăp hăm đe hơioh. Yă Nguyễn Thị Hồng Thanh, Phŏ kơdră Anih pơm phim tơroi: Hăm 3 ‘măng pơm 1 năr, pơvih ăn dang 400 ‘nu mon, gô đei vă jê̆ 20 phim hoăt hoă Việt Nam tôch kơ hơiă, găh chăl arih, tơdrong ‘mêm băl lơ̆m unh hnam, vei sơđơ̆ng tơ̆ trong gre, tang găn teh dong tơ̆ hnam hŏk, tang găn glơ̆k tơ̆ đak ăn đe hơioh.

“’Măng pơm phim pơyan he jĭ 1 lơ̆m dôm tơdrong jang đei hơnơ̆ng đơ̆ng Anih pơm phim Đắk Lắk vă pơjing anih ngôi pơchơt ‘lơ̆ng hơiă, đei yoa ăn đe kon mon hơioh đơ̆ng rŏng 1 sơnăm hŏk pơhrăm. Kiơ̆ đơ̆ng ‘măng chă pơm phim hăm lơ phim đei rơih hơmet tôch lăp hăm đe hơioh, ‘ngoăih kơ pơdơ̆h ngôi, pơklăih jơhngâm lap, nhôn lui đe oh gô đei dơ̆ng tơdrong ‘lơ̆ng vă hŏk pơhrăm dôm tơdrong hơiă, arih xa roi ‘lơ̆ng păng băt ‘mêm dôm kơjă kăp gĭt lơ̆m tơdrong arih xa”.

‘Ngoăih kơ plt, ‘măng pơm phim pơyan he oei đei pơgơ̆r tơ̆ dôm tơring hơtăih yăih kơ dêh char Đắk Lắk ‘năi, kŭm hăm ‘nŏh jĭ dôm tơdrong jang tôch đei yoa nhen pơtho glơi ưh iŏk jên, pơm anih đŏk hla ar, anih ngôi pơchơt ăn đe hơioh… pơjing tơdrong ‘lơ̆ng vă đe hơioh đei ngôi pơchơt lơ̆m pơyan pơdơ̆h he./.