- Ơ mih ma păng bôl boăl! Pơgê ou, năr 24/5, tơ̆ Hnam pơdong groong ƀŭ Teh đak, kơsô̆ 5 Trần Thánh Tông, pơlei tơm Hà Nội, Khul kơdră chĕp pơgơ̆r Trung ương Đảng Cộng sản Việt Nam, Kuô̆k hô̆i teh đak Cộng hoà xã hội chủ nghĩa Việt Nam, Kơdră chĕp pơgơ̆r teh đak Cộng hoà xã hội chủ nghĩa Việt Nam, Khul kơdră chĕp pơgơ̆r teh đak Cộng hoà xã hội chủ nghĩa Việt Nam, Hơnih bơ̆ jang Trung ương Mặt trận Tổ quốc Việt Nam  pơgơ̆r Pơm lêh pơdong Kơdră so chĕp pơgơ̆r Teh đak Trần Đức Lương hăm trong pơgơ̆r Pơm lêh Pơdong Teh đak. 

           - Yak hơdrol mơ̆t hơpong, Khul kơdră chĕp pơgơ̆r Trung ương Đảng Cộng sản Việt Nam kơ yuơ ƀok Tô Lâm, Tổng Bí thư Ban Chấp hành Trung ương Đảng, pơm Kơdră khul mơ̆t hơpong ƀok Trần Đức Lương, kơdră so chĕp pơgơ̆r Teh đak.

             Tơklăh ti hăm Kơdră so chĕp pơgơ̆r teh đak Trần Đức Lương, Tổng Bí thư Tô Lâm chih lơ̆m kơsơ̆p hla bơar pơdoong: " ‘Mêm tôch bach hmach tôch kơ dêh ƀok Trần Đức Lương - bơngai đảng viên Cộng sản tơpăt ‘lơ̆ng, kơdră chĕp pơgơ̆r tơnăp, bơngai kon gơ̆h hơgei kơ pơlei pơla Quảng Ngãi nuih mơng, ƀĕnh ƀang tơdrong joăt kĕch mang.

             Ƀok Trần Đức Lương hlôi plang prăt jơhnơr hơrih ăn tơdrong jang kĕch mang kơ Đảng păng Hơdrĕch hơdrung. Lơ̆m lơ kơchư̆k jang, ƀok ling lang tơƀôh hơdăh jơhngơ̆m đon chinh trĭ kơjăp, jơhngơ̆m đon oei sa ‘lơ̆ng, đei trong bơ̆ jang khoa hŏk, tơnăp; hơrih sa ‘lơ̆ng liĕm, dim rơnim, oei sa pơma dơnuh ‘lơ̆ng hơ iă hăm bôl boăl, ‘nhŏng oh, hăm kon pơlei, đei bôk boăl, ‘nhŏng oh păng kon pơlei kŭp yom kơtang..

             Ƀok hiong hlôi jing tơdrong hiong răm tih tên hăm Đảng, Teh đak păng kon pơlei bơ̆n. Apĭnh kuh ka hla bat tơ̆ hơnăp yang hơbang ƀok păng pơtruh nơ̆r ‘mêm tôch bach hmach tôch kơ dêh hăm ŭnh hnam".

             - Khul Kơdră Teh đak Cộng hòa xã hội chủ nghĩa Việt Nam kơ yuơ ƀok Lương Cường, Kơdră jang lơ̆m Hơnih tơm Chinh trĭ, Kơdră chĕp pơgơ̆rt Teh đak Cộng hòa xã hội chủ nghĩa Việt Nam, pơm Kơdră khul mơ̆t hơpong ƀok Trần Đức Lương, kơdră so chĕp pơgơ̆r Teh đak.    

         - Khul kơ Khul Kơdră chĕp pơgơ̆r teh đak Cộng hòa xã hội chủ nghĩa Việt Nam kơ yuơ ƀok Phạm Minh Chính, Kơdră jang lơ̆m Hơnih tơm Chinh trĭ, Thủ tướng Teh đak Cộng hòa xã hội chủ nghĩa Việt Nam, pơm Kơdră khul mơ̆t hơpoong ƀok Trần Đức Lương, Kơdră so chĕp pơgơ̆r Teh đak.

    - Khul Kuô̆k hô̆i teh đak Cộng hòa xã hội chủ nghĩa Việt Nam kơ yuơ ƀok Trần Thanh Mẫn, Kơdră jang lơ̆m Hơnih tơm Chinh trĭ, Kơdră chĕp pơgơ̆r Kuô̆k hô̆i teh đak Cộng hòa xã hội chủ nghĩa Việt Nam, pơm Kơdră khul mơ̆t hơpong ƀok Trần Đức Lương, kơdră so Chĕp pơgơ̆r Teh đak.           

              - Khul Hơnih jang Trung ương Mặt trận Tổ quốc Việt Nam kơ yuơ ƀok Đỗ Văn Chiến, Kơdră jang lơ̆m Hơnih tơm Chinh trĭ, Bí thư Trung ương Đảng, Kơdră chĕp pơgơ̆r Hơnih bơ̆ jang Trung ương Mặt trận Tổ quốc Việt Nam, pơm Kơdră khul mơ̆t hơpoong ƀok Trần Đức Lương, Kơdră so chĕp pơgơ̆r Teh đak.

             - Pơlêh yôk ƀok Trần Đức Lương đei pơgơ̆r lơ̆m 7 jơ năr 25 khei 5 sơnăm 2025 tơ̆ Hnam Pơdong groong ƀŭ Teh đak, kơsô̆ 5 Trần Thánh Tông, pơlei tơm Hà Nội. Pơm lêh ƀŭ lơ̆m 3 jơ kơsơ̆ năr ‘nou mơ̆n tơ̆ Hơnih Pơm sat pơlei pơla kơdih, tơring Phổ Khánh, thĭ xah Đức Phổ, dêh char Quảng Ngãi.