Pơtôch ‘măng hop akŏm, Phŏ Thủ tướng Nguyễn Chí Dũng athei Anih tơm Khoa hŏk păng Kơmăy kơmŏk vei kơjăp dôm trong jang, klăih song hơnăp jang mă ‘lơ̆ng vă kiơ̆ jơhngơ̆m đon tơring tơchơ̆t, tơring jang, tơring pŭ hơnăp jang. Hăm hơnăp jang đơ̆ng apŭng, athei pơm rơđăh hơnăp jang hơ yơ ăn tŏk tơ̆ dêh char, hơnăp jang hơyơ ăn năm tơ̆ xăh. Tơchĕng hơlen iŏk yua tôch ai nơ̆r tơgop đơ̆ng rim Anih tơm, anih jang, đei ƀơm tơhlăk athei apĭnh hloi, jang hrĕnh, jang ƀlep.

Hăm 154 hơnăp jang ưh kơ klăih song hơnăp jang, kăl kơ dăr hơlen dơ̆ng, hơnăp jang hơyơ gơh klăih song hơnăp jang dơ̆ng, vei sơđơ̆ng ƀlep tơdrong, chih pơkeh hla ar chih ming tơdỏng tơchơ̆t hơdrol kơ ‘năr 30/5/2025 vă Anih tơm Tư pháp hơlen lăng păng tơlĕch ăn hơdrol kơ ‘năr 25/6/2025, ăn tơmơ̆t yua đơ̆ng ‘năr 1/7/2025.