Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, ‘Măng mă 1, ‘Măng hop akom mă 9 hlôi đei pơgơ̆r hăm bơ̆ jang tôch tơnăp păng kơrŭn kơtang bơ̆ jang chinh trĭ kơtang, pơjing đei drơ̆ng mĭnh nơ̆r đơ̆ng rim kơdră tang măt Kuô̆k hô̆i. Lơ̆m ou, tơdrong đei ƀơm truh chinh trĭ-khôi luơ̆t gĭt kăl tơ̆ hop akŏm ou ‘noh pơdrơ̆ng kiơ̆ Tơdrong tơchơ̆t sơkơ̆t hơdăh tơdrong lăng hơlen hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm teh đak sơnăm 2013 vă hơnơ̆ng jang kiơ̆ trong bơ̆ jang hơmet ming, pơm kơtoei khul jang kơ khul chinh trĭ. Jang kiơ̆ trong tơlĕch jang ou, giĕng ou ki, Khul kơdră chĕp pơgơ̆r Hơnih bơ̆ jang Trung ương Mặt trận Tổ quốc Việt Nam jei hlôi pơgơ̆r Hop akŏm iŏk nơ̆r tơgop Trong vă jang Tơdrong tơchơ̆t sơkơ̆t hơdăh tơdrong lăng hơlen hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm teh đak sơnăm 2013. Kơdră chĕp pơgơ̆r hop akom, Kơ iĕng Kơdră chĕp pơgơ̆r Hơnih bơ̆ jang Trung ương MTTQ Việt Nam Hoàng Công Thủy pơma hơdăh:“Trong hơmet ming, tơmơ̆t dơ̆ng Khôi luơ̆t tơm teh đak ‘măng mă ou akŏm lơ̆m 8 găh lơ̆m 120 apăng kơ Khôi luơ̆t tơm teh đak sơnăm 2013 vă tơlĕch jang kiơ̆ ‘lơ̆ng trong tơlĕch jang đơ̆ng Đảng găh hơmet ming hơnih bơ̆ jang kơ Mặt trận Tổ quốc Việt Nam, rim khul jang chinh trĭ-tơpôl, rim khul kon pơlei pơla kơ yuơ Đảng păng Teh đak pơjao ăn; jang keh đang trong jang khul kơdră chĕp pơgơ̆r tơring 2 kâp kiơ̆ trong tơjê̆ hăm kon pơlei, tơklep hăm kon pơlei, bơ̆ jang tơgŭm kon pơlei ‘lơ̆ng hơ iă hloh dơ̆ng”.

Kơdră chĕp pơgơ̆r Kuô̆k hô̆i Trần Thanh Mẫn tơbăt: Trong vă pơjing Tơdrong tơchơ̆t kơ Kuô̆k hô̆i găh mĭnh ƀar trong bơ̆ jang păng tơgŭm djru gĭt kăl atŏk tơ iung mŭk drăm ŭnh hnam pơm tơm đei 7 chăl păng 17 apăng, lơ̆m ou pơkăp atŭm đei ƀơm truh hơmet pơ ‘lơ̆ng tơdrong mơdro sa; Tơgŭm djru iŏk đei hơnih teh jang sa pơm tơlĕch tĕch mơdro tơmam drăm; Tơgŭm djru kon jên hu, tŏk iŏk jên păng răt kmăi kmŏk tơmam drăm; Tơgŭm djru khoa hŏk kmăi kmŏk, tơplih ‘nao tơchăr, tơplih kơsô̆ păng pơtho pơjing khul jang; Tơgum djru hơnih mơdro sa păh ai păng tih, hơnih mơdro sa pơm jŭk yuk trong hơlou.“Tơdrong kăl hloh ‘noh Tơdrong tơchơ̆t găh mŭk drăm ŭnh hnam. Kơ yuơ, tơdrong tơchơ̆t kơ Đảng ‘nao kĭ lơ̆m năr 4/5 ‘noh Khul kơdră Teh đak, Thủ tướng jei hlôi hop akŏm ƀar ‘măng hơmet ăn tơdrong tơchơ̆t vă pơtruh ăn Kuô̆k hô̆i. Đảng hlôi pơchoh trong bơih ‘noh bơ̆n pơm lơ liơ jang kiơ̆ ‘lơ̆ng tơdrong ou. Ĭnh pơjao ăn Hơnih bơ̆ jang vei lăng mŭk drăm, jên hu kăl iung jang hơdoi kơjăp hăm Hơnih tơm jang jên hu adoi nhen rim hơnih bơ̆ jang ƀơm truh iung jang đơ̆ng hrôih, đơ̆ng hơdrol”.

Kơdră chĕp pơgơ̆r Kuô̆k hô̆i Trần Thanh Mẫn pơkă, Tơdrong tơchơ̆t găh mĭnh ƀar trong jang, tơgŭm djru gĭt kăl atŏk tơ iung mŭk drăm ŭnh hnam vă hơmet pơ ‘lơ̆ng tơdrong tơmơ̆t jên jang mơdro sa; tơgŭm djru sơng iŏk đei groi teh, hơnih pơm tơlĕch, tĕch mơdro; tơgŭm djru kon jên hu, ăn tŏk iŏk jên, răt kmăi kmŏk; pơtrŭt jang hơdoi teh đak hăm kon pơlei păng kĭ pơkăp răt iŏk tơmam drăm hơnih mơdro sa; tơgum djru khoa hŏk, kmăi kmŏk, tơplih ‘nao tơchăr, tơplih kơsô̆ păng pơtho pơjing bơngai jang; tơgum djru pơjing hơnih mơdro sa păh ai păng tih, hơnih mơdro sa pơm jŭk yŭk trong hơlou ... Kơdră chĕp pơgơ̆r Kuô̆k hô̆i Trần Thanh Mẫn pơma hơdăh:“Bơ̆n kăl tơplih jơhngơm đon tơchĕng, Teh đak pơjing ăn tơplih ăn vei lăng, ‘moi kiơ̆ trong mă Tổng bí thư Tô Lâm hlôi pơma hơlơ̆k hơle dôm ‘măng ‘noh. Tơdrong sơđơ̆ng găh khôi luơ̆t păng tơgum djru tơplih kơsô̆, tơplih ‘nao tơchăr, ‘nou jing trong mă Teh đak vang yak hơdoi hăm kon pơlei lơ̆m jăl trong atok tơ iung ... Ĭnh athei dăr lăng mă kơjăp rim bơngai, tơdrong đei iŏk yua sa hơpăh lơ̆m trong jang tơgŭm djru, pơm sơđơ̆ng trŏ lăp, jơnei kơ trong bơ̆ jang tơgŭm djru ƀlep hăm yan ou”.

Vă hơmet ăn ‘măng mă 2 kơ ‘Măng hop akŏm mă 9, giĕng ou ki, Hơnih bơ̆ jang Kuô̆k hô̆i jei ăn tơgop nơ̆r 3 tơdrong pơtruh ăn Kuô̆k hô̆i lơ̆m năr 19/5 ‘noh: trong tơmơ̆t jên jang Tơdrong vă jang Tơmơ̆t jên jang ming man trong gre rĕnh Quy Nhơn - Pleiku; Trong jang Tơmơ̆t jên jang tơ iung pơjing ming man trong ver 4 pơlei tơm Hồ Chí Minh.