Kiơ̆ kơ Anih tơm vei lăng ming man, lơ̆m teh đak đei 686 tơdrong jang pơm hnam oei tơpôl tŏk bŏk tơlĕch jang hăm 623 rơbâu tŏ hnam, lơ̆m noh 117 tơdrong jang hlôi jang đang. Hơdrô̆ 5 khei blŭng sơnăm ‘nâu, đĭ pơm đang hloh 22.600 tŏ hnam păng tơlĕch jang dơ̆ng 21 tơdrong jang ‘nao. Thủ tướng pơma hơdăh, hơtŏk tơiung hnam oei tơpôl ‘noh jĭ trong jang tơgŭm vei lăng sơđơ̆ng tơdrong hơrih sa, vei sơđơ̆ng tơdrong gơh đei hơnih oei ăn kon pơlei, mă loi ‘noh jĭ bơngai pơmat tat.

Thủ tướng pôk pơ ư tơdrong hơdrin đơ̆ng rim tơring, hơdai hăm tơƀôh rơđăh oei đei lơ tơhlăk tơhlĭn kăl kơ hơmet pơ ‘lơ̆ng. Tơdrong tơm truh 2030 jang đang 1 triệu tŏ hnam oei tơpôl, hơdrô̆ sơnăm 2025 ‘noh 100 rơbâu tŏ hnam. Thủ tướng athei rim kơdră chĕp kơ̆l athei bơngơ̆t truh ƀlep tơdrong, dăr hơlen tơdrong jang tơgŭm gơh tŏk iŏk jên, teh, pơm hla ar bơ̆jang vă pơm tơdrong hiôk ‘lơ̆ng hloh ăn kon pơlei păng anih mơdro sa.