Kơsơ̆ năr 4/5, tơ̆ pơlei tơm Cần Thơ, Tổng Bí thư Tô Lâm bơ̆ jang hăm Khul kơdră chĕp pơgơ̆r Đảng pơlei tơm Cần Thơ păng Khul kơdră chĕp pơgơ̆r Đảng rim dêh char Sóc Trăng hăm Hậu Giang găh tơdrong tơlĕch jang kiơ̆ rim tơdrong tơchơ̆t, nơ̆r pơma pơtôch đơ̆ng Trung ương; tơdrong hơgrop hơnih bơ̆ jang dêh char păng pơjing Đang ƀô̆ pơlei tơm Cần Thơ đơ̆ng rŏng hơgrop kiơ̆ Tơdrong tơchơt 06 kơ Trung ương tơ̆ 3 tơring. Tổng Bí thư sơkơ̆t hơdăh, tơdrong hơgrop 3 tơring jing pơlei tơm Cần Thơ ‘nao gô pơjing hơyak rơvơn vă jang kiơ̆ tơgoăt kơjăp tơdrong jang mŭk drăm, oei sa joh ayŏ, tơpôl, pơm kơtoei khul kơdră bơ̆ jang, pơm hơtŏk bơ̆ jang ‘lơ̆ng vei lăng teh đak; jang kiơ̆ jơnei dôm tơdrong đei kiơ̆ trong tih păng atŭm hăm dôm tơdrong đei kơ tơring. Akhan, sơnăm 2025 jĭ sơnăm tôch gĭt kăl, khei ‘năr jang keh đang tơdrong hơgrop dêh char, adoi sơnăm pơgơ̆r Hop akŏm tih kơ Đảng rim hơnih lăng truh Hop akŏm tih ‘măng mă XIV kơ Đảng, Tổng Bí thư pơkă, akŏm ‘măn jơ ‘năr trŏ lăp ăn bơ̆ jang hơmet ăn păng pơgơ̆r jơnei ‘lơ̆ng Hop akŏm tih kơ Đảng rim hơnih, lơ̆m ou bơ̆ jang tơ iung pơjing tơdrong tơchơ̆t hop akŏm, kăl đei iung jang mă hơlen, mă trŏ lăp khoa hŏk, ‘moi kiơ̆ kơjăp hăm Nơ̆r athei jang kiơ̆ 45 đơ̆ng Hơnih tơm Chinh trĭ.