Pơm ƀô̆ đô̆i lơ̆m mă ‘nao 14 sơnăm, ƀô̆ đô̆i so Lâm Xuân Quang, sơnăm ou 70 sơnăm, tơbăt:"Pơyan puih mak sơnăm 1969, mưh ba oei tơ̆ kơdrăn tơblăh miền Đông, ba kơtơ̆ng Kơdră chĕp pơgơ̆r Teh đak Hồ Chí Minh hmach chơt hơ iă Têt hăm nơ̆r pơđơ̆k ... Kơtơ̆ng nơ̆r Ƀok pơma tôch hơbôn pơm ăn kơ ĭnh hưch hanh hơmanh bơnê truh dang yơ ‘noh gô pơjing đei hơnih mong răk mŭk drăm yom bơnê kơ Ƀok Hô."

50 sơnăm hơpơi ‘meh vă, tơchă răk dôm hla bơar ou to, truh sơnăm 2018, lăp đơ̆ng rŏng ming hơmet hnam oei dang ei, ƀok iŏk mĭnh tăl hnam vă pơm hơnih mong răk dôm tơmam drăm, mŭk drăm kơ Ƀok Hô. Kơtơ̆ng tơring ayơ đei tơmam drăm Ƀok Hô ‘noh ƀok năm truh hloi, dăh mă lăp kơtơ̆ng lơ̆m brŏ, lơ̆m tivi, lơ̆m ƀai chih tơroi tơbăt găh Ƀok Hô, ƀok gô chih akŏm.

Ba nhôn năm tơmang hơnih pơdă să dang 300m2, ƀok Quang tơbăt rim rup, hla bơar tơchă akŏm đơ̆ng lơ hơnih. Mă kăl hloh ‘noh rup găh trong Trường Sơn, rup gre nar tơ̆m mơ̆t ‘măng jang Dinh Độc Lập ‘năr dơ̆ng năr 30/4/1975 atŭm hăm lơ rup gĭt kăl dăr sơnăm đei ƀok Quang chă pơklep tơƀôh tơbăt hơdăh ‘lơ̆ng hơ iă tơ̆ ƀar păh tơnăr hnam kơdih ƀok: " ‘Măng blŭng ƀôh plei plei teh, tơbăt hơdăh jăl trong blŭng năm tơchă trong dŏng teh đak đơ̆ng Ƀok Hô hăm hloh 40 teh đak. Đơ̆ng mă ou ƀok Hô akŏm đei jơhnơ̆m đon hơpơi, kơ̆l ‘ngok hlôh vao, jơhngơ̆m đon hơpơi ‘meh vă rơngei hiôk hian-pơm tơm hơdrĕch hơdrung, jơhngơ̆m đon bơ̆ jang Hồ Chí Minh vă brŏk vih chĕp pơgơ̆r kĕch mang jơnei keh kong. Găh ‘nou ‘noh Pác Bó, thoong đak suối Lênin, kông Các-Mác, ‘nou Hop akŏm tih Diên Hồng sơnăm 1945… Găh ‘nou ‘noh ƀar tơmam drăm mă Ƀok iŏk yua lơ hloh ‘noh Kmăi choh chư păng radio… găh ‘nou ‘noh rup dôm pơbŭng hnam tơ̆ tơring găh Tu, găh Pơbăh, hăm thoong đak kroong, hơdrơ̆m đak, thŏng nan ... đei chă hơtol tŏk bŏk hơnih pơdă, nhen ‘meh vă tơroi tơbăt jơhngơ̆m đon kơ kon pơlei tơring Pơbăh kơkuh sơng hơvơn Ƀok Hô mưh teh đak rơngei keh kong."

Tơplih ăn lăp plôih ‘măng lơ̆m jơ ‘năr gĭt kăl, hơnih mong răk mŭk drăm Kơdră chĕp pơgơ̆r Teh đak Hồ Chí Minh kơ ƀok Quang ling lang plôih ‘măng hơnơ̆ng. Ƀok jei jang hloi chă tơroi tơbăt dôm mŭk drăm, dôm tơdrong tơroi găh Ƀok Hô. Boăl Hoàng Ánh Ngọc, oei lơ̆m pơlei tơm Hồ Chí Minh, năm tơmang “Hơnih mong răk mŭk drăm Hồ Chí Minh", tơbăt: "Ĭnh năm hơdoi hăm mĕ ƀă păng bôl boăl mĕ ƀă, dôm bơngai ƀô̆ đô̆i so, truh tơmang “hơnih mong răk mŭk drăm Hồ Chí Minh" kơ mih Quang. Măh chhưu lơ̆m jơhngơ̆m tơpă mơ̆n ... mưh ƀôh hơnih ou đei mih Quang chă hơmet ăn tôch hơlen, tôch hơ iă. Mih Quang hưch hanh hơmanh bơnê tôch kơ brĕ ‘mơ̆i mă pơjing đei hơnih hơ iă lơ lou. Jơhnơr mơlôh nhen nhôn đei băt hlôh ƀôh hơdăh hloh dơ̆ng găh Kơdră chĕp pơgơ̆r teh đak Hồ Chí Minh, găh ‘măng iung tơblăh kơ hơdrĕch hơdrung vă pơjing đei teh đak rơngei hiôk hian, pơm tơm kơdih nhen hrei ou."

Hăm sơnăm 70 sơnăm, ƀok Lâm Xuân Quang hơpơi ‘meh vă gô vă pơjing minh Hơnih mong răk mŭk drăm Hồ Chí Minh hăm kmăi kmŏk 4D vă tơƀôh tơbăt dơ̆ng đĭ đăng um rup, hla bơar chih tơbăt găh Ƀok Hô tơgŭm ăn kon pơlei Việt Nam păng bôl boăl apŭng plĕnh teh chă hơlen băt hlôh ƀôh hơdăh găh Kơdră chĕp pơgơ̆r teh đak Hồ Chí Minh trŏlăp, tơpăt ‘lơ̆ng.