Mŏ Lê Thị Phương Thu, oei tơ̆ plei Đức Hoà, bơngai jang tơ̆ Anih vei lăng kon pơlei xăh Đức Mạnh, apŭng Đắk Mil, dêh char Đắk Nông. Mŏ Thu tơroi, unh hnam mŏ đei 2 ‘nu kon oei ‘lơ̆p, mon ‘lŏ ‘nŏh hŏk lăm 6, mon ‘lơ̆p ‘nŏh ‘nao hŏk lăm 1. Klo ‘nŏh ƀô đô̆i bơ̆ jang ưh đei jơ rơhơi kiơ, 1 ‘nu mŏ vei rong kon kơna rim ‘măng truh pơyan he mŏ tôch pơngơ̆t mưh bre kon đa kiơ̆ bôl boăl chă thông. Lơ̆m noh, pơngơ̆t hlŏh jĭ hơmơt đe mon jur hum tơ̆ dơnâu, tơ̆ đak krong:

“Vei lăng kon pơyan pơdơ̆h he hăm klo kăn măr nhi tơpă mơ̆n pơmat dêh, yoa mưh lê̆ bre mon ngôi tơ̆ hnam pơm ngôi hơdrô̆ ‘nŏh ưh đei hơđơ̆ng kiơ. Kơna măr nhi jing chông ba bre sư ăn yă ƀok vei lăng tơgŭm. Mưh sư pơm ngôi hơdrô̆ inh hơnơ̆ng tơtă lê̆ jur hum, pơm ngôi tơ̆ hơlŭng, dơnâu đak dăh mă hum đak krong, yoa sư tôch hơmơt lơ̆m dôm năr pơdơ̆h he”. Mŏ Thu pơma thoi noh.

Đắk Nông đei teh xă hlŏh 6.500 km², hăm lơ dơnâu, đak krong, thong đak kơna tôch hơmơt glơ̆k kơ đak. ‘Nhŏng Điểu Lê Nam Nam, Kơdră vei lăng Khul druh dăm hơioh iĕ tơ̆ hnam trưng kơ Anih jang đoan dêh char Đắk Nông, tơroi vă tơjur ƀiơ̆ tơdrong krê hơmơt, khei ‘năr âu ki dôm anih jang man 20 sơlung đak vă hum tơ̆ 7 apŭng, plt păng pơgơ̆r kơhrĕng lăm hŏk pơtho glơi ưh đei iŏk jên ăn đe hơioh. Atŭm hăm ‘nŏh, jang hơdoi hăm dôm anih jang kơpal, tơring tơrang tơlĕch lơ trong tơgŭm ăn đe hơioh tang găn tơdrong pơ̆k rơka, mă loi jĭ hơmơt glơ̆k tơ̆ đak.   

“Anih jang đoan dêh char oei pơtho ăn dôm anih jang đoan tơ̆ tơring hơtŏk tơdrong iŏk aloa chă roi tơbăt ăn kon pơlei tơ̆ pơlei pơla dôm anih hơnơ̆ng đei hơiŏh glơ̆k. Găh noh dơ̆ng, pơgơ̆r hơtâp kơƀang khan hơdrol, hơpăh ao đông ăn dôm unh hnam arih xa jê̆ dơnâu, sơlŭng đak vă tang găn tơdrong glơ̆k tơ̆ đak. Jang hơdoi hăm công an, khul kơdră pơgơ̆r xăh jur truh tơ̆ rim hnam đei dơnâu, sơlŭng đak kĭ pơkăp đei trong vei lăng tang găn glơ̆k.”

Kiơ̆ kơsô̆ chih jô̆ đơ̆ng Anih vei lăng jang pơgang dêh char Đắk Nông ăn ƀôh, đơ̆ng blŭng sơnăm truh dang ei tơ̆ dêh char đei 14 ‘măng glơ̆k, pơ̆k rơka, pơm ăn 20 hơiŏh lôch. Lơ̆m noh đei 12 ‘măng glơ̆k tơ̆ đak, pơm ăn 18 ‘nu oh lôch, tŏk tôch lơ pơting hăm khei âu sơnăm 2024. Dôm tơdrong lôch glơ̆k đei lơ tơ̆ dôm apŭng Đắk Mil, Đắk R’lấp, Tuy Đức, Đắk G’long păng plt Gia Nghĩa.

Ƀok Hoàng Viết Nam, Phŏ Kơdră Anih vei lăng jang pơgang dêh char Đắk Nông, tơroi: “Tơdrong glơ̆k tơ̆ đak lơ̆m dêh char Đắk Nông khei ‘năr âu ki tơtă đei tơ̆ dôm dơnâu, sơlŭng đak đơ̆ng unh hnam sir kơdih. Yoa thoi noh, hăm Anih jang pơgang, nhôn krao hơvơn dôm unh hnam athei hue lăng, pơngơ̆t truh kơ kon hơ ‘lơ̆p kơdih, pơm thoi yơ vă pơjing đei anih ngôi pơchơt sơđơ̆ng ‘lơ̆ng hlŏh lơ̆m pơyan he sơnăm 2025 âu.”

Ƀok Trần Sĩ Thành, Phŏ Kơdră Anih vei lăng pơtho pơhrăm dêh char Đắk Nông ăn tơbăt, hơnơ̆ng mưh truh lơ̆m pơyan he rim sơnăm, Anih hơnơ̆ng jang hơdoi hăm Công an dêh char, Anih vei lăng jang pơgang dêh char păng đe mĕ ƀă hŏk tro tơlĕch lơ trong tang găn glơ̆k, pơ̆k rơka, lơ̆m noh mă loi jĭ glơ̆k tơ̆ đak hăm đe oh hŏk tro.

Anih oei pơtho ăn rim hnam trưng pơih lăm pơtho hŏk tơ̆ ‘ngoaih jơ hŏk găh tơdrong arih xa vă tang găn glơ̆k, pơ̆k rơka nhen điên hyup, unh xa đôh, pơ̆k gre mă loi ‘nŏh glơ̆k: “Anih jang hlôi jang hơdoi hăm Anih jang đoan dêh char, dôm anih jang mưh pơjao hŏk tro ăn unh hnam 'nŏh athei pơtho tơƀôh, hơmet đon hlôh vao ăn đe oh găh trong tang găn rim tơdrong krê hơmơt lơ̆m pơyan he. Atŭm hăm ‘nŏh, pơtho ăn dôm hnam trưng jang hơdoi hăm mĕ ƀă hŏk tro vei lăng kon hơ 'lơ̆p mă 'lơ̆ng, ăn đe ŏh năm hŏk găh trong tang găn glơ̆k, pơ̆k rơka, kăl hlŏh jĭ pơtho glơi ăn đe kon mon.”

Tang găn glơ̆k ăn đe hơioh ưh lăp hơnăp jang kơdih đơ̆ng rim unh hnam đĕch mă ‘nâu oei jing tơdrong jang tôch gĭt kăl đơ̆ng rim anih jang, khul kơdră  tơring păng đĭ đăng tơpôl. Dôm kơsô̆ ơh sơ ‘ngon, jĭ jơhngâm yoa đơ̆ng lôch glơ̆k khei ‘năr âu ki tơ̆ Đắk Nông jĭ nơ̆r roi tơbăt vă hơtŏk đon kơchăng, athei đei tơdrong vang jang mă hrơ̆ch ‘lơ̆ng đơ̆ng đĭ đăng. Dôm anih jang kơpal athei hơnơ̆ng hơtŏk đon jang tơnăp, hơtŏk tơdrong tơroi tơbăt, pơtho tơƀôh găh tơdrong arih xa, pơih lơ lăm pơtho glơi, hơtŏk tơdrong dăr hơlen, vei lăng tơ̆ dôm tơring krê hơmơt… vă pơjing anih arih xa sơđơ̆ng ‘lơ̆ng ăn đe hơioh, mă loi lơ̆m pơyan he.