Dak Lăk pơjing 1 jơnŭm vei lăng pơlong, hăm 53 hơnih pơlong hăm 948 lăm pơlong đei hơmet ăn tơ̆ rim hnam trương jăl pêng păng Hơnih tơm pơtho pơhrăm thường xuyên lơ̆m dêh char. Akŏp măt bơngai hŏk tro chih hơnăn năm pơlong hloh 22.600 ‘nu hŏk tro, lơ̆m ou đei hloh 530 ‘nu hŏk tro kơdih năm pơlong. Truh dang ei, bơ̆ jang dăr lăng păng hơmet ăn dôm tơmam drăm tơ̆ rim hơnih pơlong hlôi jang keh đang. Bơ̆ jang vei lăng rơgoh cham char, sơđơ̆ng rơgoh tơmam drăm sa, tơdrong jang pơgang păng trong jang vei lăng sơđơ̆ng, vei lăng trong nơnăm jei đei rim hơnih bơ̆ jang iung jang hơdoi kơjăp ‘lơ̆ng. Hơnih vei lăng Hnam trương pơtho pơhrăm dêh char Dak Lăk hlôi pơgơ̆r rim lăng pơtho ming tơdrong jang ăn hloh 2.200 ‘nu kang ƀô̆, ƀok thây kô, bơngai kang đei krao hơvơn vang iung jang lăng pơlong.

‘Măng pơlong tôt ngiêp jăl 3 sơnăm ‘nâu tơ̆ dêh char Kon Tum đei hlŏh 5.300 ‘nu hŏk tro chih măt vang pơlong, lơ̆m noh đei vă jê̆ 1.800 ‘nu hŏk tro jĭ bơngai kon kông. Vă pơm ‘lơ̆ng ăn tơdrong pơlong kŭm nhen hơtŏk kơsô̆ hŏk tro pơlong đŏu, dôm hnam trưng găh tơring hơtăih yăih păng dôm hnam trưng teh đak rong hŏk tro kon kông lơ̆m dêh char oei mât lơ̆m jơnăr ôn hơmet ƀai ăn đe ŏh hŏk tro.

‘Măng pơlong sơnăm ‘nâu jĭ ‘măng mă blŭng Anih tơm vei lăng pơtho pơhrăm tơplih ming đê pơlong, đe thây kô akŏm jơhngâm tôch ai vă pơtho tơƀôh ăn hŏk tro pơm juăt hăm trong pơlong ‘nao đơ̆ng dôm ƀai hơlen lăng rim năr truh dôm ‘măng pơlong năng. Dôm hnam trưng teh đak rong hŏk tro kon kông kŭm tôch tơrĕk truh tơdrong arih xa găh tơmam drăm păng jơhngâm đon ăn đe ŏh hŏk tro, pơjing tơdrong ‘lơ̆ng hlŏh ăn đe oh ôn pơlong.