Tơroi tơbăt ăn Tổng Bí thư, pêng dêh char jei tơlĕch jang kiơ̆ kơjăp rim trong bơ̆ jang tih đơ̆ng Trung ương nhen Tơdrong tơchơ̆t 60, Nơ̆r athei jang kiơ̆ 45, Nơ̆r pơma pơtôch 150... găh hơmet ming hơnih bơ̆ jang dêh char, pơm kơ toei khul kơdră chĕp pơgơ̆r, hơmet ăn Hop akom tih kơ Đảng rim hơnih. Rim tơdrong vă jang hơgrop dêh char, pă đei hơnih jang apŭng, pơjing khul kơdră chĕp pơgơ̆r tơring ƀar kâp đei tơlĕch jang kơtang. Tổng Bí thư pơma hơdăh, trong jang hơgrop pêng dêh char vă pơjing dêh char Lâm Đồng (‘nao) ‘noh trong bơ̆ jang tih, kăl hloh, jơnei kơtang lơ̆m chĕp pơgơ̆r. Tơdrong hơgrop rim hơnih bơ̆ jang, hơnih jang kăl đei iung jang mă ‘lơ̆ng, tơpăt, tơbăt hơdăh. Kăl iŏk jơhngơ̆m đon ‘lơ̆ng, bơ̆ jang hơgei, oei sa ‘lơ̆ng, tơnăp lơ̆m bơ̆ jang jing trong tơm ăn pơjao tơdrong jang. Adoi lăng kơjăp tơdrong tơgŭm djru ou to hăm kang ƀô̆ lơ̆m khul vă pơm kơ toei, ăn pơdơ̆h bơ̆ jang, pơtruh bơ̆ jang tơdrong jang ou to. Dôm tơdrong kăl iung jang mă ‘lơ̆ng, mă tơnăp, tơpăt ‘lơ̆ng, ƀlep tơdrong tơchơ̆t.