Kơsơ̆ 9/6, tơ̆ Hnam Quốc hội, Kơdră Quốc hội Trần Thanh Mẫn hlôi pơgơ̆r ‘Măng hop akŏm mă pêng kơ Anih chih hơmet ming, tơmơ̆t dơ̆ng 1,2 tơdrong đơ̆ng Khôi luơ̆t tơm teh đak sơnăm 2013. Kơdră Quốc hội lăng ‘lơ̆ng Khŭl kơdră teh đak, Anih jang Trung ương Mặt trận Tổ quốc Việt Nam, Anih tơm Tư pháp, Anih tơm vei lăng Kŏng an lơ̆m khei ‘năr âu ki hlôi kơchăng tơlĕch ăn hla ar tơlĕch jang, klăih song hơnăp jang, pơtho dôm anih jang, khŭl jang bơ̆jang kiơ̆ đĭ jơhngơ̆m đei iŏk yua tơdrong iŏk nơ̆r tơgop, chih akŏm nơ̆r tơgop đơ̆ng kon pơlei vei sơđơ̆ng ƀlep tơdrong ‘meh vă. Dôm anih jang chih kơtơ̆ng ang hlôi đei lơ ƀai chih tơroi hơdăh găh tơdrong iŏk nơ̆r tơgop păng roi tơbăt đơ̆ng rim răih kon pơlei găh hla ar chih ming Tơdrong tơchơ̆t.

Kiơ̆ đơ̆ng chih akŏm, đĭ đei hloh 280 triệu nơ̆r tơgop đơ̆ng anih jang, khŭl jang, rim ‘nu găh đĭ đăng rim tơdrong lơ̆m hla ar chih ming tơdrong Tơchơ̆t; lơ̆m noh, jô̆ păh lăp kơsô̆ drơ̆ng lăp ‘noh 99,75%, tơdrong ‘nâu ‘noh tơƀôh rơđăh hloh ăn trong jang trŏ ƀlep đơ̆ng Đảng păng Quốc hội păng tơƀôh tơdrong drơ̆ng lăp ‘lơ̆ng đơ̆ng “đon tơchĕng đơ̆ng Đảng, lăp đon kon pơlei”. Kơdră Quốc hội athei, đơ̆ng rŏng ‘măng hop akŏm, dôm anih jang tơtĕnh chih pơkeh hla ar chih ming Tơdrong tơchơ̆t pơtruh ăn Quốc hội pơdrơ̆ng kiơ̆ lơ̆m khei ‘năr hrôih hloh, hơdrin ‘noh jĭ ‘năr 16/6 vă pơm lăp hăm tơdrong tơtĕnh đơ̆ng tơdrong proh hơmet, pơm tŏ sĕt bơngai jang păng bơ̆jang kiơ̆ tơdrong jang khŭl kơdră chĕp kơ̆l tơring 2 tăl.